1917 жылғы Қазан төңкерісі. Қазақстанда кеңес өкіметінің орнатылуы

1) Қазан төңкерісінің тарихи маңызы
2) Түркістан мен қазақстан халықтарының ұлттық өзін.өзі билеу жөніндегі алғашқы әрекеттері
3) Қазақстанның түрлі аймақтарында Кеңес өкіметі орнауының заңдылықтары

Монархияның ауыр мұрасы, төніп келе жатқан ашаршылық пен күйзеліс, Уақытша үкіметтің халықтарға – бітім, шаруаларға – жер, жұмысшыларға – фабрикалар, аз ұлттарға – теңдік, Ресей азаматтарына нақты кепілдікті құқықтар бере алмауы, ұсақ буржуазияшыл бұкара арасында анархиялық пиғылдардың өршуі – жалпы ұлттық дағдарыстың пісіп-жетілгенін анықтап берді. Халық корниловшылдықты – котрреволюцияшыл соғысқұмарлар диктатурасы мен пролетариат диктатурасының бірін таңдауға тиіс болды.
Қазан революциясы, яғни, В. И. Лениннің атағанындай, «Қазан теңкерісі» осындай жағдайда жүзеге асырылды. Бейбітшілік, жер, бостандық, ұлттың өзін-өзі билеуі сияқты жалпы адамзаттық қазыналарды негізге алуының революция тағдыры үшін зор маңызы болды. Жер мен бітім туралы тарихи декректердің қабылдануы, Кеңес өкіметі ұлт саясатының миллиондаған адамдардың арман-тілегіне сай келген бағдарламасының жариялануы революцияның бүкіл ел көлеміндс тез арада жеңіске жетуінде шешуші роль атқарды. Мәселен, «Ресей мен Шығыстың барлық еңбекші мұсылмандарына» деген үндеуде былай деп атап көрсетілді. «Ендігі жерде Сіздердің діни сенімдеріңіз, Сіздердің әдет-ғұрыптарыңыз, ұлттық және мәдени мекемелеріңіз ерікті және оларға қол сұғылмайтын болады деп жарияланады. Өздеріңіздің ұлттық өміріңізді өз еріктеріңізбен, ешбір бөгетсіз құра беріңіздер. Бұлай етуге Сіздердің толық құқығыңыз бар. Сіздердің құқықтарыңыз, Ресейдің барлық халықтарының құқықтары сияқты, революцияның және оның органдарының, жұмысшы, солдат және шаруа депутаттары Кеңесінің бүкіл күш-қуатымен қорғалып отыратынын біліп қойыңыздар».