Құнарлы жерлер

Жер мәселесі ықылым заманнан бүгінге дейін қоғамдық қатынастағы ең өткір мәселелердің бірі екендігі белгілі. Еліміз тәуелсіздік алғаннан бергі қысқа мерзім ішінде жерге байланысты екі рет заң қабылданды, жер кодексі бекітіліп, өзгерту, толықтырулар енгізілді. Бүгінгі басты проблема неде?
Біз әрқашан жеріміздің кеңдігімен мақтанамыз. Тек ШҚО жер көлемінің өзі 28322,6 мың гектар. Мұның 22654,6 мың гектары ауыл шаруашылығы иелігінде. Әрине, аз жер емес. Бірақ жер қатынасына байланысты проблема шаш етектен деуге болады. Көптеген айқай-шу, дау-дамайды реттей отырып жер кодексін қабылдадық. Жерді меншікке бере бастадық. Меншікке жер аламын деген кімнің де қолын мемлекет қаққан жоқ. Соның нәтижесінде ШҚО тұрғысында айтсақ, қазір егіндікке, шабындыққа, жайылымға қолайлы жердің көпшілігін азаматтар меншікке алды. Ұлан, Шемоноиха, Глубокое, Зырян, Жарма, тіпті шалғайдағы Зайсан ауданының өзінде егіндікке, шабындыққа, жайылымға қолайлы алақандай бос жер жоқ десек болады. Бәрі иелі. Ендігі кезекте Күршім, Көкпекті аудандарының өзінде өзен бойындағы шұрайлы жерлерді азаматтар таласа-тармаса меншікке алуда. Жерді меншікке алу үшін құжат әзірлеу онша қиынға түспейді. Әрі 20 пайыздық жеңілдік бағамен берілетіндіктен пайдалы. Басқаша айтқанда, жерді сатып алудың проблемасы шешілді деуге болады. Ал, ендігі басты проблема - сол алған жерді жер иесі қалай пайдаланып, өзіне және үкіметке қанша пайда әкеліп, ел экономикасының дамуына қаншалықты үлес қосып отыр деген мәселе. Қазір көптеген шаруашылықтар, кәсіпорындар алған жерін мақсатымен пайдаланбай отыр.
Біздің агенттіктің негізгі міндеті - жер меншікке заңға сәйкес беріліп жатыр ма, жерді меншікке беруге құқылы органдар халықтың арызын уақтылы қарап, шешуге қаншалықты мән беруде, меншікке жер алушылар сол жерін мақсатымен пайдаланып отыр ма дегенді қадағалау, бақылау қою, осы жағдайларға байланысты туындаған өзекті мәселелерді шешу.