Чаттар, форумдар. Жедел хабарлама алмасу бағдарламалары

Пән: Информатика, Программалау, Мәліметтер қоры
Жұмыс түрі: Материал
Тегін: Антиплагиат
Көлемі: 10 бет
Таңдаулыға:

Чаттар, форумдар. Жедел хабарлама алмасу бағдарламалары

Чат (chat) сөзі ағылшын тілінде сөйлесу дегенді білдіреді. Internet желісіндегі Чат - бұл Сізге желінің өзге қатынаушыларымен шынайы уақыт режимінде тілдесуге мүмкіндік беретін қызмет (2. 7-суретке қараңыз) .

2. 7-сурет. Internet желісіндегі Чат терезесі

Чаттарға мәзірінде «Чаттар» деген сілтемесі бар кез келген веб-бетінен кіруге болады. Тілдескісі келетін әрбір адам арнаға ену үшін алдын ала қатынас шегін айқындап алуы, яғни, өз ник-есімін (ағылш. nickname), өзін өзгелер қалай атағанын қалайтынын көрсетуі қажет. Есім латын не орыс әліпбиі әріптерінен құралуы тиіс. Сондай-ақ, Сіздің хабарламаларыңыз қай түспен ерекшеленетінін, жаңарту уақытын (чат терезесінің жаңартылып отыру жиілігін) және шығарылатын хабарлама жолдарының санын таңдауға да болады.

Арнаға қосылғаннан кейін пайдаланушы осы пікірталасқа қатысушылардың барлығының аттарын көреді. Чатқа жөнелтілетін мәтін барлық өзге қатысушылардың негізгі терезесінде бірден пайда болады. Бұнда әркім кез келген тақырыпты, топты таңдауға, сөйлеуге, тыңдауға, топтағылардың барлығына қаратып бірдеме айтуға, өз тобын ұйымдастыруға немесе біреумен тек екеуара сөйлесуге ерікті.

Форум - бұл сайтта қатынас жасау құралы. Форумдағы хабарламалар пошта хабарламаларына ұқсайды, олардың әрқайсысының авторы, тақырыбы және мазмұны бар. Бірақ, форумға хабарлама жөнелту үшін қосымша бағдарлама қажет емес, тек сайттағы өзіне сәйкес нысанды толтырса жеткілікті (2. 8 - суретке қараңыз) .

2. 8-сурет. Форумдағы хабарламалар

Форумның міндетті қасиеті - ондағы хабарламалар тредтерге (ағылш. thread - «жіп») біріктірілуінде. Сіз форумдағы бір хабарламаға жауап берген кезіңізде, жауабыңыз бастапқы хабарламаға «байлаулы» болады. Осындай жауаптардың реті, жауапқа жауаптың реті тағы с. с. тредті құрайды. Нәтижесінде форум тредтерден құралған ағаш тәрізді құрылымға ие болады.

Чаттарға қарағанда форумға жіберілген хабарламалар өте ұзақ уақыт сақталуы мүмкін және форумдағы жауап сұрақ берілген күні шығуы міндетті емес.

Е-үкімет. Электрондық үкімет (е-үкімет) - халықтың ел үкіметімен тікелей байланысын қамтамасыз ететін жүйе. Бұл - қызмет көрсету, азаматтардың саясатқа араласуы және басқару үрдістерін ішкі және сыртқы қарым-қатынастарды техникалық құралдардың, Internet-тің, қазіргі заманғы БАҚ көмегімен өзгерту арқылы үздіксіз оңтайландыру.

ҚР Электрондық үкіметі веб-порталы - www. e. gov. kz. (2. 9 - суретке қараңыз) мемлекеттік қызметтерді «бір терезе» принципімен ұсыну тұжырымдамасын жүзеге асырудың тәжірибелік механизмі болып табылады. Бұл жоба Қазақстан Республикасы Президентінің 2004 жылғы 10 қарашадағы №1471 Жарлығымен бекітілген 2005-2007 жылдарға арналған Қазақстан Республикасында Электрондық үкіметті қалыптастырудың Мемлекеттік бағдарламасы аясында жүзеге асырылуда.

