Информатиканы оқыту әдістемесі

Жұмыс түрі: Дипломдық жұмыс
Тегін: Антиплагиат
Көлемі: 84 бет
Таңдаулыға:

ҚАЗАҚСТАН РЕСПУБЛИКАСЫ БІЛІМ ЖӘНЕ ҒЫЛЫМ МИНИСТРЛІГІ

РМҚК «Ы. АЛТЫНСАРИН АТЫНДАҒЫ АРҚАЛЫҚ МЕМЛЕКЕТТІК ПЕДАГОГИКАЛЫҚ ИНСТИТУТЫ»

Жаратылыстану және ақпараттандыру факультеті

Математика, физика және информатика кафедрасы

ДИПЛОМДЫҚ ЖҰМЫС

ОРТА МЕКТЕПТЕ ИНФОРМАТИКА ПӘНІНІҢ БАСҚА ПӘНДЕРМЕН БАЙЛАНЫСЫ

Орындаған:

«050111» информатика

мамандығының 4 курс студенті: Мадияров Р. М.

Ғылыми жетекшісі: Алматова А. М.

Арқалық, 2009 ж.

МАЗМҰНЫ:

КІРІСПЕ . . . 3

1. Информатиканы оқыту әдістемесі

1. 1. Информатика пәні . . . 6

1. 2. Информатика пәнінің мақсаты мен мазмұны . . . 9

1. 3. Информатиканы оқытудың құрылымы . . . 13

2. ИНФОРМАТИКА ПӘНІНІҢ БАСҚА ПӘНДЕРМЕН

БАЙЛАНЫСЫ

2. 1. Информатиканың басқа пәндермен байланысы . . . 26

2. 2. Информатиканың тілдік пәндермен байланысы . . . 34

2. 3. Информатиканың жаратылыстану пәндерімен байланысы . . . 39

2. 4. Информатиканың қоғамдық пәндермен байланысы . . . 52

3. Эксперименттік бөлім . . . 65

ҚОРЫТЫНДЫ . . . 78

ПАЙДАЛАНҒАН ДЕРЕК КӨЗДЕРІ . . . 81

ҚОСЫМШАЛАР . . . 82

КІРІСПЕ

Бүгінгі таңда есептеу техникасы жылдам дамып, оны ғылымның кез-келген саласына қолданып, одан нақтылы нәтижелер алуымызға байланысты біз "Компьютерлендіру ғасырына" бет бұрып отырмыз. 22 қыркүйек 1997 жылы Қазақстан Республикасы Президентінің өкімімен Қазақстан Республикасы орта білім жүйесін "информатикаландыру" туралы мемлекеттік бағдарлама бекітілген. Ғылыми-техникалық прогресс заманында білім беруді демократияландыру мен ізгілендірудің басты факторларының бірі - "информатикаландыру" болып табылады.

"Информатикаландыру" - деп оқытудың және оқу процесін басқарудың әсерлілігін арттыру мақсатында техникалық және материалдық ресурстарды, идеяларды, ғылыми-әдістемелік материалдарды үнемі пайдалану және интеграциялау процесін айтамыз.

"Информатика" жалпы орта білім берудегі негізгі пәндердің бірі болып табылады. Орта білім беру жүйесіндегі оның рөлі ақпараттық білімнің, ақпараттық орта мен адамның өзара қарым-қатынасын үйлесімді етудегі және жаңа ақпараттық технологияны пайдалану дағдыларын қалыптастырудағы, сондай-ақ оның әлемнің жүйелік-ақпараттық бейнесін қалыптастырудағы алатын орнымен қамтамасыз етіледі,

Информатиканың мектепке енуі сонымен бірге педагогикалық ғылымдардың парадигмалық және методологиялық өзгерістерін талап ететін қазіргі қоғамдағы түбегейлі әлеуметтік алмасулар кезеңіне сәйкес келіп отыр.

Оны жүйелі пайдалану саласында сан алуан жұмыстар жүргізілуде. Солардың қатарында жаңашыл педагогтардың тәжірибелерін ұштастыра отырып, оқытып жүрген мұғалімдер де бар.

Бұл дипломдық жұмыста осы "пәнаралық" байланыстардың ішінде "Информатика" пәнін басқа пәндермен байланыстыра оқытудың тиімділігі қарастырылған.

