Жарнама шығындарын аналитикалық есептеуді ұйымдастыру

Жарнама беруші – жарнамаларды өндіруге, орналастыруға, әрі қарай таратуға арналған жарнамалық ақпараттардың көзі болып табылатын заңды немесе жеке тұлға. Егер жарнама берушінің іс-әрекеттері лицензиялануы керек болса, жарнамада оның лицензия номері, сондай-ақ бұл лицензияны берген органның атауы көрсетілуі керек.
Міндетті сертификаттауға тиісілі тауарлардың жарнамасы «міндетті сертификатталуға жатады» деген белгімен қоса берілуі тиіс.
Жарнама берушілердің жарнама шығындары, көрмелерге, жәрмеңкелерге қатысу, тікелей сатып алушыларға немесе делдал ұйымдарға келісім шартқа, мәмілеге және басқа да құжаттарға сәйкес тегін берілген және қайтаруға жатпайтын тауарлар үлгілерінің құны «Шығындар құрамы туралы» ереженің 2 тармағына сәйкес, өнімді өткізуге байланысты шығындарға жатады және өнімнің (жұмыс, қызмет) өзіндік құнына қосылады. Шығындар құрамы туралы ережнің 12 тармағына сәйкес, жарнама шығындары өнімнің (жұмыс, қызмет) өзіндік құнына жарнаманың белгілі бір адамдар тобына (жарнама тұтынушылар) ұсынылған есептік кезеңдегі өзіндік құнына қосылады.
Жарнама тұтынушыларға, бұл жағдайда, қаперлеріне жарнама жеткізілген немесе жеткізілуі мүмкін, нәтижесінде жарнамаға өз тараптарынан сәйкесінше жауап қайтаратын заңды және жеке тұлғалар жатады.
Кәсіпорын өнімдері жақсы сатылуы үшін олар туралы әрдайым ақпараттар таратып тұру керек. Сондықтан да барлық кәсіпорындар бүгінгі күні жарнама шығындары деген шығындар түрімен үнемі кездесіп отырады. Жарнамаларды тарату бойынша мәселелерді реттейтін негізгі құжат 2003 жылғы 19 желтоқсанда № 508-ІІ номерімен белгіленген «Қазақстан Республикасында жарнама мәселелері бойынша заңнамалық актілерге кейбір өзгертулер мен толықтырулар енгізу туралы» Заңы болып табылады.