ХАНАФИ МӘЗҺАБЫ НЕСІМЕН ЕРЕКШЕЛЕНЕДІ?

1 «Ұлық имам Әбу Ханифа мәзһабы және қазіргі заман»
2 Шариғаттың негізгі мәселелері
3 Имам Мәлік

2-3 сәуірде Алматыдағы «Қазақстан» қонақ үйінің салтанат залында Қазақстан мұсылмандары діни басқармасының ұйымдастыруымен «Ұлық имам Әбу Ханифа мәзһабы және қазіргі заман» атты халықаралық ғылыми-тәжірибелік конференция өтті. Мәзһабымыздың негізін салушы дін ғұла-масының туғанына 1350 жыл толуына қатысты мұндай үлкен іс-шараның мұсылман елдерінде, оның ішінде ТМД-ға мүше мемлекеттер арасында Қазақстанда тұңғыш өтуі айта қаларлықтай елеулі оқиғаға жатады.
Бұған Ханафи мәзһабын ұстанатын көптеген шет мемлекеттерден – атап айтқанда, Түркия, Мысыр, Ресей, Татарстан, Қырғызстан, Тәжікстан, Моңғолиядан дінбасылары мен діни комитет төрағалары, бірқатар мұсылман мемлекеттерінің дипломаттары, Қазақстаннан Парламент Мәжілісінің депутаттары, Әділет министрлігінің діни істер комитетінің басшылығынан өкіл, ғылым қайраткерлері, ҚМДБ-ның облыстар мен өңірлердегі өкіл имамдары, Алматы қаласының, Алматы және Талдықорған өңірлерінің имамдары, Нұр – Мүбарак Египет Ислам мәдениеті университетінің ұстаздары мен шәкірттері, республикалық имамдардың білімін жетілдіру институтының тыңдаушылары және сондай-ақ қайырымдылық ұйымдарының басшылары қатысты.
Алматы Орталық мешітінің найб имамы Данияр қари Жұмабаев Құран оқыды. Келелі басқосуды кіріспесөзбен ҚМДБ мен Орта Азия мүфтилер кеңесінің төрағасы, Бас мүфти шейх Әбсаттар қажы Дербісәлі ашты.
Ол өткелі отырған конференцияның мән-маңызына кеңінен тоқталды. Кім-кімге де белгілі6 бұл күндері ханафи мәзһабын (діни құқықтық мектеп) әлем мұсылмандарының жартысына жуығы ұстанады. Қазақ даласына Ислам діні келгелі он екі ғасырдан асты. Содан бері халқымыз осы бір ғана мәзһабты ұстануының нәтижесінде ешқандай да діни алауыздыққа жол берілген емес. Бұған қатысты Алла тағала мұсылман үмметін: «Ей, иман келтіргендер! Аллаға, пайғамбарға және өз араларыңдағы ұлықтарыңа бойсұныңдар. Егер өзара бір нәрсеге келісе алмасаңдар, оның жайын Алладан, пайғамбардан сұраңдар. Аллаға, қиямет күніне сенетіндерің рас болса, бұл сендер үшін қайырлы әрі тиімді» ( «Ниса» сүресі, 59-аят),- деп ескертеді.