Жоспарлау жобасы және оны дайындауға қажетті материалдар

1 Жоспарлау жобасының міндеті, мазмұны және құрамы
2 Бастапқы материалдар және құрылысқа қажетті учаскені таңдау
3 Жобалауға тапсырма.
4 Құрылысқа қажетті учаскелерді таңдау.
5 Жобалауға алғашқы есептеулер.

Ауылдық елді мекендерді жоспарлауды жобалау негізіне - өндіріс күштерін орналастыру және шаруашылық дамуының келешектік жоспары жатады Ауылдық елді мекендерді жоспарлау ауыл шаруашылығы өндірісін ұйымдастыру мен шаруашылық аумағының жерге орналастырылуымен байластырылуы, басқа елді мекендермен, бөлек орналасқан фермалармен, ауыл шаруашылығы жерлерімен және көлік магистралдарымен ыңғайлы түрдегі байланысты қамтамасыз етуі қажет.
Ауылдық елді мекендерді жоспарлау және салу жобасының міндеті – оның дамуының келешегін, сәулеттік-жоспарлау құрылымын дайындаудан, аумақты қызметтік және құрылыстық аймақтарға бөлуді жүзеге асырудан, барлық тұрғын, мәдени-тұрмыс және өндірістік мақсаттағы объектілерді, инженерлік жабдықтауды, көркейтуді жүргізуден, құрылыс кезегін белгілеуден тұрады. Жоспарлау жобасында елді мекенді дамыту келешегін ескере отырып, әлеуметтік-экономикалық, сәулеттік-құрылыстық және инженерлік-техникалық мәселелер кешенді түрде шешіледі.
Ауылдық елді мекенді жоспарлау және салу жобасы екі: графиктік және есептік-мәтіндік бөліктерден тұрады.
Графиктік бөлікке төмендегілер кіреді:
1) аудандық жоспарлау және ішкішаруашылық жерге орналастыру жобаларының негізінде 1:10000 немесе 1:25000 масштабта жасалынған шаруашылық жер пайдаланудың сызбасы. Ол елді мекеннің, өндірістік кешендердің, жол торабының, ауылдан тыс инженерлік коммуникациялардың, ауыларалық, шаруашылықаралық және аудандық маңызы бар мәдени-тұрмыстық қызмет көрсету объектілерінің, су жинау және тазарту ғимараттары, арнайы мақсаттағы жасыл екпелер, бейіттер және т.б. орналасқан жерлердің орналасуының қазіргі жағдайымен жобалық шешімдерін бейнелеуі қажет.