Центркредит банкі

Жоспар

1. «ЦентрКредит» банкінің пайда болуы
2. «ЦентрКредит» банкінің қызметтері және операциялары
3. ЦентрКредит банкінің 2007 жылдағы қызметіне шолу
4. Банктің филиалдық желісі
5. Банк қызметкерлері

1. ЦентрКредит банкінің құрылу және даму тарихы – бір адамның бастамасы мен күш-қуаты, жігері ТОП деп атауға болатын сан мың адамдарды біріктіріп қана қоймай, жаңа жеңістерге рухтандыра алатынын паш ететін нарықтық бизнестің классикалық, хрестоматиялық тарихы. Осылайша құр тақыр жерден, бірақ жоғары рухтан қаншама банктер мен компаниялар пайда болып, дүние жүзіне әйгілі болды десеңізші. 1988 жылдың қоңыр салқын 19 қыркүйек күнінде “Алматы орталық кооперативтік банкін” құру үшін қанша күш-жігер мен қайрат қажет болғанын бізге, әрине, беймәлім.
Бұл Қазақстандағы КСРО Мемлекеттік банкінің №4 лицензиясын алған ең алғашқы коммерциялық банк еді. Араға бір жыл салмай-ақ, бұл банктің атауы “Euromoney” журналының беттерінде жарияланды. Бұрыңғы кеңес елдері кеңістігінде жаңа ғана қадам басқан банк үшін бұл айтарлықтай оқиға болды. Бірнеше рет атауын өзгертсе де, өмірлік ұстанымдары мен көшбасшылық қасиеттерінен айнымаған банктің тарихына көз жүгіртсек, “алғаш рет” деген ұғыммен ұштасатын көптеген елеулі оқиғаларға куә боламыз. 1995 жылы ЦентрКредит банкі алғашқылардың бірі болып “The Bank of New York” банкінде шетелдік валютамен корреспонденттік есепшот ашты. Келесі жылы ЦКБ “Western Unіon” халықаралық ақша аудару жүйесінің Орта Азия мен Қазақстандағы ең алғашқы және жалғыз өкілі болды. Ең алғашқылардың қатарында банкке “Euromoney” журналының “Корпоративтік басқаруы ең үздік банк” атағы берілді. 2000 жылы ЦКБ қатысушы-мүше ретінде “VІSA Іnternatіonal” халықаралық төлем жүйесіне қабылданды. Ізін суытпастан келесі жылы-ақ бірінші рет 11 миллион долларға синдикатталған қарыз тартып, “Fіtch” халықаралық рейтинг агенттігінің “B” дәрежесіндегі рейтингіне ие болды.
Банк өзінің қаржы тобын дамыта отырып, шекарасын да кеңейте түсті. Үстіміздегі жылы ол Ресейдің елордасында өзінің еншілес банкі – “Банк БЦК-Мәскеу” ЖШҚ ашты.
ЦентрКредит банкі көптеген игі істерде көшбасшы болып, жаңашыл идеялар мен механизмдерді, бағдарламаларды іске асырды. Жуырда ғана ЦКБ өз тарихының жаңа сатысына қадам басты. Тамыз айының соңында Банк өзінің 23 пайыз мөлшерінде үлесін сатып алған стратегиялық серіктесі – Оңтүстіккореялық Kookmіn банкімен келісімге қол қойды. Центркредиттіктердің пайымдауынша, мұндай серіктестік озат банктік технологиялар мен үздік тәжірибеге қол жеткізіп, Қазақстан мен бүкіл Орталық Азиядағы қызметінің ауқымын кеңейтуге және операциялық тиімділігін арттыруға мүмкіндік береді.
ЦентрКредит банкі – тек жай ғана қаржы корпорациясы емес, еліміз бен одан тыс жерлерде орныққан әр алуан деңгейдегі қарым-қатынастың біртұтас алып жүйесі. Банк – тәуелсіз Қазақстандағы жаңа тенденциялардың етек алып, дамуына және реформалардың іске асырылуына сүйеу болған институт. Жылдар бойы жауапкершілік принципін ұстана отырып, ЦентрКредит банкі шағын ғана шығармашылық шеберханадан мол тәжірибелі халықаралық қаржы институтына айналды.