СТО стратегияларының элементтерін сабақ барысында қолдану

1. Бастауыш сынып сабақтарында сын тұрғысынан ойлау стратегияларын қолданудың тиімділігі
2. Қызығушылықты ояту кезеңі
3. Мағынаны ажырату кезеңі

Біз Тәуелсіз Қазақстан Республикасындағы XXI ғасырдың ұрпақтарын дайындап жатырмыз. Қазақстанның болашағы өзіміз оқытып, тәрбиелеп отырған оқушыларымыздың, жастардың қолында. Сондықтан Президенттің 2030 бағдарламасындағы жастарға қойылып отырған 7 міндетін іске асыру үшін сауатты да, білімді, жан-жақты, мемлекеттік тілді меңгерген жаны таза, дені сау, сол тілде жұмыс істей алатын, айналасындағы адамдармен дұрыс қарым-қатынас жасай білетін ұрпақ қажет. Тіліміздің мәртебесі – еліміздің мәртебесі, сондықтан сауатты, мемлекеттік тілді жетік білетін саналы, адамгершілігі мол азамат тәрбиелеу – бастауыш сынып мұғалімдерінің негізгі міндеті.
Тек мемлекеттік тіл – қазақ тілі арқылы ғана қазақ халқының тарихын, әдебиетін, мәдениетін, ұлттық салт-дәстүрін, әдет-ғұрпын, болмысын үйретуге болады. Осы мақсатқа жетсек қана Қазақстанды дамытып, көркейтетін саналы, білімді, дені сау, жан-жақты дамыған, 50 елмен бәсекелестікке жарайтын қабілетті, ұлтжанды, иманды, инабатты азамат тәрбиелейміз.
Қазақстан Республикасының «Білім туралы» Заңында «Білім беру жүйесінің басты міндеті – ұлттық және жалпы адамзаттық құндылықтар, ғылым мен практика жетістіктері негізінде жеке адамды қалыптастыруға және кәсіби шыңдауға бағытталған білім алу үшін қажетті жағдайлар жасау; оқытудың жаңа технологияларын енгізу, білім беруді ақпараттандыру, халықаралық ғаламдық коммуникациялық желілерге шығу» делінген.
Бүгінгі күн талабына сай жан-жақты дамыған, өмірге реалистік тұрғыдан қарайтын, жан дүниесі сұлу, рухани бай, сезімтал, терең біліммен қаруланған оқушы тұлғасын сомдау үшін қажырлы еңбек ететін жаңашыл ұстаз керек. Өз мақсатына жету үшін Ұстаздың қолында екі мықты қаруы болу керек. Бірі – терең ғылыми білім, екіншісі – сол білімін оқушы бойына, санасына жеткізетін, дарытатын әдіс-тәсілі. Осы екеуінің басын қатар ұштастыра білген мұғалім жаңа технологиялардың тиімдісін, ең керектісін таңдап, қолданады. Бұл жөнінде А.Байтұрсынұлының «Мектеп керектері» мақаласында «Мұғалім қандай болса, мектеп Һәм сондай болмақшы. Яғни мұғалім білімді болса, ол мектептен көбірек білім алып шықпақшы. Солай болған соң ең әуелі мектепке керегі – терең білімді, педагогика мен методикадан хабардар, жақсы оқыта алатын мұғалім. Екінші – оқыту ісіне керек құралдар һәм сайлы болуы. Құралсыз іс істелмейді, һәм құралдар қандай болса, істеген іс те сондай болмақшы» деп көрегендікпен айтқан пікірі бүгінгі оқыту ісіндегі өзгерістерге дәлел болып отыр.