2. 9-сурет. Электрондық үкіметтің веб-порталы

Қазақстанда Электрондық үкіметті енгізу жұмыстары халықтың мемлекеттік органдарға жүгінуін оңайлату, мемлекеттік органдардың азаматтар мен ұйымдарға көрсететін қызметтері сапасын жақсарту және мерзімін қысқарту, мемлекеттік органдар қызметі бойынша дерек қорларына қатынасуды қамтамасыз ету және келешекте әкімшілік жүйе жетістіктерін есепке ала отырып, құрамы жағынан оңтайлы да тиімді мемлекеттік аппарат жасауға бағытталған.

Электрондық үкімет азаматтарға мемлекетпен қарым-қатынас жасауды және мемлекеттік қызметтерге қатынауды орналасқан орны мен жыл мезгіліне тәуелсіз, тәулігіне 24 сағат, аптасына жеті күн бойы қамтамасыз етіп отыруы тиіс. Мемлекеттік мекемелер көрсететін барлық қызметтердің тізімі мен сипаттамасы, нормативтік-құқықтық ақпарат, азаматтардың билікпен, түрлі әлеуметтік қызметтермен, комитеттермен және ведомстволармен ашық та тура сұхбаты кез келген уақытта бәріне де, әркімге де ашық болуы тиіс.

www. e. gov. kz. веб-порталының пайдаланушылары екі категорияға бөлінеді: пайдаланушылар және тіркелген пайдаланушылар. Пайдаланушылар веб-порталдың барлық беттерін қарап шыға алады, бірақ жеке беттерге қатынаса алмайды.

Жеке беттерге қатынау мүмкіндігіне ие болу үшін веб-порталда тіркелу қажет. Жеке бет азаматтарға электронды пошта, күнтізбелік жоспарлау, жөнелтімдер, қатынас құралдарын пайдалануға мүмкіндік береді.

Internet-банкинг. Банк жүйесі - нарықтық экономиканың ең маңызды және ажырамас құрылымдарының бірі. Өз қаражатыңызды және несиелеріңізді басқару үшін Қазақстанның банк жүйесінде Internet-банкинг қызметі бар.

Интернет-банкинг жүйесінің мәні клиенттің өз есеп шоттарын жылдам қатынау және банкке бармай-ақ ақпарат алып, төлемдерді жүргізу мүмкіндігінде.

2. 10-сурет. «Халық Банк» порталы

Мысалы, «Халық Банк» порталы (www. halykbank. kz) (2. 10 - суретке қараңыз) аясында осы банктің салымшылары кең көлемді ақпараттық және қаржылық қызметтерді пайдалана алады, оның ішінде:

ақша аударымдарын өз бетімен жүргізу - картадан картаға (жеке меншік карталар арасында) ; картадан «Инновациялық» депозитіне (Қаржы > Депозиттер бөлімі) ;
телефон байланысы ақысын өтеу - (Қазақтелеком, Ducat), ұялы байланыс K’Cell, K-Mobile, Dalacom, кабелдік және сандық телевизия Алма-ТВ, ICON, Digital TV, Секател, коммуналдық провайдерлер ИВЦ, АЛСЕКО, INSEL аударма компаниясы, автокөліктерді эвакуациялау, Activ, Pathword, Beeline, i-Card+, Юрист скрэтч-карталарын сатып алу және т. б. ;
өзінің барлық шоттарының хал-күйін, несиелері мен жинақ салымдарының шарттары мен жағдайын, төлемдер мен аударымдардың уақтылы жүргізілуін, ЖЗҚ зейнетақы салымдарын және т. б. қадағалау;
«Инновациялық» депозитін ашу (Қаржы-Амалдар-Депозиттер) ;
үлестік инвестициялық қорларға қаражат салу (Қаржы-Амалдар-Инвестициялар) ;
сыйлық жинақтарына, суреттерге, гүлдерге, сақтандыру полисіне тапсырыс беру;
тегін жеткізілетін мерзімдік басылымдарға жазылу (Forbes, Harvard Business Review, Эксперт, Эксперт-Қазақстан, Капитал. kz, The Kazakhstan Monitor және т. б. ) ;
есеп шоттарыңыздағы қалдық қаражат жағдайы жөнінде ақпарат алу және т. б.

