Сұлу Көкше

Пән: Туризм
Жұмыс түрі: Материал
Тегін: Антиплагиат
Көлемі: 8 бет
Таңдаулыға:

Сұлу Көкшенің бүгінгі қос алқасы - Көкшетау қаласы мен Бурабай аймағы болса, бұл екеуі де қазір астаналық облыстың мәртебелі бір қақпасы мен мерейлі төріне айналып отыр. Қақпа мен төрдің аралығында тұтас бір елдің абыройы мен айбыны жатқандай. Осы бір түйсік түсініммен Елбасы Нұрсұлтан Назарбаев әрдайым Көкше өңірінің өзекті мәселелерін өз назарында ұстап, соларды шешуге қашан болсын қамқорлық жасап келеді. Бұған Көкшенің қалың елі қашан болсын риза.

Әуелі күні кешелері Көкшетау қаласының астаналық Ақмола облысы орталығының мәртебесіне ие болуы көне қаланың жаңа бір серпінмен дамуына дем бергендігін де айтқан ләзім. Көкшетаудың да еңсесі көтеріліп, көшелері жасанып, аулалары ажарланып, халқының ертеңгі күндерге деген сенімдері нығая түсті. Абылайдың Көкшесі қайыра бір түлеп сала берген-ді. Әлі де болса санадан кете қоймаған жайт, ана бір жылдары, қақаған қыс ішінде Көкшетаудың жылу жүйелерінің апатқа ұрынған тұсында, Елбасы сол жылу қазандығында өзі болып, алғашқы қамқорлығын да өзі көрсеткен болатын. Енді ойлап қарасақ, қай елдің Президенті шағын бір қаланың болар-болмас жылу қазандығына барып, апатты қалпына келтіру ісіне араласты екен?! Бұл - біздің Президентіміздің қолынан ғана келетін кішіпейілдік пен іскерлік, өз халқына деген жанашырлық. Елбасының бұл кісілігін көкшеліктер қашан болсын ұмытпақ та емес.

Соңғы жылдары Көкшетау қаласының көз қуантарлық кейіппен өзгеріп жатқандығын көріп те мерейленетінің бар. Тәуелсіздіктің айғағындай болып, орталық алаңға Абылай ханның ескерткіші де орнады. Ұлы ханның бұл ескерткішін орнатуға Елбасының өзі қамқорлық жасады. Көкшетауға келген бір сапарында Нұрағаның қаланың дәл орталығында қасқайып тұрған Лениннің ескерткішін нұсқап: «Мынаны алып тастап, Абылайды қоймайсыңдар ма?!» деген елдік сөзін де естігенбіз. Солай болды да! Хан Абылайдың ескерткішін 1999 жылдың 5 қарашасы күні Елбасы өзі келіп ашып, өткен-кеткен тарихтан бастап келер күндердің міндеттері мен барар бағытты бағамдап сүйсінте де, сүйіндіре де отырып, кеңінен толғай сөз сөйлеген-ді.

Сол кезеңдерден бері Көкшетаудың әлеуметтік-экономикалық жағдайы қалыпталып, ол даму жолына түсті. Ұзақ жылдардан бері жөндеу көрмеген көшелерінің біразы көмкеріліп те қалды. Біраз жылу мен су құбырлары жаңартылып, әйтеуір қала тіршілігінің қарап тұрмаған жайы бар. Әрине, бұған қарап Көкшетауда істейтін жұмыс қалмады, болмаса оның тұрғындарын алаңдатып та, тіпті кей жағдайда наразылықтарын да тудырмай отырған мәселелер мүлдем жоқ деп айтудан да аулақпыз. Оқтын-оқтын су құбырларының жарылып, кей жағдайда жылудың жетпей жататындығы да, ауыз судың сапасыздығы, ең бастысы - облыс орталығы тұрғындары ұзақ жылдардан бері өздерінің көп қабатты тұрғын үйлерінде түгелге жуық газ баллондарын пайдаланып келе жатқандығы да шешімін күткен өзекті мәселелердің бірі екендігі ақиқат. Осы арада өткен, яғни, 2011 жылдың 4 қарашасында Сенат депутаты ретінде Үкімет басшысы Кәрім Мәсімовке Қазақстанның солтүстік өңірлерін сұйытылған табиғи газбен қамтамасыз ету мәселесін көтеріп, сауал жолдаған болатынмын. Сондай-ақ бұл сауалда кезінде Көкшетау облыс орталығы болмай қалған бір-екі жылдың ішінде қаланың көп қабатты тұрғын үйлерін бір орталықтан газбен жабдықтау жүйесінің (газгольдерлер) ұстағанның қолында, тістегеннің аузында кеткендігінен Көкшетау қаласының тұрғындары соңғы он-он бес жылдың төңірегінде көп қабатты тұрғын үйлерде газ баллондарын пайдаланып келе жатқаНдықтарын айттым.

