Қазақстанның көлік қызметтері саласындағы интеграциялық үрдістердің ерекшеліктерін ашып көрсету

Жұмыс түрі: Материал
Тегін: Антиплагиат
Көлемі: 27 бет
Таңдаулыға:

ӘОЖ 339.924:656 (574)
Қолжазба құқығында

БОДАУХАН ГУЛБАҒДА

Көліктік қызмет көрсету саласында Қазақстанның басқа елдермен
экономикалық интеграциясы: қазіргі жағдайы, даму болашағы

08.00.14 – Әлемдік шаруашылық және халықаралық экономикалық қатынастар

Экономика ғылымдарының кандидаты ғылыми дәрежесін алу үшін дайындалған
диссертацияның

АВТОРЕФЕРАТЫ

Қазақстан Республикасы
Алматы, 2008

Диссертациялық жұмыс Т. Рысқұлов атындағы Қазақ экономикалық
университетінде орындалды

Ғылыми жетекшісі - экономика ғылымдарының докторы
Шелекбай Ә.Д.

Ресми оппоненттер - экономика ғылымдарының докторы
Мадиярова Д.М.

- экономика ғылымдарының кандидаты
Туркеева К.А.

Жетекші ұйым - Тұран университеті

Диссертация 2008 жылы 23 қыркүйек сағат 14.00 Т. Рысқұлов
атындағы Қазақ экономикалық университетіндегі Д 14.45.10 ғылым докторы
ғылыми дәрежесін алу үшін дайындалған диссертацияларды қорғау жөніндегі
диссертациялық кеңестің мәжілісінде қорғалады.
Мекен жайы: 050035, Алматы қаласы, Жандосов көшесі 55, 144 бөлме.

Диссертациямен Т.Рысқұлов атындағы Қазақ экономикалық университетінің
кітапханасында танысуға болады.

Автореферат ___________________ 2008 ж таратылды.

Диссертациялық кеңестің
ғалым хатшысы,
экономика ғылымдарының докторы
Текенов Ұ.А.