Интернет-маркетинг . Интернетке дейінгі заманда жарнама берушілерде түрлі қиындықтар болды: аудиторияның жарнамаға деген көзқарасы қандай, өнімге көңілі тола ма деген сұрақтарға жауап алуға мүмкіндігі болған жоқ. Осыны білу үшін олар арнайы зерттеулерге тапсырыс беріп, шығындарға бататын. Әрине, жарнама көрерменнің жүйкесін әбден тоздырған кезде компания бұл жағымсыз реакция жайында ести алатын, бірақ бүгінгі таңда жарнама мен өнімге деген реакция өте тез таралады. Бұл жарнама берушілер үшін компанияның сәтсіз идеяларын жақсартып, кейін осындай сапасыз ұсыныстарға ақшаны жұмсамауға мүмкіндік береді.

Кез келген комерциялық ұйымның басты мақсаты - қызметінен пайда табу. Компанияның иесі маркетингтік бөлімге бір ғана мақсатпен келеді - «көбірек ақша қажет». Ал мареткингтік бөлім ақша табудың негізгі бірнеше жолын біледі. Олар:

компанияның тауарын көбірек адам сатып алса;
әр адам компанияның тауарын жиі сатып алса;
әр сатылымнан соң компания көп ақша табатын болса.

Егер де компания тауарды көбірек тұтынушы сатып алсын десе, олардың мақсаты - тұтынушыларды ақпараттандыру немесе таныстыру болмақ. Тауар жайында неғұрлым адам көп білсе, оны қолданса, соғұрлым адам саны оны жиі сатып алатын болады деген теория негізінде түрлі акциялар жасалынады. Мысалы, көшеде не дүкенде келе жатып, косметика өнімдерін таратып жүрген қыздарды жиі көруге болады. Бұл косметика бір реттік қолдануға арналған өлшемде таратылады. Оны қолданғандар кейін бұл өнім жайында білетін болады, ал ұнаса, сатып алады.

Көпшілік компанияның өнімі жайында хабардар болған кезде маркетинг тауарды жиірек қолдану қажет деген шешімге келеді, ол үшін қолданудың жаңа жағдайларын немесе лояльділік бағдарламасын құрай бастайды. Соңғы тармақ брендингті тудырады (осы жағдайда тұтынушы өнім үшін ғана емес, бренд үшін де төлейді) .

Әр тармақта (хабарландыруды көбейту, лояльділікті құру, бренд жасау) коммуникациялық стратегия құрылуы мүмкін. Аудиториямен жұмыс жасап, бренд пен қызметтерге деген «түсіністік білдіру» (немесе Инсайт) негізінде стратегияны құруға болады. Коммуникациялық стратегия аудиторияның инсайттары, зерттеулер мен нарық үрдісі арқасында өнім туралы «не айту қажет», «қашан айту қажет» және «қайда айту қажет» деген сұрақтарға жауап табады. Осы кезде «қайда» деген сұрақтың жауабы - Интернет екені түсінікті болады. Себебі, аудиторияның көп бөлігі сонда. Ал интернет үшін digital-стратегия қажет. Төменде осы стратегия түрінің шарттары мен жолдары:

