Мәдени коммуникация туралы бірер сөз

1 Мәдениетті дамыту үшін қыруар қаржы бөліну қажет деген ұғыммен келісесіз бе
2 Мәдениет институтының алға қойған стратегиялық жоспарлары қандай?

Жалпы, коммуникация дегеніміз біреумен қарым-қатынасқа түсу, байланыс жасау деген ұғымды беретіні белгілі. Ал, мәдени коммуникация бір мемлекеттің өзге мемлекеттермен жан-жақты қарым-қатынасын айқындайды. Бүгінгі ғылымның, ақпарат пен техниканың барынша дамыған заманында бір елдің басқалармен коммуникацияға түспей өмір сүруі – тіпті, мүмкін емес жағдай. Осы қағидамен біздің алпауыт мемлекеттердің ортасында орналасқан Қазақстан да, шүкір дейік, бүгінде қатардан қалыспай, сол мемлекеттермен еркін коммуникацияға түсіп, теке тіресіп келе жатыр. Ол халықтардың жасаған бүкіл мәдени туындыларының барлығын (тұрмыстық, рухани) өз игілігімізге жұмсап келеміз: өнері мен әдебиетін барынша сіңіріп, қабылдап жатырмыз; көлігі, киім-кешегі, тамағы, техникалық заттары халқымызға «аянбай» қызмет етуде. Осының арқасында соңғы жылдарда еліміздің саяси, экономикалық, әлеуметтік және мәдени дамуы жоғары көрсеткіштерге жеткенін білеміз.Бір қарағанда, қалыпты жағдай. Күнделікті алыс-беріс жасап, бар қажеттіліктерімізді өтеп жатырмыз. Бірақ, біздің мемлекетіміз әлемдік коммуникацияда нені алып, нені беру керек екендігін анықтай ала ма? Бізде мәдени талғам, таңдау деңгейі қандай дәрежеде? Яғни, біз коммуникацияға түсудің мәдениетін білеміз бе?
Осындай сұрақтарға келгенде, кез келгеніміз жауаптан тосыларымыз сөзсіз. Себебі, біздің мемлекетте мұндай мәселені қарастырып, реттеп отыратын бірде-бір ұйым жоқ.
Жалпы, «мәдениет» дегенде, біз, алдымен тілімізді, ділімізді, дінімізді ойлаймыз. Содан кейін орта, қоғам, заман деген түсініктер қалыптасады. Осы арада айта кетелік, «Мәдениет» деген сөздің мағынасы не, ол қайдан шыққан? «Мәдениет» латынның cultus сөзінен шыққан, қастерлеу, қадірлеу, бағалау деген мағынаны береді. Ең бағалы, идеал нәрсені «култь» деп атайтынымыз сондықтан. Орыстың ғұламасы Достоевский болса: «Ешбір күнә жасамаған сәбидің бір тамшы көз жасына қазіргі мақсат, идея, мәдениет, өркениет деп жүрген нәрселердің біреуі де татымайды» деген, себебі бүгінде «мәдениет» сөзі өз мағынасын жоғалтқан. Өйткені ертедегі «бағалы, қастерлі» болған ұғымдар бүгінде басқа формаға ауысты. Мәселен, бай шенеунік − мәдениетті, оқыған адам − мәдениетті, қала тұрғыны − мәдениетті. т.б.