Дипломдық жұмыстың мақсаты : Қазіргі кезде "Информатиканың" маңызы күн өткен сайын еселеп өсіп келеді. Осыған байланысты оқытудың жаңа технологиясын қолданудың басқа пәндерді оқытуда пайдаланудың тиімді тәсілдерін қарастыра отырып, сабақта өткен материалды жаңа оқу материалымен ғана байланыстырып қоймай, "пәнаралық" байланыстарды қолдану тиімді екендігін дәлелдеп, ерекшеліктерін ескеру болып табылады.

Дипломдық жұмыстың міндеттері:

Оқытудың бұрын қалыптасқан стандартты жүйесіне қарағанда әртүрлі пәндерді оқытуда компьютерлерді пайдалану мынадай бірқатар артықшылықтар береді:

1. оқушылардың пәнге деген қызығушылығын арттыру;

2. оқу процесінің қарқынын жоғарылату;

3. оқушылардың шығармашылық белсенділігін көтеру;

4. оқытудың сапасын арттыру және тағы басқалар;

Дербес компьютерлердің демонстрациялық мүмкіндіктері өте зор екендігі белгілі. Басқа пәндерді оқытуда - компьютерді пайдалану нәтижесінде компьютердің мынадай дидактикалық мүмкіндіктерін көруге болады:

1. окушылардың шығармашылық бағытта жұмыс істеуіне, әсіресе кұбылыстарды зерттеуге, басқаруға мүмкіндік береді;

2. оқушылардың өзін-өзі бақылауына және өз жұмыс әрекетіне

өзінің түзету енгізе білуіне үйретеді;

3. басқа пәндерден алған білімдерін бекітуге көмектеседі және жалпы танымдық қабілеттердің дамуына әсер етеді;

4. өткен материалдардағы негізгі құбылыстармен заңдылықтарды көре отырып, сабақты пысықтауға мүмкіндік береді;

5. материалды тез меңгеруге, сонымен бірге уақыт ұтуға, пәнді интеграциялап оқуға жағдай жасайды, пәннің сапасымен мазмұнына да өзгерістер енгізеді;

6. табиғи жағдайда көзге көрінбейтін кейбір кұбылыстарды экраннан көруге мүмкіндік береді;

Компьютерлік оқыту жағдайында оқушылардың белсенді шығармашылық іс-әрекеті жүзеге асады. Көптеген үйрету программалары оқушылардың ізденімпаздығына түрткі болады, сұрақтың шешімінен қателескен жағдайда компьютер бағыт-бағдар береді. Атап айтқанда, оқу мотиві мен оқушылардың таным қызметін қалыптастырудың тиімді жолдары проблемалық ситуация туғызумен байланысты. Компьютерлендіру жағдайында проблемалық оқытудың психологиялық-педагогикалық заңдылықтары пайдаланылуы қажет, бұл заңдылықтар үйретуші программаларын жасағанда компьютердің көмегімен сәйкес келетін педагогикалық ситуацияларды қолданғанда сақталуы керек.

Проблемалық оқыту оқытудың белсенділік принципін жүзеге асырумен байланысты. Белсенді танымдылық іс-әрекеті таным және қажетті-мотивтік компоненттерінің қызметтерінде адамның ойында проблемалық ситуацияларын туғызады. С. Л. Рубинштейнның тұжырымдарына сүйенсек, проблемалық ситуация "ойлау процесінің алғашқы кезеңі" болып табылады.

Кез-келген іс-әрекет оны іске асыру құралын сипаттайды. Оқу әрекетін талдау барысында, әрекет құралы мен оқу міңдеттерін шешу құралын ажырата білу қажет.

Осы мағынада біз компьютердің оқу үйрету әрекетін біртұтас деп қарастырамыз. Егер компьютер оқу әрекетінің құралы ретінде ғана пайдаланылса, онда ол "тұтынушы - компьютер" схемасының аумағында болады. Компьютер оқу әрекетінің басқару функциясын атқарса, үйрету құралы ретінде қолдануды мойындағаны.

