Болашақ маман – бұл бәсекелестікке қабілетті маман

Елімізде жүріп жатқан терең экономикалық және әлеуметтік-мәдени өзгерістер білім беру қызметіне жаңаша қарауды, кәсіби қызметтің барлық сферасында мамандарды даярлау іс-әрекетін жаңаша тұрғыда ұйымдастыруды талап етеді. Жоғары оқу орнының түлегі жоғары деңгейде дамыған, коммуникативті ептіліктерді меңгерген, өзгермелі ортаға бейім, алғыр, бәсекеге қабілетті тұлға болуы тиіс. Сондықтан, жоғары мектепте барлық жаңалықтар мен өзгерістерге батыл жол ашарлық инновациялық білім беру технологияларын, интерактивті оқытуды, оқу іс-әрекетінің жаңа әдістері мен тәсілдерін белсенділікпен қолдану – маңызды мәселелердің бірі.
Жоғары оқу орынында оқу барысында болашақ маман ретіндегі студентті еңбек нарығының сұраныстарына сай қалыптастыру оқу үрдісін қазіргі білім беру талаптарына сәйкес жоспарлы және мақсатты ұйымдастырумен тығыз байланысты. Ол үшін оқыту үрдісіне жаңа және бұрын қолданылған озық тәсілдер мен бағыттарды жетілдіре енгізу қажет. Олардың ішінде оқытудың инновациялық технологиясы айрықша орын алады. Тәжірибе көрсеткендей, оқу үрдісіне технологияларды белсенді енгізу білім беруде дағдарыстарды жеңуге мол мүмкіндік береді, әрі білім беру мазмұны мен әдістерінің қоғамның және тұлғаның өзгермелі талаптарына сай болуын қамтамасыз етеді. Олар оқытуды ұғынылған мақсат жемісі ретінде сипаттайды және оны инновациялық оқыту ретінде танып, дәстүрлі оқытуға қарағанда білімді игерудің айрықша түрі деп бағалайды.
Студенттер мен магистранттарды оқытуда инновациялық технологияны қолдану тәжірибеміз оқу сабақтары барысында студенттер (магистранттар) мен оқытушылар арасында, сондай-ақ білім алушылар арасында анағұрлым продуктивті және конструктивті қарым-қатынастың орнағанын, олардың өз бетінше ізденіп, шығармашылық қабілеттіктерін көрсеткендігін ерекше атап өтуге болады. Оқу сабақтарын талдай келе, оқыту технологиялары әрқашан оқушылардың танымдық, әлеуметтік белсенділіктерін оятып, олардың оқу мотивациясының артуына, білім құндылығына сенуіне игі ықпалын тигізеді деп есептейміз.
Қазақстан жоғары оқу орындарында оқытудың басты формасы өзіндік жұмыс болып табылатын кредиттік жүйе енгізілгендіктен, инновациялық технологияны қолдану педагогтың білім деңгейі әртүрлі студенттер тобымен түрлі өзіндік жұмыстарды ұйымдастыру мүмкіндіктерін арттырады. Осылайша ұйымдастырылған оқу іс-әрекеті тапсырмалардың қол жетімді болуын қамтамасыз етеді және әрбір студентпен тіл табысуға, кеңес беруге, өзін-өзі бақылауға мүмкіншілік береді. Бұл тұрғыда педагог студенттердің ұжымдық, топтық және жеке өзіндік жұмыстарын шебер ұйымдастыру қызметін атқарады.
Инновациялық технологияны ұйымдастыру оқытуға интерактивті сипат береді, ол оқыту субъектілерінің өзара әрекеттесуін ұйымдастырумен, яғни білім, құндылық және идеялармен ғана емес, әрекеттермен де өзара алмасуды қамтамасыз ететіндігімен нәтижеленеді. Ол оқытудың әртүрлі технологияларын қолдану кезінде түрткілендіретін әрекеттер бар жерде (мысалы, студент ақпараттарды қабылдауға дайын болғанда; барлық танымдық үрдістер белсендірілгенде; білім тиімді меңгерілу үшін сабақ қарқынын студенттің күнтәртібіне қолайлы етіп құрғанда) байқалады. Бұл жерде оқытушы мен оқушылардың өзара әреетінің қалай орнатылатындығы, белсенді әдістердің қалай қолданылатындығы, әдістемелік материалдардың қандай шамада жасалатындығы және оларды жеткізу тәсілдері, оқыту үрдісінде кері байланыстың қаншалықты тиімді болатындығы жайлы мәселелер маңызды болып саналады. Аталмыш мәселелердің нәтижелі шешімін табу студенттің өз бетімен білім алуына, өзінің оқу барысын дербес басқарып отыруына мүмкіндік береді. Инновациялық технологияны қолдану оқытушының қарқынды еңбек етуіне және студенттердің өзіндік іс-әрекетіне анағұрлым жоғары талаптар қоюы мүмкін, десек те инновациялық оқытудың басымдылығы ерекше.