Болашағымыз – мемлекеттік тілде

Еліміз егемендігін алып, көпұлтты біртұтас мемлекет ретінде етек-жеңін жинап, шаңырағын биік көтерген тұста елдің елдігін дәлелдейтін, тәуелсіздігін мығым ететін ең күшті құрал – мемлекеттік тіл саясатын жетілдіру. Міне осыған байланысты «мен қазақпын!» деп бедерлі байрағын биік те нық ұстаған әрбір қазақстандықтың ұлттық рухын бір сілкінткен тарихи маңызды оқиға болды. Ол - 1997 жылғы 11 шілдеде «Қазақстан Республикасындағы Тіл туралы» Заңның қабылдануы еді. Бұл Заңның қабылдануы – «мың өліп, мың тірілген» қайсар еліміздің жер шарының саяси картасында ұлттық нышандарымен қатар, мемлекеттік тілі бар зайырлы Қазақстан Республикасы ретінде таныла бастауы. Қазақ тілінің мемлекеттік тіл ретінде қолданылуына ықпал еткен Заңның 4 – бабында «Қазақстан Республикасының мемлекеттік тілі – қазақ тілі» деп жазылуы - ғасырлар бойы күткен, алаштың талай азаматтары көре алмай кеткен армандарының бірі еді. Ал 1998 жылғы 14 тамызда «Мемлекеттік органдарда мемлекеттік тілдің қолдану аясын кеңейту туралы» Үкіметтің № 769 қаулысы қабылданды. Бұл қаулының өміршеңдігі сонда – кеңес дәуірінен келе жатқан орысша жүргізілген кеңсе тілін мемлекеттік тіл ретінде сөйлетіп, қазақ тілінің мәртебесін көтерді десек те болады. Мысалға бір ғана 1- тармақтың 3) тармақшасын алып қарайықшы, онда: «мемлекеттік мекемелердің мемлекеттік тілде тапсырылған құжаттарды, есептер мен ақпараттарды қабылдамай қайтару жағдайын болғызбасын» - делінген, яғни, іс қағаздарын мемлекеттік тілде жүргізу үшін ауқымды шаралар жасалып, дербес мемлекеттің өзінің мемлекеттік тілі бар екенін дәлелдейтін, сол үшін іс-шаралар атқаратын кез жетті деген сөз.
Үкімет қабылдаған нормативтік – құқықтық актілердің өз дәрежесінде орындалуы үшін бағдарлама қажет екенін уақыт өзі көрсетіп берді. Сөйтіп, мемлекеттік тілдің басқару тіл ретінде қолданылуын қамтамасыз ету, іс жүргізуді мемлекеттік тілге көшіру кестесін белгілеу арқылы оның негізгі тіл ретінде қолданылуы сияқты маңызды – маңызды мәселелерге арналған Қазақстан Республикасы Президентінің 2001 жылғы № 550 Жарлығымен «Тілдерді қолдану мен дамытудың 2001-2010 жылдарға арналған мемлекеттік бағдарламасы» бекітілді.
Міне, сол заңның күшіне енгеннен бері он жыл уақыт өтіпті. Қазақ тілі құлашын кең жазып, мемлекеттік мекемелерде іс жүргізу мемлекеттік тілге көшіріліп, нақты қадамдар жасала бастады. Сондықтан да болар, бұдан былайғы уақытта да қазақ тілі мемлекеттік статусын одан әрі нығайту үшін, тіл мәселесін – ұлт мәселесі деп, талайы тағдырына зер сала қарайтын Елбасы Н. Назарбаев Қазақстан Халықтары Ассамблеясында сөйлеген сөзінде қазақ тілінің мәртебесін өз дәрежесіне, яғни Ту, Герб, Гимн тәрізді мемлекеттік нышандардың қатарына көтеру жөнінде өте орынды мәселе қойған болатын.