Қазақстандық демократия үлгісі

1. Қазақстандық демократия үлгісі
2. Мемлекеттілікті нығайту мен қазақстандық демократияны дамыту

Елбасы Н.Назарбаев қазақстандық демократия туралы ерекше айтты. Мемлекеттің тәуелсіздігі, азаматтардың еркіндігі мен бос¬тандығы, демократиялы ел болуы әркімнің ойы¬на келгенін істеуді білдірмейді. Тәуелсіздік – бұл ең алдымен тәуелсіздік атты қасиетті ұғымды қадірлеу, тәуелсіздігімізді одан әрі нығайтуға, бекемдеуге және қорғауға әркімнің үлес қосуы болса, ал демократия дегеніміз ең алдымен заңға тәуелді болу және тәртіптілік. Н.Бердяевтің сөзімен айтсақ, «Бостандық адамның құқығы емес, Құдай алдындағы міндеті», яғни демократияның шынайы міндеті – азаматтық тыныштықты, басқалардың қауіпсіздігін, құқығы мен бостандығын қамтамасыз ету.
Бізге оңды-солды тарата беретін демократияның қажеті жоқ. «Демократия жарлықпен орнатылмайды» (Н.Назарбаев). Бостандықты, демократияны иелену үшін оны шектей білу де керек. «Біздің мақсатымыз – мемлекеттік басқарудың жаңа түрін қалыптастыру. Ол қоғамға қызмет ету мен мемлекетті нығайтудың жаңа міндеттеріне сай болуы тиіс». Бұл «қазақстандықтық жолдың» одан әрі дамытылатынын білдіреді. Ізгілікті, қайырымды мемлекет туралы сөз қозғаған ойшылдардың барлығы да ең алдымен мемлекеттегі тәртіп пен әділдікке баса назар аударған. Тәртіп жоқ жерде шынайы демократия бола алмайды. Демократия осы екен деп бас-көзге қарамай, оған бірден сүңгіп кету жақсылық әкелмейді. Олай еткендердің жағалауға дейін жүзіп шығулары екіталай.
Қару иеленуге дейін жеңілдік берген Америка демократиясының не болғанын бүкіл әлем көрді. Осындай демократияның зардабынан бейкүнә балалар оққа ұшты, АҚШ төрт күн бойы қара жамылды. Мұндай оқиғалар әлемнің басқа да дамыған демократиялы елдерінен кездесуде. Бұл елдер де «демократиядан тым озық кеткенін» енді түсініп жатыр. Адам құқығы мен бостандығы туралы заңдарды қайта қарау керектігі де айтылуда, мұны жұртшылық та талап етуде. Уақыттың өзі көрсеткеніндей, Қазақстан ондай жолды таңдай алмайды. Біз өзімізге керегін ғана пайдаланамыз.