Менеджер болуы керек..

Жергілікті өзін-өзі басқару — мемлекеттегі белгілі бір әкімшілік-аумақтық бөлік тұрғындарының және оның сайланбалы органдарының немесе өзін-өзі басқарушы тұрғындардың жергілікті мәселелер бойынша жұмыстарды басқару жөніндегі дербес қызметі. Жергілікті өзін-өзі басқаруға халық билігінің, яғни демократияның айқын көрінісі ретінде қарау керек.
Жергілікті өзін-өзі басқару жүйесін дамыту экономикалық өркендеудің, тұрақтылық пен әлеуметтік әл-ауқаттың және азаматтық қоғамды қалыптастырудың міндетті әрі маңызды шарттарының бірі болып табылады. Қазақстан Республикасындағы жергілікті өзін-өзі басқарудың қалыптасуы – бұл азаматтық қоғамның қалыптасуымен және дамуымен, елдің әлеуметтік-экономикалық дамуының жалпы деңгейімен, жергілікті халықтың өміріне тікелей әсер ететін басқа да факторлармен және шарттармен байланысты көп кезеңді және серпінді процесс. Дегенмен қазіргі уақытта жергілікті өзін-өзі басқаруды ұйымдастырып, қалыптастыру мен жүзеге асыруда бірқатар түйткілді мәселелер орын алып отырғаны мәлім. Әлемнің дамыған елдерінде жергілікті өзін-өзі басқару бірнеше кезеңде құрылғаны және бұл процесс бірнеше онжылдықтарға созылғаны белгілі. Қазақстанда да белгілі бір уақыт кезеңінде жергілікті өзін-өзі басқару мәселесі зерттелу және талқыланудан өтіп жүзеге асырылатын болады. Бірақ бұл мәселе біздің еліміздің жағдайы мен болмысына сәйкес келетін жергілікті өзін-өзі басқару үлгісін таңдауға келіп тіреледі. Осы тұрғыдан алғанда, еліміз үшін әлемдік тәжірибеге сүйене отырып жергілікті өзін-өзі басқаруды қалыптастыру – таңдалған мақсатқа сай тыңғылықты нәтиже көрсету басты назарда болуы тиіс.
Шетелдік тәжірибеге тоқталмас бұрын, ағымдағы жағдайды сарапқа салып алу керек. Қазіргі таңда елімізде жергілікті өзін-өзі басқаруды қалыптастыру бойынша жасалып жатқан шаралар біршама деуге болады.
Қазіргі әлемде мемлекеттің әл-ауқаты азаматтардың мүмкіндігін тиімді түрде пайдаланумен ерекшеленеді. Сол себепті көптеген дамыған елдер өздерінің жергілікті өзін-өзі басқару үлгісін жетілдіруге ұмтылады.
Жергілікті өзін-өзі басқару халыққа барынша жақын билік болып табылады, солар жергілікті халықтың өмір сүру деңгейіне ықпал етуші факторлардың оң әсерін күшейтуге бағытталған шараларды және басқа да тұрғындардың әлеуметтік-экономикалық қамтамасыз етілу мәселесін шешеді. Жергілікті өзін-өзі басқару ұтымды түрде құрылатын болса, жергілікті ресурстардың шығыны оңтайланады, сонымен қатар халықтың билікке деген сенімі елеулі түрде артатын болады.
Әлемдік даму жағдайында мұндай мәселе Қазақстанның алдында да тұр. Жалпы басқару жүйесінің тиімділігін артыруда халық билігінің айқын көрінісі болып табылатын жергілікті өзін-өзі басқаруды жетілдіру керек екені түсінікті. Бірақ осы мақсатқа жету үшін қандай шараларды жүзеге асыру керек, міне, осы әлі де талқылану үстінде.