Электрондық есептеу техникаларын қолдану оны компьютерді оқыту құралы ретінде пайдалану мүмкіндіктерімен байланыстырады, компьютер оқу қондырғысы және білім берудің мазмұнды объектісінің бірі ретінде қарастырылады. Бірінші бағыты компьютер оқыту құралы ретінде - әртүрлі қиындықтағы үйретуші программалар арқылы, әсіресе, автоматтандырылған үйретуші жүйелерде жүзеге асырылады. Оқу әрекетінің ондай компоненті үйретуге ықпал ету функциясының міндетін атқарады. "Оқу міндеті" деген түсінік дидактика мен педагогикалық психологияның негізгі ұғымы. Компьютердің оқу процесінде қолданыла бастауы, мектепте оқыту практикасының міндеттеріне әлеуметтік жағдайды модельдеуші және т. б. мәселелерді алып келді (екінші бағыты) .

Үйретуші жүйені жасағанда оқу міндеттерін шешу мен оқудың мақсатқа жетуі арасындағы байланысты белгілеуді қажет етеді. Электрондық есептеуіш техника - жеке оқушының физика курсында өзінің практикалық қызметін реттеуші, физика есептерін шығаруға пайдалануға керемет құрал болып табылады.

Дипломдық жұмыстың өзектілігі:

Қазіргі таңдағы жаңа ақпараттық технологияларды пайдаланудың ерекшеліктерін қарастыра отырып, информатика пәні мен дербес компьютердің басқа пәндермен байланысының тиімді жақтарын зерттеуді дамыту.

1. Информатиканы оқыту әдістемесі

1. 1. Информатика пәні.

Информатиканың негізгі ұғымдарына кіріспес бұрын информатиканың өзінің және информатика пәнінің не екендігін және оның кұрылымын анықтап алған жөн.

Қазіргі информатика курсы дүниежүзілік педагогика ісінде теңдесі жоқ құбылыс саналады. Әдетте, ғылыми пәннің пайда болуынан бастап оның жалпыілімдік мәнін ұғынуға (егер солай болып жатса) немесе оның негіздерін мектептің білім беру жүйесіне енгізуге дейін кемінде бірнеше он жыл кетеді. Осы уақыт аралығында ғылыми ақпарат тұрақтандырылады, әдістаным анықталады, жалпы әдістемелік жолдар қалыптасады, яғни берілген пәнге әлде бір жүйелі көзқарас орнықтырылады.

Бір жағынан, бұл үрдіс жиырма жыл шамасы дерлік жалпыілімдік пәндер кұрамына міндетті түрде еніп келе жатса да информатика үшін әлі де аяқтала қойған жоқ. Бірақ пәнге деген жүйелі көзқарастың болмауы, оған үзіп-жұлып қарау қазіргі кезде информатиканы оқытудағы басты мәселе болып табылады. Егер оқу пәнінің жалпы сүлбесіне жүгінер болсақ, онда толық қажетті оқу пәні болуы үшін оған не жетіспейтіндігін түсінуге болады:

-пән саласының айқын сипаттамасы;

-информатикаға ғана тән кызметтің жалпыланған түрлерінің тұжырымдамасы.

Өткен 1985 жылдан бастап информатика пән ретінде өзгеріске түсті. Ол автоматикадан шын мәнінде алыстай бастады. Таза техникалық сала - computer science (компьютерлік ғылымдар) атты жеке ғылыми бағытқа бөлініп шықты. Ақпаратты қорғау мен ақпарат қауіпсіздігі, деректер мен мағлұматтардың (білім инженериясы) тұрпаттала өрнектелуі, әлеуметтік информатика және т. б. осы сияқты бағыттар пайда болды. Бүгінгі күні қай бағыттың басым екендігі туралы айту қиын, бірақ соның қажеті де жоқ шығар.

Бірақ, информатиканың барлық жетекші бағыттарының негізгі қағидалары оқу курсында да (әрине, тәптіштеудің әртүрлі деңгейінде) бейнеленуге тиіс екендігі анық. Оның үстіне, осы бағыттардың пайда болуы информатиканың саны күн сайын барынша өсіп келе жатқан өзге пән мәселелерімен байланыстыруға мүмкіндік береді. Мысалы, информатика енгізген виртуалдандыру феномены қазіргі қоғамның айқындауыш сипаттарының бірі болып табылады.

