Оқушының математикадан өзіндік жұмысын тиімді ұйымдастырудың бір тәсілі туралы

1 Оқушының математикадан өзіндік жұмысын тиімді ұйымдастырудың бір тәсілі туралы
Әдебиеттер

Компьютер көмегімен есеп шығару технологиясының негізі алгоритм түсінігімен тығыз байланысты. Қазіргі ақпараттандыру ғасырында өмір сүріп жатқандықтан, компьютерді қоғам өмірінің қай саласында болмасын пайдалана білу үшін және болашақ математик – маман ретінде компьютер көмегімен есеп шығару технологиясының негізі болып келетін алгоритм ұғымын тереңірек түсінуіміз, меңгеруіміз және тиімді пайдалана алуымыз керек болады. Есеп шығару алгоритмін жазу идеясын оқушылардың өз бетінше оқып-үйренуін тиімді ұйымдастыруда пайдалану мәселелеріне математика пәні мұғалімдерінің назарын аудармақшымыз.
Математиканы оқытудағы негізгі маңызды және үнемі күн тәртібінен түспейтін мәселенің бірі – «Қалай тиімді оқыту керек?, Қалайша оқытудың сапасын жақсартуға болады?, Білім және біліктілік деңгейін қалайша тереңдету және дамытуға болады?» сұрақтарына жауап іздеу болып табылатыны белгілі. Бұл сұрақтарға жауап – әрбір пән мұғалімінің тиімді оқыту әдісін, тәсілін немесе жолын таңдауына, ізденуіне келіп тіреледі. Қазіргі ақпараттық оқыту технологиялары дамып тұрған кездегі тиімді оқыту тәсілінің бірі – алгоритмдік тәсіл. Өйткені, модульдік оқыту тәсілінің түпкі идеясы алгоритм ұғымымен тікелей байланысты, және де модульдік тәсіл ақпараттық оқыту технологияларының әдістемелік негізі болып табылады. Сондықтан бұл тәсілді бүгінгі күнгі кез келген пән мұғалімі меңгеруі және өзінің оқытушылық, білім беру қызметінде тиімді пайдалана алуы тиіс. Себебі, ақпараттық оқыту технологияларының тиімділігі көп жағдайда оның әдістемелік тұрғыда да дұрыс ұйымдастырылуына байланысты болады. Мұндағы ерекшелік – бүгінгі күні бұл технология техникалық және программалық қамтамасыздандырылуы жағынан жеткілікті деңгейде шешілген. Ендігі мәселе – ұсынылатын электрондық оқулық материалды әдістемелік тұрғыда тиімді түрде ұсыну/беру болып табылады. Ақпараттық оқыту технологиялары негізінен оқушының/студенттің жеке өз бетінше оқып білім алуына арналатын болғандықтан, оның оқулық қызметіне әдістемелік тұрғыда да мүмкіндігінше комфортты жағдай жасалғаны дұрыс болар еді. Бұл мәселе, әсіресе, қашықтықтан оқыту және кредиттік білім алу технологиясын тиімді пайдалануда және іске асыруда да өзекті мәселеге айналып отыр. Біздің ұсынып отырған алгоритмдік оқыту тәсілі оқушының/студенттің теориялық материалды нақты саналы түсінуіне және оны өз бетінше бекітуіне, біліктілігін тиімді қалыптастыруына, өз бетімен машықтануына толық мүмкіндік жасай алатындығын практика көрсетіп отыр.
Ұсынып отырған тәсілдің тағы бір басты ерекшелігі – оның нәтижелілігінде. Оқыту алгоритмдерінің қадамдар тізбегі дұрыс анықталған жағдайда (алгоритм талабы/қасиеті бойынша солай болуы тиіс) ол міндетті түрде оң сапалы нәтижеге жеткізеді. Сондықтан, оқып-үйренуге және теориялық білімді бекітуге арналған оқулық материалдарды пән мұғалімдерінің өздері дайындағаны және ұсынғаны жөн. Сонда ғана нақты тақырыпты, тарауды оқып-үйренудің бастапқы кезеңдерінде оны бекітуді, үй тапсырмаларын және өзіндік жұмыстарды оқушылардың мұғалім көрсеткен үлгі бойынша орындағандары тиімді болады. Сонда ғана олар жаңа теориялық материалдарды жетік меңгере бастайды, сапалы түсінуге қол жеткізеді, білімін де және біліктілігін де сенімді түрде бекіте бастайды, оны тереңдетуге мүмкіндік алады. Екінші жағынан, пән мұғалімі өз оқушыларын жақсы білетін болғандықтан оқулық материалды қандай көлемде, мазмұнда және қандай күрделік деңгейде, қандай тәсілмен ұсыну қажеттілігін де анықтай алуы тиіс болады.

1.Темирбекова А.А. Методика преподавания математики. – М.:, 2003.
2.Под ред. Стефановой Н.Л., Подходовой Н.С. Методика и теория обучения математике. – М.:, 2005.
3. Полат Е.С., Бухаркина М.Ю., Моисеева М.В., Петров А.Е. Новые педагогические и информационные технологии в системе образования. – М.: ACADEMA, 2003 – 272 с.