Қазақстан болашағы, қазақ тілінде

Елбасы Нұрсұлтан Назарбаевтың қазақ тілді БАҚ басшыларымен өткізген сұхбаты қазақ қоғамындағы толғағы жеткен мәселелерді қозғап, халыққа үлкен әсер қалдырды. Бұл сұхбаттан кейін республикамыздың зиялы қауымы нені дұрыс, нені бұрыс түсініп жүргеніне сараптама жасайды-ау деп ойлаймын. Ұлттық идеологияның біраз тармақтарын айқындап, бағыт-бағдарын көрсетіп бергеніне көзіміз жетті.
Елбасымыз сұхбатында: «Қазақтың қазақтығының басты белгісі – қазақша сөйлеу. Үйде де, түзде де. Баласымен де, немересімен де. Досымен де, туысымен де. Бажасымен де, құдасымен де. Тек осыны жасаған адамның өзі ана тілін өркендетуге өзінің титтей де болса үлесін қоса алады… Осы 17 жылдың ішінде ол (орыс тілді қазақтар – С.Қ.) өзінің ана тілін – үйренуге міндетті еді. Бұл талап ешқандай да адам құқына қол сұғу ретінде қаралмауға тиіс. Бұл – парыз. Перзенттік парыз. Адамдық парыз», – деп әрбір қазақ азаматына ұлт алдындағы азаматтық парызын көрсетіп берген. Қазақ азаматтарына бұдан артық қалай айту керек.
Одан ары Елбасымыз: «Менің ел басшысы ретінде де, қазақ ретінде де парызым қазақ тілін өсіріп-өркендету… Қазақ елі барда қазақ тілі де болады. Өседі. Өркендейді. Мен «Қазақстанның болашағы қазақ тілінде» деген сөзімді тағы қайталағым келеді. Қазақ тіліне қамқорлық жасау менің перзенттік те, президенттік те парызым», – дейді. Бұл – Елбасымыздың жүрекжарды сөзі, мәңгілік ұстанымы, азаматтық көзқарасы. Бұл – үш жүз жылға таяу уақыт бойы ата-бабамыздың армандаған егемендіктің нәтижесі. Сол егемендікті өз қолымен орнатып, елі үшін, ұлты үшін күндіз күлкі, түнде ұйқысынан айырылып, еңбек етіп, ел тұтқасын ұстаған қазақ елінің тұңғыш Президентінің ұстанымы. Президент – елдің символы. Елдің егесі. Қазақстанның бүкіл халқы тағдырын, арман мүддесін, келешегін сеніп тапсырып отырған тұлға. Осы тұлғаның әрбір сөзі бізге Құранның аятындай әсер етіп, Конституцияның бабындай заңдық көрсеткіш болуы шарт. Олай болса, Елбасының сенімін жүктеп, қазақ халқының атынан ел басқарып отырған министрлер, шенеуніктер тіл мәселесіне келгенде түйсіктері неге оянбайды екен деп іштей қынжыласың, жаның ауырады.
Егемендік – бүкіл қазақстандықтардың бақыты. Егемендікті аялайтын, егемендікті құрметтейтін әрбір азамат осы жолда өзінің жанын құрбан етуге дайын болу керек. Әсіресе, егемендіктің жемісін татып, жентектеп отырған шенеуніктердің ойлануы парыз. Егемендікке деген махаббатымызды еш нәрсемен айырбастауға болмайды. Өйткені ол – бабалар арманы, бүгінгі біздің бақытымыз, ұрпақ келешегі. Ол келешек Елбасымыз Н.Ә.Назарбаев атап көрсеткендей – қазақ тілінде.
Елбасы сұхбатында қазақ және орыс, ағылшын тілдерінің қоғамдағы орнын ашық көрсетіп берді. Қоғамда туындаған бұл қажеттілік Елбасының алдына аса күрделі де күрмеуі қиын мәселені көлденең тартты. Бірақ БАҚ Елбасының ұсынған идеясын дұрыс түсінбей жатып үш тілге орысша «триединство языков», қазақша «үштұғырлы тіл» деген атау берді де, бас-көз жоқ біржақты насихаттап келе жатыр.