Кәлиманың көк құсы

Құрметті оқушым, сіз қалай ойлайсыз, Ұлық Алланың сипатын, Құран құпиясын, ислам философиясын «алиф, ләм, мим, қал, дәль» – деп, дінді араб әрпінен бастап үйрететін теріс тәсіл қайдан шықты? Мешіттегі имамдар мен молдалар дәрет алып, намазға жығылуды нағыз Ислам деп санайтын сауатсыздыққа бой ұрғалы қай заман? Ұлық Алланың шексіз, түпсіз, сансыз сипатын көңілмен сезу, Құран сүрелерінің сырына жүрекпен жету қазіргі мүфти, хазірет, имам, молда, сопылар үшін неліктен мүмкін емес нәрсеге айналды?
Исламның сақал, шапан, сәлдеге ғана мән беретін мұндай надан, қараңғы, топас түрі қашан және қайдан шықты? Әлемнің қалай басталып, немен бітерін алдын-ала біліп, күні бұрын ескертіп кеткен Хазіреті Пайғамбардың хадистерінде бұл жалған ілімнің бастауы мен кесапаты туралы айтылған ба? Әрине!
Хазіреті Пайғамбар бірде серіктерімен намаз оқып болған соң қолын жайып, «Иә, Ұлық Алла, Шам мен Йеменнің жері мен еліне береке мен бірлік бер, дініңді сол жерден гүлдендір!» – деп дұға қылады. Осы кезде Недж қаласынан келген сахабалар: «Иә, Алланың елшісі, дұғаңызға Недж қаласын да қоссаңыз» – деп өтінеді. Алла елшісі сол замат алдыңғы дұғасын айна-қатесіз қайталайды. Сахабалар сөзіміз естілмей қалды-ау деген оймен өтінішін дауыстап тағы айтады. Амал нешік, дұға өзгеріссіз үшінші мәрте қайталанады. «Иә, ұлық Алла, Шам мен Йеменнің жері мен еліне береке мен бірлік бер, дініңді сол жерден гүлдендір» – деп дұғасын нық дауыспен қайталаған Пайғамбар с.ғ.с: «Недждің дұғаға кірмейтін себебі бар. Ол жақтан елдің ішін ірітіп, діннің мазмұн-мәйегін былғап бүлдіретін бәле шығады. Малғұн шайтанның мүйізі сол болады» – деп дұғасының сырын түсіндіреді.