Жоғары оқу орнындағы информатика курсының зерттеу тақырыбын белгілеп, сонымен қатар оның пән аясын айқындауға әрекет жасайық. Қазіргі оқудың біріншісепті түйткілі оның іргелілігі болып келеді. Оқудың іргелілігі, атап айтқанда, жеке тұлғаның шынайы еркіндігінің қажетті шарты болып табылады. Ол дайын өнімдерді пайдалана ғана емес, оны жасай да біледі. Бұл, сонымен қатар, ақпараттық өркениетті тану сайманы болып табылатын информатика ғылымын игеруді де ескереді. Осы игерудің іскерлік сипаты информатиканың "ақпараттық үрдістер" атты жалпылауыш ұғымын оқып-үйренудің іскерлік логикада өрістетілетіндігімен анықталады. Ол ақпараттық өнім шығаратын ақпараттық технологияларға ұмтылу сатылары бойынша жүзеге асырылады.

Информатика туралы бүгінге дейінгі түсінігімізді жалпылай келе, мынадай жұмыстық анықтаманы тиянақтауға болады: информатика дегеніміз табиғаты әртүрлі жүиелердегі ақпараттық үрдістер ағымының заңдылықтары туралы, ақпараттық үрдістерді автоматтандыру әдістері, құралдары мен технологиялары туралы, ақпараттық жүйелердің жасалуы мен жұмыс істеу заңдылықтары туралы ғылым.

Информатика ғылымының іргелілігінен туындайтын маңызды нәрсе - оның оқып-уйрену нысаны, атап айтқанда, заңдылықтар толып табылатындығы, өйткені кез келген ғылымның мақсаты түсіндіру ғана емес, сонымен қатар, болжау да. Тек тәсілдерді немесе жүйелеуді білу арқылы болжам жасау аса қиындық туғызады. Оқып-үйренудің негізгі пәні - ақпараттық үрдістердің өзін ғана емес, "тұғырымен" - ақпараттық жүйелермен, бірге қарастырылатын үрдістер. Информатика прагматизмі ақпараттық үрдістерді тиімді ұйымдастыру мен олардың автоматты түрде орындалуына мүмкіндік туғызатын әдістер, құралдар мен технологиялардың да оның зерттеу пәні болып табылатындығына байланысты.

Ақпараттық үрдістерді оқып-үйрену сыртқы әлемнің кез - келген феноменін оқып-үйрену сияқты модельдеу әдістанымына негізделген. Информатиканың, айталық, физикадан ерекшелігі, ол математикалық модельдерді ғана емес (және тіпті олардың нешеуін емес), сонымен қатар әртүрлі тұрпаттар мен түрлердің модельдерін де (мәтін, кесте, сурет, алгоритм, бағдарлама - бәрі де модельдер) пайдаланады. Атап айтқанда ақпараттық модель ұғымы қалыптастырылуы негізгі мектеп информатика курсының негізгі міндеттерінің бірі болып табылатын пәнаралық байланыстардың осы курстағы кең спектрін айқындайды. Ал ақпараттық модельді құрудағы іс-әрекеттің өзі, яғни ақпараттық модельдеу тек информатиканы сипаттайтын қызметтің жалпыланған түрі болып табылады. Құрылған ақпараттық модельді ары қарай жаңа ақпараттық нысан ретінде қарастыруға болады. Бұл нысанды қажетті ақпараттық үрдісті басқара отырып, мақсатты түрде басқа нысанға түрлендіруге болады. Егер ондай басқару компьютерде жүзеге асырылатын болса, онда сөз ақпараттық үрдісті автоматтандыру туралы болғаны. Мұндай автоматтандырылған үрдіс ақпараттық технология деп аталады.

Информатика әлемінің қазіргі дамуы жағдайында информатиканы мынадай үш бөлім аясында қарастыруға болатын сыңайлы: теориялық информатика, әлеуметтік информатика, ақпараттық технологиялар.

Теориялық информатика бөлімінде информатиканың философиялық негіздері информацияның жалпы теориясының бастаулары, информатиканың математикалық негіздері, ақпараттық пішімдеу (моделдеу) негіздері, информатиканың семантикалық негіздері қарастырылады.

Әлеуметтік информатика бөлімінде ақпараттың қоғам дамуындағы орны. ақпараттық қоғам, акпараттық қоғамдағы адамның рөлі сияқты мәселелер қарастырылады.