Digital-маркетинг тұтынушымен жасалынатын барлық интерактивті байланыстарға жауап береді. Бұл байланыстардың бір бөлігі әлеуметтік медиада орналасады, ал осы жерде жұмыс істеу үшін тағы бір стратегия қажет. Ең бастысы, әлеуметтік медианың әрекеттері коммуникациялық, маркетингтік және бизнес-стратегияға қарсы болмаса болды.
Әлеуметтік медиадағы стратегия digital-маркетингтың талаптарын орындауға жағдай жасауы тиіс.
Әлеуметтік медианы қолдану (digital-жылжыту мен жарнама секілді) сату мәселесін шешпейді.
Коммуникациялық стратегия «монолог» үшін құралса, «диалог» үшін мүлдем келмейді. Оған ұқсас түрлі кеңестер бар, мысалы, «баспасөз баяндамаларын блогқа жарияламаңыз». Интерактивтің өзі «сұрақ-жауап» түрінде болғандықтан, мәтін мен ақпаратты жазған кезде осыны ескеру қажет.

Әр жарнамалық тұғырнаманың өз механикасы болады. Мысалы, әлеуметтік желі, микроблог пен бейне-хостингтің алаңында бірдей ақпаратты таратуға болмайды.

Сонымен қатар, digital стратегия тұғырнамалық коммуникацияларды жасауға мүмкіндік береді. Олар: Жеке медиа (owned media) - компанияның бақылауындағы арналар ( сайт, блог, бірлестік, әлеуметтік желідегі профиль) және Ақылы медиа (paid media) - компаниямен жалға алынған арналар (медиалық жарнама, контекстті жарнама, демеушілік) .

Е-төлемдер (Internet дүкендері) . Internet желісінің қарқынды дамуы көптеген Internet дүкендерінің пайда болуына алып келді. Internet дүкен - тауарды не қызметті жарнамалайтын, сатып алуға тапсырыстарды қабылдайтын, пайдаланушыға есеп айырысу нұсқасын таңдауды ұсынатын интерактивті веб-сайт. Бұл жағдайда дүкеннің әкімшісі тауардың жеткізілуін ұйымдастырып, сатып алушымен есеп айырысуды қадағалауға міндетті. Internet дүкендерінде пластикалық карта арқылы, банк немесе пошта аударымдары көмегімен немесе қолыңызда бар болса, электронды ақшамен есеп айырысуға болады.

Тауарлар немесе Internet қызметтері ақысын өтеудің недәуір қарапайым әрі ыңғайлы тәсілі - сандық (электронды) ақша - айналым барысы толық құпиялылықты қамтамасыз ететін, электронды түрде ұсынылып, айналымда жүретін төлем құралдары болып табылады.

Электронды төлемдер жүйесі - кең мағынасында электронды қатынас құралдары көмегімен есеп айрысу, келісім шарттар жасау және ақша аудару жүйесі.

Соңғы жылдары банктік пластикалық карталар нарығы қарқынды дамып келеді. Қазақстанда кеңінен тараған әрі ең танымал карталарға Visa, MasterCard/ Europay және т. б. жатқызуға болады. Пластикалық карталардың көптеген артықшылықтары бар, олардың ең бастысы - қалтаңызға ақша салып жүру қажеттігінің жоқ болуы.

Электронды төлемдер жүйелерінің қарқынды дамуына әлі де көптеген пайдаланушылардың электронды ақшаларға деген сенімінің жоқтығы бөгет болып отыр.

Алайда, электронды ақшаларды пайдалану аясының кеңеюі сөзсіз. Оған бір себеп - бұл ақшалардың ыңғайлылық, қаржылық операцияларды жүргізудің жоғары жылдамдығы, пайдаланудағы қарапайымдылық, төлемдерді толық қадағалау мүмкіндігі және олардың қауіпсіздігі, құпиялылық, басқа адамдарға беру мүмкіндігі сияқты даусыз артықшылықтары.

