Ардағым –ата жұрт

Жаңа әлемдегі Жаңа Қазақстан дамудың өзі таңдаған даңғылына түсті. Тәуелсіздікке қолымыз жеткен алғашқы күннен бастап еліміздің атағы шартарапқа таралып, әлемдік қоғамдастықтың алдындағы абыройы да жылдан жылға артып келеді. Дегенмен, Бүгінгі асыл мұраларымыз- тәуелсіздік, кең-байтақ жеріміз, ана тіліміз, мәдени мұраларымыз бір адамның, бір ғана күннің еншісіндегі жеңісті жемісі емес, елім деп еңіреген біртума азаматтарымыз бен ұлт зиялыларының бірлескен күресінің нәтижесі. Осы аманатымызды ардақтай білейік. Тілі өшкен ұлт- тарих сахнасынан мәнгі жойылмақ. Ұлыларымыз ұлықтаған туған тіліміздің мерейін арттыру бүгінгі ұрпақ еншісінде. Бәсекелестік белең алған ғасырда еліміздің алдағы дамуы мен кемел келешегінің кепілі жаңа ғасырда білім, ғылым нәрімен сусындаған, көзі ашық, жігері жалындаған жастар мен келешек буын өкілдері болмақ.
Осы талаптарға сәйкес қазіргі заманға сай зиялы қауым өкілдерін дайындауда еліміздегі білім беру жүйесінің үздігі, ең алғашқы жоғарғы оқу орындарының бірі және бірегейі, киелі қара шаңырық- әл-Фараби атындағы Қазақ ұлттық университеті болып табылады.
Негізін кәсіби білікті ғылыми және педагогикалық мектептердің бастау көзі ретінде қалаған бұл жоғарғы оқу орны бүгінгі таңда Қазақстандағы білім беру мен кадр дайындау саласында мәні мен маңызы аса жоғары ғылыми-зерттеу орталығына айналды. Университет қабырғасында шын мәнінде бірегей интелектуалдық әлеуетке ие элиталық мамандар мен ұстаздар жұмыс атқарады. Үстіміздегі жылы әл-Фараби атындағы КазҰУ-дың халықаралық көрсеткіштер деңгейіне көтеріліп және әлемдік қауымдастыққа ҚР жоғары білім беру ісінің бетке ұстар айнасы ретінде қалыптасып, маңызын арттыру, ғылыми ауқымын кеңейту мақсатында ғылыми-зерттеу университеті мәртебесін беру үшін алғышарттар жасалып, әлемдік білім беру кеңістігінде лайықты орынға ие Орта Азия аймағындағы халықаралық білім беру орталығы ретінде дамыту шаралары қызу жүргізілуде.