КІРІСПЕ

Зерттеу тақырыбының өзектілігі. Қазіргі таңда әлемдік экономиканың
жаһандану жағдайымен экономикалық интеграциялануының барысында көліктік
қызмет көрсету нарығының маңызы өте зор. Әлемдік шаруашылықтың дамуы
өнеркәсіптік өндіріс пен көлік қызметтері шеңберіндегі көптеген
мемлекеттердің біртұтастығымен және маңызды дәрежедегі интеграциялануымен
сипатталады. Осы күнгі тауар нарығының ғаламдануы оның құрылымының қарқынды
өзгеруі әр елдің көлік жүйесінің дамуына маңызды әсер ете бастады.
Қазақстанның халықаралық тауарлық және қаржылық нарықтарға шығу
жағдайларында республика үшін елдің көлік торабының дамуы маңызды рөлге ие
болып отыр. Қазақстан өзінің геосаяси орналасуы жағдайында, экономикалық
әлеуеті мен тарихи дәстүрлерінің арқасында көлік шеңберіндегі әлемдік
шаруашылық байланыстар жүйесіне халықаралық интеграциясының белсенді
жақтаушысы және көлік тасымалдарының дамуы саласындағы ғаламдық
үрдістердің қатысушысы болып табылады.
Еуропаның, Шығыс және Оңтүстік – Шығыс Азияның сыйымды және серпінді
дамушы нарықтары арасында Еуразия құрлығының орталығында орналасқан
Қазақстанның экономикасы көбінесе транзиттік мүмкіндіктердің жоғары
әлеуетін тиімді пайдалануға тәуелді болып келеді. Республиканың көлік
жүйесінің дамуына елдің үлкен территориясы (2725 мың км), халықтың
шашыраңқы орналасуы (орташа шамамен 6 адам км2–ден аз), шикізаттық
өндірістік ресурстарының біршама бір жерге орналастырылуы және т.б. әсер
етеді.
Халықаралық талдау орталықтарының бағалаулары бойынша Оңтүстік – Шығыс
және Шығыс Азия – Еуропа бағыттары бойынша транзиттік ағымдар 330 - 400
млрд. АҚШ долларына бағаланады, олардың 20% Ресей Федерациясы мен
Қазақстанның территориясы арқылы өтуі керек. Бірақта әртүрлі себептерге
байланысты Қазақстан аталған әлеуетті 10%-дан аз пайдаланады. Қазіргі
уақытта шамамен 1,5 млрд. АҚШ долларын құрайтын ішкі тасымалдардың көлемі
2010 ж экономиканың индикативті даму жоспарына сәйкес 8 - 9% - ға артып,
3,6 млрд. АҚШ долларына дейін өсуі мүмкін.
Халықаралық тәжірибе көрсеткендей, ұлттық деңгейде көлік жүйелерінің
дұрыс емес дамуы өндіріс пен қызмет көрсету салаларындағы жоғары
шығындардың өтелмеуіне, шаруашылық қызметтің барлық салаларының дамуының
тоқырауына, аймақтардың өзара байланысының және еңбек ресурстарының
жылжуының шектелуіне әкеледі. Транзитті - көлік мүмкіндіктерін тиімді
пайдалану экономиканың ұқсас салалары мен орталарының жедел дамуын
ынталандырады. Экономика мен көлік кешенінің дамуы диалектикалық бірлік пен
бір-біріне объективті тәуелділікте болғандықтан да, Қазақстанның әлемдік
көлік жүйесіне интеграциясы жолында мемлекеттің көліктік стратегиясын
таңдауы қазіргі сатыдағы алдыңғы қатарлы міндеттердің бірі болып табылады.
Қазақстанның көліктік қызмет нарығын қалыптастыру үрдісінің күрделілігі
және оның әлемдік жүйеге интеграциясы берілген ғылыми зерттеудің
өзектілігін негіздейді және тұрақты экономикалық өсудің стратегиясын жасап
шығаруды жүзеге асыру үшін маңызы зор.
Тақырыптың зерттелу дәрежесі. Халықаралық интеграциялық үрдістердің
теориялық-әдістемелік аспектілеріне отандық және шетелдік авторлардың
ғылыми жұмыстарының біршамасы арналған. Олардың ішінен А.Маршалл, Дж.
М.Кейнс, Дж. Гэлбрайт, Л.Туроу, Г.Мюрдаль, Д.Рикардо, А.Смит, Р.Вернон,
П.Кругман, М.Портер, В. Леонтьев, Б.Олин, Э.Хекшер және т.б. ғалым
-экономисттерді атауға болады. Аталған еңбектерде әлемдік шаруашылық
байланыстардың ғаламдануы жағдайында интеграциялық үрдістердің жалпы
теориялық мәселелері қарастырылған.
Мемлекеттердің халықаралық экономикалық интеграциясының маңызды
бағыттарының бірі ретінде қызмет көрсету саласының қалыптасуы мен дамуы
мәселелеріне Е.Ф. Авдокушиннің, Г.А. Гранбергтің, Б.Г. Дякиннің, А.Н.
Козыревтің, Э.Г. Кочетовтың, А.А. Кочетковтың, В.М. Кутовтың, Н.М.
Мухитдинованың, В.Е. Рыбалкиннің, Б.Н. Смитиенконың, Ю.А. Щербанинің, И.П.