Ұялы телефон арқылы Internet-ке шығу, Internet арқылы ұялы телефонға хабарлама жіберу. Ұялы телефон арқылы Internet желісіне қосылу кезінде сіздің провайдеріңіз ұялы байланыс операторы болады және қосылым ақысы мен қосылым жылдамдығы тек соған тәуелді болады.

Ұялы телефон арқылы Internet-ке қосылу үшін GPRS модемі орнатылған телефонның өзі (көптеген қазіргі заманғы ұялы телефонда GPRS модемі орнатылған) ; ұялы телефонды компьютерге қосу кабелі немесе Bluetooth бейімдеуіш (егер ұялы телефон осы технологияны қолдайтын болса) ; соған сәйкес бағдарламалық жасақтама (драйверлер мен қосымша бағдарламалар) қажет болады.

Internet-ке қосылу баптаулары түрлі ұялы байланыс операторларында сәл өзгеше болады, сондықтан олар жөнінде тек оператордың өзінен - қолдау қызметінде не сайттан біле аласыз. Сайттарда олар көбінесе Internet-ке қосылу жөнінде толық ақпаратты ұсынады. Қазақстандағы ұялы байланыс операторларының сайттары: www. k-mobile. kz, www. beeline. kz, www. activ. kz, www. kcell. kz, www. pathword. kz, www. dalacom. kz және т. б.

Internet пен ұялы телефонды біріктірудің бір түрі - ұялы телефон мен Internet арасында SMS-хабарламаларын алмасу қызметі болып табылады. Internet-тен ұялы телефонға SMS-хабарлама жөнелту үшін арнайы сайттарды пайдалануға болады (мысалы, beeline және k-mobile ұялы байланыс телефон нөмірлеріне хабарлама жіберу үшін www. beeline. kz сайтын пайдалану болады), сонымен қатар арнайы бағдарламаларды қолдана аласыз. Ондай бағдарламаларға кейбір IRC бағдарламалары жатады, мысалы үшін ICQ, mail. ru Agent, Skype, Windows Messenger және т. б. Кейбір жағдайда бұл қызмет ақысыз, бірақ көбінесе аздап төлеу керек болады.

IР-телефония (Skype бағдарламасы) . IP-телефония ретінде қолданыла алатын көптеген алуан түрлі бағдарламалар бар. IP-телефония Internet арқылы дауысты жеткізуге мүмкіндік береді. Қазіргі таңда бұл бағдарламалар ішіндегі ең танымалы Skype (http://www. skype. com. ) болып табылады (2. 11 - суретке қараңыз) . Skype бағдарламасын орнату компьютер жөнінде қандайда бір артық білімдерді талап етпейді және ең көбі бір минут уақыт алады. Бағдарлама жақсы дыбыс сапасын қамтамасыз етеді. Оның үстіне, Skype мүлде тегін: өздеріне Skype орнатып алған абоненттермен қалағаныңызша сөйлесе беруге болады.

2. 11-сурет. Skype бағдарламасы

Skype бағдарламасын пайдалана алу үшін компьютер мынадай ең аз жүйелік талаптарға сай болуы тиіс:

Windows 2000 немесе XP операциялық жүйесі;
400 MHz процессор;
128 MB оперативті жады;
дискіде 15 MB бос орын;
дыбыстауыш, құлаққап + микрофон (гарнитура) ;
33. 6 Kb/s-тан төмен емес жылдамдықты Internet қосылысы.

Веб-камера бар болса, Skype бағдарламасын бейнеқоңыраулар үшін пайдалануға болады. Skype бағдарламасындағы бейнебайланыс жетесі әңгімелесушілерге бір-бірін көріп отыруға мүмкіндік береді.

Skype бағдарламасының танымалдығы және оның Internet шектерінен шығуы бағдарламамен жұмыс істеуді барынша қарапайым етуге бағытталған құрылғылардың пайда болуына алып келді.

... жалғасы

Сіз бұл жұмысты біздің қосымшамыз арқылы толығымен тегін көре аласыз.