Қазақстан, Ресей және Беларустың Кеден одағы іштегі өндірушілерді сырттағы бәсекелестерден қорғауды көздейді

Қазақстан, Ресей және Беларус бірыңғай кедендік тарифті келісуді және рәсімдеуді осы жылдың соңына дейін аяқтауға ниетті. Қазір тараптар іс жүзінде позицияларының 40 пайызын тоқайластырды. Егер осы үш мемлектеттің шеңберінде Кеден одағы жұмысын жолға қойса, көптеген өзара пайдалы жобалар жүзеге асырыла бастайды, іштегі өндірушілерді сырттағы бәсекелестерден қорғаудың мүмкіндігі туады. Сонымен қатар, тараптардың көзқарасынша, бірлесіп ұйымдастырылатын экономикалық қызмет пен ықпалдастық әлемдік қаржы дағдарысынан шығу жолындағы қосымша сүйеніш бола алады.
Қазақстан, Ресей және Беларустың Кеден одағы іштегі өндірушілерді сырттағы бәсекелестерден қорғауды көздейді
Еуразиялық экономикалық қоғамдастықтың (ЕурАзЭҚ) Бас хатшысы Тайыр Мансұров жуырда мәлім еткеніндей, бүгінгі күні тарифтердің 40 пайызы келісілген. «12 мыңның ішіндегі төрт мың позиция бойынша біз іс жүзінде бірыңғай тарифке иеміз. Ал, 2010 жылы Кеден одағы толығымен құрылатын болады», дейді ЕурАзЭҚ-тың Бас хатшысы.
Қазақстан, Ресей және Беларус Кедендік альянстың алдында тұр – іс жүзінде олар толыққанды экономикалық одақ құруға бір табан жақын. «ЕурАзЭҚ елдерінің валюталық одағы келесі қадам бола алады. Мен Еуразиялық ұлтүстілік есеп айыратын бірлікті құру туралы мәселені пысықтауды бастауды ұсындым», деп мәлімдеді Қазақстан Президенті Нұрсұлтан Назарбаев.
Ресей Президенті Дмитрий Медведевтің пікірінше, Ресей, Қазақстан және Беларустың Кеден одағы «ТМД елдерімен ынтымақтастықты дамытуда тың перспективаны қалыптастырады», сонымен қатар, бірлесіп ұйымдастырылатын экономикалық қызмет пен ықпалдастық – бұл дағдарыстан шығатын жол, қосымша тірек.