Фаминскийдің және басқа ғалым экономистердің жұмыстары арналған.
Жалпы экономикалық интеграцияның жәнеде Қазақстан республикасындағы
көлік қызметтері нарығының объектісі ретінде көлік қызметтері нарығының
қазіргі жағдайының маңызды ғылыми зерттеулері атап айтқанда, Е.М.Арыновтың,
Н.К.Исингариннің, Е.Д. Атамқұловтың, Х.З. Арбатиевтің, Қ.Қ. Жанғаскиннің,
Ю.Н. Лавришенконың, В.М. Лившицтің, К. Мадалиевтің, Ы. Ташбаевтың, Л.Ф.
Сухованың, Х.С. Карибжановтың, Г.И. Тулеугалиевтің т.б жұмыстарында
қарастырылған.
Қызмет көрсету саласындағы халықаралық интеграциялық үрдістерді
түбегейлі түрде зерттеумен айналысатын отандық және шетелдік авторлардың
еңбектерінің көптігіне қарамастан, аталған мәселенің көптеген аспектілері
жеткілікті түрде зерттелмеген, жоғарыда аталған үрдістердің жүзеге асырылу
механизмі мен мәнін түсінудің теориялық және әдістемелік негіздерінде
зерттеуді қажет ететін мәселелер бар. Көлік қызметтері саласындағы елдің
экономикалық интеграциясының теориялық және тәжірибелік аспектілерінің
Қазақстанда жеткілікті зерттелмеуі аталған мәселенің теориясы мен
тәжірибесін тереңдетіп зерттеу қажеттілігін алға қояды.
Зерттеудің мақсаттары мен міндеттері. Диссертацияның мақсаты - көлік
жүйелері саласындағы халықаралық экономикалық интеграцияның объективті
әлеуметтік-экономикалық алғышарттары мен теориялық негіздерін кешенді -
жүйелік зерттеу және Еуразиялық құрлықтың орталығында орналасқан ел ретінде
Қазақстанның көлік қызметтері саласындағы интеграциялық үрдістерінің даму
нысандары мен механизмдерін жасап шығару болып табылады.
Зерттеу мақсаты келесідей міндеттерді алға қоюды негіздеді:
- шаруашылық байланыстардың интернационализациясы мен ғаламдануының
заңдылық нәтижесі ретінде халықаралық экономикалық интеграцияның
теориялық-әдістемелік аспектілерін қарастыру;
- елдердің халықаралық экономикалық интеграциясының маңызды бағыттарының
бірі ретінде қызмет көрсету саласын зерттеу;
- ұлттық заңнамалар, қызмет көрсету саудасын ұлттық реттеудің қағидалары
мен әдістерінің ерекшеліктері негізінде Қазақстандағы көлік қызметтері
нарығының қазіргі жағдайын қарастыру және зерттеу;
- елдің әлеуметтік-экономикалық дамуының маңызды факторы ретінде
Қазақстанның көлік қызметтері саласындағы интеграциялық үрдістердің
ерекшеліктерін ашып көрсету;
- Еуропаның, Шығыс және Оңтүстік – Шығыс Азияның сыйымды нарықтары
арасындағы кеңейтіліп жатқан жүк айналымдарының жағдайында
Қазақстанның транзитті-көліктік әлеуетінің дамуы бойынша ұсыныстар
жасап шығару;
- теміржол, автомобиль, теңіз және әуе көліктері қызметтері бойынша
әлемдік көлік жүйесіне Қазақстанның интеграциялануының негізгі
жолдарын анықтау мен негіздеу;
- көмірсутекті шикізаттарды өспелі өндіру және оны тасымалдау мәселелері
негізінде көлік қызметтері саласындағы Қазақстанның экономикалық
интеграциясының басымды және оптималды бағыттары бойынша ұсыныстар
жасап шығару.
Жұмыстың зерттеу объектісі - елдердің әлеуметтік-экономикалық дамуының
факторы ретінде көлік қызметтері саласындағы халықаралық экономикалық
интеграцияны жүзеге асыратын Қазақстанның және көршілес мемлекеттердің
көлік жүйелері болып табылады.
Зерттеу пәні. Еуразиялық континенттің орталығындағы елдің ерекше
геостратегиялық орналасуы негізінде көлік қызметтері саласындағы
Қазақстанның халықаралық экономикалық интеграциясының үрдістері болып
табылады.
Диссертациялық жұмыстың теориялық және әдістемелік негізі - қызмет
көрсету саласындағы халықаралық экономикалық интеграцияның, атап айтқанда,
интеграциялық үрдістердің дамуының басымды бағыттарының бірінің
контекстінде қарастырылып отырған көлік қызметтерінің мәселелерімен
айналысатын ТМД-ның және шетел ғалымдарының ғылыми зерттеулеріне
негізделеді.
Зерттеу кезінде әртүрлі әдістер мен тәсілдер қолданылды: абстрактілі
–логикалық әдістердің ғылыми тәсілдердің жиынтығы, экономика–
статистикалық, бағдарламалық – мақсатты әдістер, сонымен қатар салыстыру,