Ақпараттық технологиялар бөлімінде есептеу техникасының даму тарихы, компьютер архитектурасы, микропроцессорлар архитектурасы, қатынастар (коммуникациялар) туралы түсінік, ақпаратты қорғау мәселелері қарастырылады.

Информатика - бірегей ғылыми пән. Оның оқу нысаны тұтас бір өркениет - ақпараттық өркениет болып табылады. Академик А. П. Ершов айтқандай, ақпараттық өркениет - "адами өркениеттің дамуындағы жалпыға бірдей және болмай қоймайтын кезең, әлемнің ақпараттық көрінісін игеруді, табиғат пен қоғамдағы ақпарат қызметі заңдарының бірлігін түйсінуді, олардың іс жүзінде қолданылуы мен ақпарат өндірісі мен өңдеу индустриясын түзу кезеңі". А. П. Ершов ерекше көңіл аударған негізгі нәрсе - әлеуметтік-техникалық революция, атап айтқанда, ақпараттық технологиялардың кең таралуы-ақпараттық өркениеттің сырт жағы болып табылатындығында. Оның басты мазмұны "табиғи және әлеуметтік үрдістердегі ақпарат рөлін философиялық және нақты ғылыми пайымдау" жүріп жатқан кездегі интеллектуалдық дамудың жаңа кезеңінен тұрады. Ақпараттың бүгінде қоғамның стратегиялық ресурсы екендігі және оның басқа да ресурстар түрлерін - энергетикалық, материалдық және адамзаттық түрлерін үнемдеуге және дамытуға мүмкіндік беретіндігіне ешкімнің күмәні болмаса керек. Қоғамды ауқымды ақпараттандыру жаңа геосаяси үрдістерді дамытуға белсенді түрде әсер етеді. Ол үрдістердің ең маңыздысы экономиканы ауқымдандыру мен мәдениетті ауқымдандыру болып табылады. Сонымен қатар, ауқымды ақпараттық қоғамда өмір сүріп еңбек ету үшін оны барлық қажеттілермен толықтыру мағынасында бейнесіндегі "өркениет ақыры" (Ф. Фукуяма) елесі пайда болып, қолдау табуда. Басқаша айтқанда, мынадай қалыптасқан пікір бар: "Жаңадан еш нәрсе жасаудың қажеті жоқ, тек оны тауып, пайдалану жеткілікті (атап айтқанда, интернет желісі арқылы) ". Егер осы тұрғыда қарайтын болсақ, онда өмір сүру үшін "технологиялық қаймақтарды сылып алу" толық жеткілікті де, басқа іргелі мәселелерді қарамай-ақ қойса да болады. Дегенмен, 80-жылдары ең әйгілі болған бұл тұжырымдама қазір үлкен күдік тудырып отыр. Бүгінде, мысалы, С. Харингтонның: Қазіргі дүние өркениеттер шайқасы қарсаңында тұр-деп тұжырымдайтын пікірі анағұрлым сенімдірек. Осы айтылғаннан ақпараттық технологияларды пайдаланып қана қоймай, оларды жасаудың да қажеттігі көрініп-ақ тұр. Кері жағдайда адамзат өркениет ішінде өтіп жатқан ақпараттық үрдістерді (шын мәнісінде бұлар бүгінгі үрдістердің ең елеулісі болып табылады) игере алмай қалу қауіпі бар. Сонымен, "түсінік" пен "білім" жеке тұлғаның анықтауыш сапасы ғана болып қалмай, адам мен өркениеттің бүтіндей тірі қалуының қажетті шартына айналуда.

Ақпараттық және телекоммуникациялық технологияларды оқып-үйрену информатиканың аса маңызды бөлімі болып табылады. Есептеу техникасының жұмыс істеу негіздерін анық түсінбейінше информатиканың басқа да көптеген бөлімдерін шындап игеру мүмкін емес. Бұл түсініктің сізден талап етілетін төменгі деңгейі ретінде компьютер архитектурасы алынады, бірақ ол да аса терең және жаңа ұғымдар саласына енуді талап етеді. Бұны түсіну микропроцессор командалары деңгейінде бағдарламалаумен таныспай мүмкін емес. Сонымен бірге, компьютердің қызмет ету негіздерін түсініп, оның көптеген сыртқы құрылғыларымен жұмыс істей білу қажет.

