«Электронды үкіметті» қалыптастыру және дамыту

Ақпараттық технологияның дамыған заманында нарықтың қатаң талаптары Қазақстан Үкіметінің алдына еліміздің бәсекеге қабілеттілігін арттыруда қыруар міндеттер жүктеп отыр. Соның бірі - «электронды үкіметті» қалыптастыру. Соған орай, «Қазақстан Республикасындағы электронды үкіметті қалыптастырудың 2005-2007 жылдарға арналған мемлекеттік бағдарламаның» қабылданып, жүзеге асырыла бастағаны белгілі. Электронды үкімет жоспарын әзірлеу кезінде Корея, Сингапур, Эстония, Италия, Германия, Үндістан және басқа да елдердің тәжірибелері зерделенген болатын. Нәтижесінде, әлемдік тәжірибені ескере отырып, елімізде «электронды үкіметті» енгізуді төрт кезеңге бөліп жүзеге асыру белгіленді. Оның біріншісі - ақпарат кезеңі. Бұл кезеңде, яғни 2005-2006 жылдары мемлекеттік органдардың веб-сайттары арқылы анықтамалық ?ақпараттық қызмет көрсету жұмыстары жолға қойыла бастады. Ал, интерактивтік деп аталатын екінші кезеңде, яғни 2006 жылдың екінші жартысы мен 2007 жылы мемлекеттік органдар мен азаматтар арасындағы іс-қимылды тікелей және кері беру жолдарымен интерактивтік қызметтерді ұсыну жұмыстары іске асырылады. Үшінші транзакциялық кезеңде қаржылық операциялар үкіметтік портал арқылы іске асырылмақ. Бұл кезең 2007-2008 жылдарды қамтиды. Төртінші кезеңде, яғни 2009 жылы ақпараттық қоғамды қалыптастыруға маңыз берілмек. Ақпараттық кезеңді осы жылдың соңына дейін аяқтау жоспарланып отыр. Ақпараттандыру және байланыс агенттігінің төрағасы Асқар Жұмағалиевтың айтуынша, «электронды үкіметті» қалыптастыру үшін Ұлттық идентификациялық реестрлер туралы және Ақпараттандыру туралы екі заңды қабылдау қажет. Үкімет Ұлттық идентификациялық реестрлер туралы заң жобасын жуық арада Парламент қарауына ұсынатын болады. Ал Ақпараттандыру туралы заң жайлы айтатын болсақ, агенттік төрағасы қолданыстағы Ақпараттандыру туралы заңға өзгерістер мен толықтырулар енгізу қажеттігін айтуда. Заңнамаға енгізілетін түзетулердің жобасын жасау барысында қолданыстағы заңға біршама өзгерістер енгізу қажеттігі анықталған. Осыған байланысты Ақпараттандыру туралы заңның жобасын қайтадан жасауға шешім қабылданып отыр. Мұнымен қоса ақпараттандыру мәселелері бойынша кейбір заңнамалық актілерге енгізілетін түзетулер жобасы жасалатын болады. Соған сәйкес агенттік Ақпараттандыру туралы заңның жаңа нұсқасын әзірлеп, оны тиісінше Үкімет назарына ұсынып, одан кейін Парламентке шығаруды көздеп отыр. Аталған екі заңды Елбасы Жолдауына сәйкес ағымдағы жылдың желтоқсан айына дейін бекіту жоспарлануда. Енді «электронды үкіметтің» нәтижелеріне тоқталсақ. Агенттік төрағасының сөзіне қарағанда, электронды үкіметтің порталы жұмысын 2006 жылғы сәуірдің 12-сінен бастап жолға қойған. Онда қажеті ақпараттарды қазақ, орыс және ағылшын тілдерінде табуға болады. Порталдарда орналастырылған қызмет көрсетулер саны 377-ні құрап отыр. Бұл қазіргі таңда халық арасында мейлінше сұранысқа ие қызмет көрсетулер.