Қазіргі уақытта Көкшетау қаласындағы барлық 228 газгольдерлердің бар-жоғы 36-сы ғана жұмыс істеп тұрғандықтан, көп қабатты 701 тұрғын үйдің тұрғындары қаншалықты қауіпті болса да, баллондағы газды пайдаланады. Жергілікті атқарушы орындар бұл істі қаншалықты түзегілері келгендерімен, жергілікті бюджеттің қауқары жетпейді де, мәселе шешілмеген күйінде қалып келе жатыр. Бүгінгі астаналық облыстың орталығындағы газ шаруашылығын қайыра қалпына келтіру үшін Үкімет тарапынан тоқтамды бір іс жасайтын кез әбден келді деп санаймын. Және де Көкшетау - жылу-энергия орталығы (ТЭЦ) жоқ Қазақстандағы бірден-бір облыс орталығы. Қала өсіп келеді. Міне, осыны ескере отырып, ТЭЦ салу мәселесіне де Үкіметтің назар аударуын сұраймын деген бұл сауалыма Үкімет басшысы, рахмет, оң қабақпен қарап, өзінің 2011 жылғы 5 желтоқсанда берген жауабында көтерген бұл мәселелердің барлығын да шешу үшін тиісті шаралар қолданылатындығын айтқан болатын.
Ең бастысы - Елбасы өзінің биылғы, яғни 2012 жылғы 27 қаңтардағы Қазақстан халқына арнаған Жолдауында еліміздің орталық аймағына, соған қоса Астана қаласына газ құбырын тарту жөнінде Үкіметке берген нұсқауы бұл істің абыройлы атқарылатындығына деген сенімімізді нығайтып отырғандығы да бар. Ал енді Астанаға тартылатын осы газ құбырының тап Көкшетау мен Бурабайдың іргесінен өтетіндігін ескерсек, осы өңірдің тұрғындарын алаңдатып отырған біраз мәселелер де оң шешіліп қалар деген үміт те жоқ емес.
Елбасы өз Жолдауында «біз жаңа тұрғын үй бағдарламасын іске асыруға кірісіп кеттік» дей отырып, «Қолжетімді баспана 2020» бағдарламасын орындап шығудың әлеуметтік маңызын атап көрсеткен болатын. Бұл орайда Көкшетау қаласында осы бағдарламаға сәйкес «Самұрық-Қазына» қоры мен Көкшетау қалалық әкімдігі арасында меморандумға қол қойылғандығы да ерекше бір жаңалық әрі жақсылық болғалы тұр.

Көкшетауды орай жатқан Қопа көлінің жағалауына салынатын бұл үйлер кешені екі бірдей маңызды мәселені шешудің мүмкіндігін ашқалы тұр. Бұл жаңа шағын ауданда 6 тұрғын үй кешені бой көтеріп, барлығы 3100-дей отбасы игіліктерін көрмекші. Жаңа қала Көкшетаудың ажарын да өзінің жаңа сән-салтанатымен аша түсетін болады. Және де бұл жаңа шағын ауданда балабақшалар, мектептер, емханалар мен спорт кешендері, супермаркеттер, дәріханалар, былайша айтқанда, тұрмысқа қажетті әлеуметтік нысандардың бәрі де салынады. Ал енді ең бастысы - Көкшетаудың 80 көлінің бірі - Қопаның қазіргі қорыс басқан жағалауы жөнге келтіріліп, ол халықтың дем алатын бір жайлы жеріне айналмақшы. Тозығы жетіп, құлаудың ар жақ, бер жағында тұрған 96 ескі үйді сырып тастауға да тура келеді. Әрине, солардың өзін баспана етіп отырғандардың мүдделері де ескерілетіні анық. Көкшетаудың жаңа қаласын салып шығу үшін, яғни, бұл жобаны іске асыруға 24, 5 миллиард теңге қаржы да керек екен. Бұл қаржыны «Самұрық-Қазына» бергелі отыр.
Біздің осы бір жаңа жобаға айрықша мән беріп отырғандығымыздың өзіндік бір сыры да бар. Өйткені, соңғы жылдары қаланың тұрғын үй қоры тоза бастауымен бірге, тұрғын үй құрылысының индустриясы нашар дамып келді және бұл жайт пәтер алудың кезегінде тұрғандардың қарасын көбейтіп жіберді. Мысалы, қазір Көкшетау қаласы бойынша пәтер кезегінде 4567 отбасы тұрса, бұлардың ішінде 2583 адам әлеуметтік жағдайы төмен, 1984 мемлекеттік қызметші тағы да бар. Енді келіп, қолжетімді баспана бағдарламасының бір парасы Көкшетау қаласында жүзеге асырылып жатар болса, бұл Елбасы Жолдауының өмірлік маңыздылығын айғақтай түседі. Осы орайда өзінің әкімдік қызметінің алғашқы күнінен бастап Көкшетау қаласының ең өзекті бір мәселесін дөп басып тани да білген және соны шешуге үлкен жауапкершілікпен кірісіп те кеткен облыс әкімі Қайрат Қожамжаровқа ризашылығымызды айта отырып, ісіне сәттілік тілейміз.

