Қазақстандағы билікті жүргізу жолдары

Біздің мемлекетіміз жас, керегесін тіктеп, қанатын енді қатайтып келеді. 70 жылдан астам уақыт бойы кеңестік әкімшілдік-әмірлік, тоталитарлық жүйенің шырмауында болып, бодандық қамытынан арылғанымыз кеше ғана десек болады. Барлық шаруа бірден өз бетімен шешіліп, тап-тұйнақтай болады дей салу әсте асығыс пікір деп ойлаймын. Олай дейтін себебім, мемлекеттік тілдің қанатының кең жайылуына Елбасы Н.Назарбаев тәуелсіздіктің алғашқы күндерінен бастап зор еңбек жасап келеді. Өзіңіз білесіз: біздің еліміздің демографиялық жағдайы, ең бастысы әлеуметтік-экономикалық жағдайы ә дегеннен тіл мәселесін ту етіп көтеріп, ұрандатуға мүмкіндік берген жоқ. “Көш жүре түзеледі” демекші, бастысы экономика, халықтың әл-ауқаты, басқа шаруа сонан соң деген Елбасының сарабдал саясаты мұндай күрделі мәселені шешуде тым асығыстық пен біржақты қызбалылыққа жол бермеді. Одақ ыдырағаннан соң бір¬қатар мемлекеттер тіл мәселесін төтесінен шешуге талпынды. Одан не шықты, олардағы жағдайдың қалай ушыққаны қазір белгілі емес пе?
“Егемен Қазақстан” газетінің 31 мамыр күнгі нөмірінде Президент Н.Назарбаевтың Жарлығы шықты. Аталған құжатта ”Тілдерді қолдану мен дамытудың 2001-2010 жылдарға арналған мемлекеттік бағдарламасы туралы” Қазақстан Республикасы Президентінің 2001 жылғы 7 ақпандағы №550 Жарлығына елеулі толықтырулар енгізілген. Жарлықты оқығанда ойыңызға не келді?
Дер кезінде шыққан, аса қажет құжат деп ойлаймын. Шынымды айтсам, аталған Жарлық көптің көкейіндегі ойды дөп басып, тың серпіліске жол ашады деп түсінемін. Олай дейтін себебім, тіл мәселесі талайдан бері сөз болып келеді ғой. Жоғарыдағы сөзімде, Елбасының мемлекеттік тілдің мәртебе алуына, оның қолданылуы мен дамуына қатысты “жеті рет өлшеп, бір рет кес” деп атам қазақ айтқан нақыл сөзді өзіне салиқалы саясат ретінде ұстағанын тілге тиек етіп өттім.
Елбасының көрегендігі сонда: мұндай нәзік нәрсені кезең-кезеңімен шешуге бағыт ұстанды; жағдайды дұрыстап, экономиканы тұрақтандырып, даму тізгінін қолға мықтап ұстамайынша асығыстыққа жол берген жоқ. Сол саясаттың арқасында халықтың әл-ауқаты күшейді. Қазір 90-шы жылдардың басындағы тоқыраудан шықтық, енді елімізді мекен етіп отырған ұлт пен ұлыс өкілдерінің бәрі мемлекеттік тілдің қажеттілігі мен қолданылуына ешқандай қарсылық білдіріп отырған жоқ. Қазақстан ішкі саяси тұрақтылықты сақтап отырған бірден бір мемлекет, біздегі басқа ұлт өкілдері мемле¬кеттік тілді меңгеруге түсіністікпен қарауда, себебі мемлекеттік тіл көп ұлтты Қазақстан халқын ұйымдастырушы, біріктіруші және іргелі істерге жұмылдырушы тіл болғалы отыр. Бұл туралы Елбасы былтырғы Жолдауында да айрықша айтқан.