Компьютерлік желілер мен коммуникациялар - қолданбалы информатиканың бүтінде ең қарапайым бөлімі. Адамзат мәтіндік, кескіндік, басқа да ақпаратты кез - келген кашықтыққа қысқа уақытта тарату мүмкіндігін ұғынып, осы үрдіске миллиондаған адамдарды қатыстырудың экономикалық мүмкіндігін алды да компьютерлік желілер әлеміне жаппай бас қойды.

1. 2. Информатика пәнінің мақсаты мен мазмұны.

Информатиканы орта білім беру жүйесінде оқытудың мақсаттары:

- оқушыларға ақпараттарды беру, өңдеу, сақтау, жеткізу және оны қолдану процестері туралы білімдерді меңгерту, басқаша айтқанда, оқушыны ақпараттық біліммен қаруландыру;

оқушылардың оқу процесінде компьютерлік техниканы өзіндік даму мен іске асыру құралы ретінде, сонымен қатар, кәсіптік қызметтерге пайдалану дағдыларын қалыптастыру;
оқушылардың логикалық-құрлымдық және алгоритмдік-шығармашылық ойлау қабілеттерін дамыту, ынта-ықыластары мен шығармашылық бейімділіктерін қалыптастыру.

Аталған мақсаттардан төмендегі міндеттер анықталады:

Информатиканы мектепте оқытудың мазмұнын анықтау;
Информатиканы мектепте оқытудың оқу бағдарламасын жасақтау;
Информатиканы мектепте оқытудың әдістемелік жүйесін жасақтау.

«Информатика» пәні бойынша дайындалған стандарт білім берудің сәйкес сатысының базистік оқу жоспарымен, білім беру ұйымдарының типтік оқу жоспарымен, білім бағдарламаларымен кешенді түрде қолданылды.

«Информатика» оқу пәнінің базалық мазмұны (БМ) - оқу пәнінің мектепте міндетті түрде оқытылуы тиіс және үздіксіз білім берудің келесі сатылары мен деңгейлеріне информатиканы оқуды жалғастыру үшін жеткілікті болатын мазмұнының құрамы мен құрылымы.

«Информатика» оқу пәні бойынша білім берудің негізгі бағдарламасы (БНБ) -оқу пәнінің мазмұнын, яғни оқушыларда ғылыми дүниетанымдық негізді қалыптастыруды, олардың ойлау қабілетін дамытуды, ақпараттандыру құралдарын, ақпараттық технологияларды меңгеруді және оқушыларды өмірге, еңбекке және білімдерін жалғастыруға даярлауды анықтайтын құжат. Оның мазмұны мемлекеттік стандарт бойынша анықталады.

«Информатика» оқу пәні бойынша бағдарлы білім беру бағдарламасы (БББ) - «Информатика» оқу пәнінің мазмұнын анықтайтын, пәнді тереңдетіп, бағдарлы оқыту қамтамасыз ететін оқушыларды кәсіби даярлау бағытына қарай көлемі мен мазмұны бойынша сараланған құжат. Оның мазмұны мемлекеттік стандарт бойынша анықталады.

«Информатика» оқу пәні бойынша қосымша білім беру бағдарламасы (ҚҚБ) - мемлекеттік стандарт мазмұнынан тыс, оқушылардың информатика пәні бойынша білімге деген қажеттіліктерін қанағаттандыруға бағытталған оқу курстарының мазмұнын анықтайтын құжат. Бұл бағдарлама факультативтік немесе арнайы курстар ұйымдастыру арқылы жүзеге асырылады.