Бұрындары біткен іске сыншы көп деуші едік, енді қазір басталмай жатқан іске де сын айтатындар көбейген осы бір шақта Көкшетауға осы шағын аудан не үшін керек еді дейтіндер болмаса екен деймін. Мұны айтып отырғандағы мақсатымыз, өз ақылы өзіне жетпей жүрсе де елге ақыл айтқыш біреулер кезінде Көкшетау қаласында салынған «Бурабай» спорт кешенінің не қажеті бар еді, есеңгіреп қалдық деп соны салып беріп кеткен әкімнің соңынан тас ата жыласа, енді бір білгіш өткен жылдары тағы да сол Көкшетауда бой көтерген «Тәуелсіздік» монументі мен Ақан серінің Құлагеріне тұрғызылған ескерткішті те мансұқ етіп, тағы да кеткен әкімді айыптап жатыр. Ал енді сол «Бурабай» спорт кешені қазір Көкшетаудың ең бір қажетті нысанына айналғанын көріп те жүрміз.

Бурабайдың қайталанбас сұлу табиғатын сақтап, келер ұрпаққа қаз-қалпында қалдыру жөніндегі Елбасы айтып келе жатқан тапсырмасының орындалуы да өңірде жоспарлы жүргізіліп жатыр. Бұл мәселеге орай Елбасы өз Жолдауында Бурабай курортты аймағын дамытудың жүйелі жоспарын әзірлеуге тапсырма бергендігі осы бір аяулы өңірдің орманы мен көлін, тасы мен тауын, аңы мен құсын, сайып келгенде, бар ажарын сақтап қалу жолында бұдан бұрын да басталған ісіне жаңа бір серпін бергендігі және анық.
Бурабай курортты аймағын дамыту бағытында Елбасы алға қойған міндеттердің орындалу жайы Парламент Сенатының «Өңір» депутаттық тобының да ұдайы назарындағы мәселе екендігін айтқан ләзім. Сенат төрағасының орынбасары А. Судьин мен «Өңір» тобының жетекшісі Е. Жұмабаев бастаған осы депутаттар құрамы Ақмола облысында болып, Астананың азық-түлік белдеуін жасау және Бурабай курортты аймағын дамытудың өзекті мәселелерін зерделеп, іс барысымен жан-жақты танысып қайтқан болатын. Республикалық және өңірлік мамандармен пікір алмасу барысында Бурабайдың табиғаты мен экологиясын сақтау және инфрақұрылымын дамытудың біраз өзекті мәселелері бар екендігі анықталды. Сенат депутаттары - «Өңір» депутаттық тобының мүшелері сапар барысында белгілі болған бар мәселені ой сараптарынан өткізіп, Үкімет басшысына, тиісті министрліктерге өз ұсыныстарын жолдады.

Елбасы айтқан сол жүйелі жоспарды орындауға Үкімет 2012 жылғы 30 қаңтардағы №261 қаулысымен 81 972 мың теңге қаржы бөліп отырғандығын айтады. Осы қаржыны пайдалану арқылы Бурабай курорттық аймағын дамытудың жаңа жүйелі жоспарын әзірлеу шаралары жасалып жатыр. Бұл орайда Бурабай өңірін дамытудың бұдан бұрын әзірленген, яғни, «Бурабай» мемлекеттік ұлттық табиғи паркінің шекарасы аймағына жақын маңда туристік инфрақұрылымның осы заманғы жаңа нысандарын салу жөніндегі бас жобамен өзара байланыстырылып қолға алынбақшы. Ең бастысы - Бурабайдың үздік курорттар тобына кіруін қамтамасыз ету бағытын ұстана отырып, қоршаған ортаның экологиялық жағдайына нұқсан келтіріп алмай, оны мейлінше сақтау және қорғау мәселелеріне әрдайым басты назар аударылмақшы.

... жалғасы

Сіз бұл жұмысты біздің қосымшамыз арқылы толығымен тегін көре аласыз.