жинақтау, экспертті бағалаулар мен болжау әдістері.
Зерттеу үрдісі кезінде ДСҰ – ның, Халықаралық экономикалық комитеттің,
Кедендік Одақтың Интеграциялық комитетінің, ЕурАзЭҚ-тың, БЭК-тің жылдық
есеп берулерінің жобалары мен құжаттары, ТМД - ның, Қазақстан
Республикасының Статистика жөніндегі агенттігінің, Қазақстан
Республикасының Көлік және коммуникация министрлігінің статистикалық
материалдары, көлік пен қызмет көрсету салаларының интеграциясы мәселелері
бойынша халықаралық ұйымдардың нормативті – құқықтық актілері мен
басылымдары пайдаланылды.
Зерттеудің ғылыми жаңалығы - көлік қызметтері саласындағы Қазақстанның
экономикалық интеграциясының даму болашағымен байланысты мәселелер
кешенінің шешілуі, теориялық негізделуі.
Қорғауға шығарылатын негізгі тұжырымдамалар. Зерттеу нәтижесінде
қорғауға келесідей нәтижелер шығарылды:
- АҚШ – Еуропа – Оңтүстік Шығыс Азия мен Қытай үшбұрышында көліктік
қызмет көрсету саласындағы Қазақстанның интеграциялық үрдістерінің
географиялық және геосаяси мәні ашылды;
- Трансазиялық теміржол магистралының Солтүстік, Орталық, Ортаазиялық
және Батыс дәліздері бойынша транзиттік жүк ағымдарының және
жолаушылар ағымының көлемін көбейту үшін көліктік қызмет көрсетуде
даусыз артықшылықтарды құру ұсынылды;
- Солтүстік – Оңтүстік және TRASECA халықаралық көлік дәліздері
бойынша автомобиль жолдарымен жүк тасымалдауда технологиясы бойынша
көліктік қызмет көрсетудің мультимодальды нысандарына, ал
ұйымдастырылуы бойынша көліктік қызмет көрсетудің унимодальды және
интермодальды нысандарына өту ұсынылды;
- Бірқатар мұнай газ құбырлары тораптарын кеңейту және жаңаларын салу
арқылы Қазақстанның мұнай газ құбырлары желісін әлемдік құбыр жүйесіне
интеграциялау ұсынылды.
Зерттеудің ғылыми – тәжірибелік мәні. Еуразиялық аймақтағы көлік
қызметтері саласындағы халықаралық интеграциялық үрдістердің маңызды
бағыттарын ашып көрсететін теориялық, әдістемелік және тәжірибелік
тұжырымдардың бірқатары ЕурАзЭҚ-тың, БЭК-тің және басқа да интеграциялық
топтардың құрамына кіретін елдер дамуының стратегиялық бағытын жасап шығару
үшін пайдаланылуы мүмкіндігінде.
Ғылыми жұмыста қалыптастырылған негізгі тұжырымдар мен ұсыныстар әлемдік
нарыққа мұнай мен газды тасымалдау және көлік қызметтері саласындағы
халықаралық интеграциялық үрдістердің дамуы мәселелері бойынша ары қарай
теориялық зерттеулер мен әдістемелер жасап шығаруда пайдалану үшін, сонымен
қатар нақты бағыттар бойынша келіссөз үрдістерінде және интеграциялық
ынтымақтастықтың тереңдеу шараларында пайдаланылуы мүмкін.
Зерттеу нәтижелерінің апробациясы мен өндіріске ендірілуі. Негізгі
ережелер, тұжырымдар мен ұсыныстар халықаралық ғылыми – тәжірибелік
конференциялар мен семинарларда қарастырылып, талқыланды: Қазақстанның
дүниежүзілік сауда ұйымына кіруі: жүйелік жағдайларын талдау, оң бағыты,
теріс салдары халықаралық ғылыми – тәжірибелік конференциясында (Алматы
2004 ж, 11-14 мамыр), Жедел жаңару жолындағы экономикалық бағдарлар
халықаралық ғылыми – тәжірибелік конференцияда (Алматы 2005 ж. 18-15
мамыр), Жастардың тілегі жасампаз Қазақстан Алматы аймағындағы жоғары оқу
орындарының студенттер, аспиранттар және жас ғалымдардың ғылыми
конференциясында (Алматы, 2006 19-20 сәуір), ТМД елдерінде экономиканың
дамуы мен экономист мамандарын дайындаудың өзекті мәселелері халықаралық
ғылыми–тәжірибелік конференциясында (Тараз, 2005, 17 маусым).
Диссертациялық зерттеу нәтижелерінде алынған ұсыныстар мен кеңестер:
- INKAZTRANS автокөлік кәсіпорнының қызметіне енгізілген.
Зерттеу нәтижесінің басылымдарда жарық көруі. Диссертациялық зерттеудің
тақырыбы бойынша жалпы көлемі 3,4 б.т. болатын 8 жұмыс жарияланды.
Жұмыстың құрылымы мен көлемі. Диссертациялық зерттеу жұмысы
кіріспеден, үш бөлімнен, қорытындыдан және пайдаланылған әдебиеттер
тізімінен тұрады. Диссертациялық жұмыс 19 кестеден, 7 суреттен тұрады.