Жалпы ережелер:

Информатика пәнін оқытудың негізгі мақсаттары мен міндеттері төмендегідей:

оқушылардың ғылыми дүниетанымдық негізін қалыптастыру;
оқушылардың ойлау қабілетін дамыту;
оқушыларға ақпараттандыру құралдары мен ақпараттық технологияларды меңгерту;
оқушыларды өмірге, еңбекке және білімдерін жалғастыруға даярлау;
информатика ғылымының негізін қалайтын үш ұғымның (зат, энергия және ақпарат) бірі болып есптелетін, қазіргі таңдағы әлем бейнесін құрудың негізін құрайтын ақпарат ұғымын қалыптастыру;
қоршаған ортаны жаңа ақпараттық тұрғыдан зерттеу көзқарасын қалыптастыратын ақпараттық үрдістерді, табиғат, қоғам, техника аймақтарында қарастыру;

ақпараттандыру құралдары мен ақпараттық технологиялар саласында білім, білік және дағдыларды қалыптастыру мен оларды дамыту;
оқушыларды ақпараттық бірліктермен қамтамасыз ететін білімдермен қаруландыру;
оқушылардың ақпараттық сауаттылығы мен мәдениетін қалыптастыру;

Информатика пәнінің зерттеу обьектілері:

ақпарат;
ақпараттық ресурстар;
ақпараттық үрдістер;
ақпараттандыру құралдары мен ақпараттық технологиялар.

Информатика пәнінің даму болашағы мына көріністерге байланысты:

1. Пәннің жалпы білімдік, дүниетанымдық көзқарасын қалыптастыру, атап айтқанда:

оқушыларға формальдау, модельдеу және компьютерлік тәжірибе әдістермен меңгерту;
тиімді шешімдерді таңдай білуге бағытталған оперативті ойлау қабілетін дамыту.

2. Информатиканың ғылыми пән ретінде қалыптасуы, атап айтқанда, әлеуметтік, экономикалық, құқықтық, биологиялық, қолданбалы информатика және т. б.

Информатика пәнінің даму бағыттары:

Теориялық информатика. Мұнда ақпараттың жалпы қасиеттерін зерттеу, табиғаттағы және қоғамдағы ақпарат үрдістерінің өзара қатынасы, сонымен қатар әр түрлі ақпараттық үрдістерді жүзеге асырудың негізгі заңдылықтарын зерттеу мәселелері қарастырылады.

- Ақпараттандыру құралдары. Мұнда дербес компьютерлердің, микроүрділердің есептеу қызметінің мүмкіндіктері және аймақтық желілер арқылы ақпараттарды алмасу қызметтері туралы мәселелер қарастырылады. Әр түрлі ақпараттарды сақтау, өңдеу және қолдану мүмкіндіктерін одан әрі жетілдіру бағытында ақпараттық технологиялалардың даму мәселелерін қарастырумен жалғасады.

- Әлеуметтік информатика. Мұнда информатика мен ақпараттық технологиялалардың қазіргі қоғамдағы алатын орны, ақпаратпен және бағдарламалық өнімдермен жұмыс жасаудың құқықтық, этикалық және моральдық нормалары, жеке тұлға мен қоғамның ақпараттық қауіпсіздігі төңірегіндегі мәселелер қарастырылады.

Информатика оқу пәні бойынша оқу процесін ұйымдастыру және оны жүзеге асыру жағдайларына қойылатын талаптар мына бағыттарда қарастырылған:оқыту процесін мамандармен қамтамасыз ету; оқыту процесін оқу-әдістемелік жағынан қамтамасыз ету; материалдық-техникамен базамен қамтамасыз ету.

Білім беру жүйесінің басты міндеті - ұлттық және жалпы азаматтық қазыналар ғылым мен практиканың жетістіктері негізінде жеке адамды қалыптастыру және дамыту үшін оның әр азаматы зиялы болуы қажет. Бұл білім беру процесінің үздіксіз болуын талап етеді. Білім беру үздіксіз процесс болса, информатиканы оқыту да үздіксіз болуы қажет.

Жалпы білім беретін орта мектепке арналған информатикадан мемлекеттік білім беру стандарты осы мәселені көздейді.

Ал, стандарт осы пәнді орта мектепте үздіксіз білім беру тұжырымдамасына негізделіп жасалынған. Тұжырымдамада білім беру жүйесін демократияландыру принциптерін жүзеге асыруға бағытталып құралған.

Мұнда оқушы өз бетімен танымдық қызмет жасап, дами алатын субъект болса, мұғалім осы қызметтің тиімді ұйымдастырылуына, нәтижелі болуына жауап беретін, шығармашылықпен жұмыс істейтін жеке тұлға.

... жалғасы

Сіз бұл жұмысты біздің қосымшамыз арқылы толығымен тегін көре аласыз.