Қазақстан Халық Банкінің жалпы сипаттамасы

М А З М Ұ Н Ы

Кіріспе

1.Қазақстан Халық Банкінің жалпы сипаттамасы

2. Халық Банкінің 2005 . 2007 жылдардағы даму стратегиясы

3. «Қазақстан Халық Банкі» акционерлік акционерлік қоғамының 2006 жыл
бойынша қаржылық көрсеткіштері

4. Банк клиенттеріне көрсетілетін негізгі қызмет түрлері

5. Қазақстан Халық Банкінің Маркетинг және Жарнама Департаменті

Қорытынды

Кіріспе

«Қазақстан Халық Банкі» АҚ Қазақстандағы беделі жоғары, халыққа танымал банктердің бірі болып табылады. Қазіргі кезде банктік қызметтер нарығында қызмет көрсетудің көлемі мен деңгейі бойынша бірінші үштіктің құрамына кіреді. Халық Банкінің филиалдары Қазақстанның барлық облыстарында, сонымен қатар шетелдерде де ашылған. Клиенттерге көрсетілетін қызметтердің түрлері әрдайым кеңейіп отырады және клиенттердің ұсыныстарын міндетті түрде орындауға тырысады.
Халық Банкінің тарихы – бұл Қазақстан аумағындағы жинақ жүйесінің құрылу және даму тарихы. «Қазақстан Халық Банкі» акционерлік қоғамының негізі қайта құрылған Қазақстан Республикасы Жинақ банкінің базасында қаланған.
1990 жылдың желтоқсанынан бастап Қазақстан өзінің нарықтық экономика талаптарына жауап бере алатын банк жүйесін құруға тырысты. 1991 жылдың қаңтарында –ақ «Қазақ ССР-індегі банктер және банк қызметі туралы» деген заң қабылданды, мұның өзі тәуелсіз Қазақстанның банк ісіндегі реформа жұмысының алғашқы қадамы болған еді.
1992 жылы Қазақстан Республикасының Жинақ банкі құрылды, оның заңды түрдегі ресми құқық иеленушісі бүгінгі Қазақстан Халық Банкі болды.
1993 жылы Жинақ банкі Қазақстан Республикасының үкіметіне қарайтын дербес заңды құрылым – «Қазақстан Халық Банкі» болып ұйымдастырылды. Ал 1995 жылы Банк жабық тұрпаттағы акционерлік қоғам болып қайта құрылды. Қайта құру рәсімі банк басшылығын ауыстырумен, жұмыс стилін түпкілікті өзгертумен ұштастырылды.
Жаңа басшылық банк жұмысына әмбебап қызмет көрсету қағидатын негіз етіп алды және бүгінгі күнге дейін банк қызметі түрлерін барынша кеңейтуді, банкингтегі ақпараттық - коммуникативтік технологиялардың соңғы жетістіктерін пайдалануды барынша қолдап әрі дәйектілікпен іске асырып келеді.
1995 жылдың аяғында- ақ Қазақстан Халық Банкі республикадағы ірі операциялық банк болып танылды. Қазіргі уақытта Банк қаржы рыногындағы өзінің сол айқындамасынан ауытқымай, қол жеткізген жетістіктерін сақтап қалуға ұмтылып келеді.
1998 жылдың шілдесінде акционерлердің жалпы жиналысының шешімімен Банк жабық тұрпаттағы акционерлік қоғамнан Үкіметтің қатысуы 100 пайызды құрайтын «Қазақстан Халық жинақ банкі» ашық акционерлік қоғамына айналдырылды.
Сол жылы Қазақстан Республикасы Үкіметінің 1998 жылдың 6 шілдесінде шыққан №644 «Қазақстан Акционерлік Халық жинақ банкін 1998 – 2001 жылдары кезең – кезеңмен жекешелендірудің негізгі бағыттары туралы» деген қаулысына сәйкес акционерлік қоғам капиталын ұлғайту бағытында жұмыс жүргізілді.
2001 жылдың қараша айында өткен сауда – саттық аукционында Қазақстан Үкіметі өзіне тиесілі 33 пайыз + бір акцияның бақылау пакетін сатты. Осы уақыттан бастап Қазақстан Халық Банкі еліміздегі ірі әмбебап әрі жетекші коммерциялық банктердің бірі болып келеді. 80 жылдан астам өзінің клиенттеріне қалтқысыз қызмет етіп, сенімді қаржылық мекемеге айналып отыр.