Кәсіби қазақ тілінің маңызы мен міндеттері

Бүгінгі таңда жоғары оқу орындарының алдында бәсекеге қабілетті, білікті, білімді мамандарды даярлау талабы бірінші кезекте тұр. Мемлекеттік тілді білу, оны өз қызмет әрекетіне қарай қолдана білу құзыреті болашақ маманға қойылар талаптардың бірі болмақ. Осы мақсатта бүгінде көптеген игі шаралар атқарылуда. Тілді меңгерту үлгілері жетілдіріліп, жаңғыртылуда.
«Кәсіби қазақ тілі» пәні инновациялық технологияны кең қолдану мақсатында модульдық оқыту жүйесіне сәйкес жүргізіледі. «Кәсіби қазақ тілі» пәнін оқып-меңгерудің алдында студент «қазақ тілі» пәнін оқып-үйренуі керек, содан кейін модульдық оқыту жүйесі бойынша «кәсіби қазақ тілі» пәнін оқып үйренеді. Осы тұрғыдан алғанда, бұл пәнді жүргізу филолог мамандардың құзырында болғаны жөн. Өйткені,оқытушы маман тіліміздің құдіреттілігіне, шын мәніндегі қасиет тұтар ерекшеліктері – лексикалық ұшан-теңіз байлығына, сан қырлы сөз өрнектерінің сырына, әр сөздің ажарын ашып көрсететін әсем әуеніне, әдеби, көркем, кәсіби сөз құрудағы мол мүмкіндігіне көңіл бөлінуі тиіс. Сонымен қатар санаулы сөзге салмақты ой сыйдырған арыстарымыздың тапқыр ой, тамаша сөз қолданыстарының інжу-маржанын теру арқылы халқымыздың тарихы, шежіресі, рухани өмірінің үні тілімізді түлетіп, оның әлеуметтік қыз¬метінің кең аясын таныта білуі керек.
«Кәсіби қазақ тілі» пәнінің негізгі мақсаты – ком¬муникативтік құзыреттілік дағдыны қалыптастыру және дамыту, бәсекеге қабілетті әрі құ¬¬зыреттілігі жоғары тұлғаның кәсіптік маңызы бар жағдайларда ғылыми тілмен қазақша ойын то¬лық және анық жеткізуі үшін тілдік кәсіби¬бағдарлы дайындығын қамтамасыз ету болғандықтан, бұл пәнді жоғары оқу орындарында қазақ тілі маманы жүргізуі тиіс.
ҚАЗАҚ ТІЛІН ОҚЫТУДЫҢ КӘСІБИ-ҚАТЫСЫМДЫҚ МАҢЫЗЫ
Қазақ тілін өзгетілді дәрісханада тілтанымдық-қатысымдық бағытта үйрету мәселесі, ең алдымен, сөйлесім әрекеті және оның түрлерімен тығыз байланысты. Қазақ тілін меңгерту мәселесіне қатысты сөйлесім әрекетін, оның жеке түрлерін зерттеп, олардың әрқайсысының ерекшеліктері мен тілді меңгерудегі мәні мен алатын орнын ажыратып, айқындау – қазіргі көкейкесті проблема.Тіл объективті дүние туралы ақпараттың басты құралы екені, қоғам тіршілігіндегі түрлі мемлекеттік қызметтерді: заң қызметін, ғылым қызметін, білім қызметін және ұлтаралық келісім қызметін жүргізіп, жүзеге асыруға арналғандығы адамзат өркениетімен айқындалды.

1. Оразбаева Ф.Ш. Тілдік қатынас: теориясы мен әдістемесі. – Алматы: РБК, 2000. – 207 б.
2. Әбілқаев А. Қазақ тілін оқыту әдістемесі. – Алматы: Санат, 1995. – 117 б.
3. Ныязбекова К.С., Бейсенбекова Г.Т. Қазақ тілі (кәсіби-қатысымдық моделі). Оқу құралы. – Алматы, 2012. – 135 бет.