НЕГІЗГІ БӨЛІМ

Геоэкономикалық кеңістіктегі қызмет көрсету саласының басымдылығы мен
жедел даму қарқындары ХХ ғасырдың екінші жартысы мен ХХІ ғасырдың басындағы
маңызды экономикалық көрініс болып табылады. Қызмет көрсетудің әлемдік
нарығы бүгінгі күні өнеркәсіптік және ауылшаруашылық өндірістің даму
қарқындарынан артып, 2 есеге өсті. Қызмет көрсету саласы қазіргі уақытта
әлемнің әртүрлі елдерінде жалпы ұлттық өнімнің 60% - дан 70% - ға дейін
құрауда және көптеген елдердің бәсеке қабілеттілігі қамтамасыз етілуде.
Диссертацияда көрсетілгендей, қызмет көрсету қоғамдық – пайдалы қызметтің
түрі ретінде тұтынушыларға нақты пайда әкеліп қана қоймай, сонымен қатар
олардың өндірушілеріне белгілі бір ақшалай табыс алуға мүмкіндік береді.
Кез келген қызмет көрсету дегеніміз – қызмет көрсетуші мен қызметті
тұтынушы ретінде қызмет ететін екі заңды тұлғалардың арасында заңды,
қаржылық, ұйымдастырушылық, технологиялық өзара қарым-қатынастардың пайда
болуы деп түсінуге болады.
Сонымен қатар, қызмет көрсетулердің кәсіпкерліктің шағын және орта
нысандары шеңберінде қарқынды даму мүмкіндігінің сипаты бар, оны
өнеркәсіптік өндіріс кезінде ұйымдастыру өте қиын, және мұнда нарықтық
экономиканың қызмет етуінің көптеген мәселелері шешіле отырып, көптеген
жұмыс орындары ұсынылады. Қызмет көрсетулердің аталған сипаттамаларының
жиынтығы әлемдік экономикалық кеңістіктегі жедел дамудың негізі болды (1 –
кесте).
Төмендегі кесте қызмет көрсету саласы дамуының артықшылықтарын және
әртүрлі елдер бойынша олардың өсу тенденцияларын байқауға мүмкіндік береді.
Сонымен қатар кестеден көрініп тұрғандай, АҚШ, Германия және Жапония сияқты
елдерде халық шарушылығының экономикасындағы қызмет көрсетудің үлесі
сәйкесінше 29% - дан 53% - ға, 47% - дан 59% - ға, 40% - дан 68% - ға өсті.
Қызмет көрсету өсімінің жоғары қарқындары Франция мен Ұлыбританияда
байқалуда.
1 – кестеде және басқа да халықаралық статистикалық ақпараттардан
диссертациялық жұмыста ұсынылған қызмет көрсету саласының жедел дамуы
қазіргі уақытта өндірістік салалардың, атап айтқанда, өнеркәсіптік дамудың
мәнін ығыстырып кез – келген елдің бәсеке қабілеттілігінің қалыптасуының
маңызды көздерінің біріне айналды деп тұжырым жасауға болады. Егер бұрынғы
уақытта ел экономикасының өсуі үшін ғалымдар өнеркәсіптік өндірістің
өнімдері ұлттық ЖІӨ - нің 40% - нан кем емес болуы керек деген болса, онда
қазіргі уақытта олар бұл мәнді 20% - ға дейін төмендетті және қазіргі
уақытта оны мемлекеттің табысты дамуының әдісі ретінде қызмет көрсету
саласының жедел өсуінің қажеттілігімен ауыстырды.

1- кесте - ХХ ғасырдың аяғындағы әлемнің дамыған елдері бойынша халық
шаруашылығы секторларының даму динамикасы

Секторлар %
Ел Жылдар Барлығы
ауыл өнеркәсіп қызмет
шаруашылығы көрсету
саласы
1976 22 38 40 100
Франция
1990 4 50 46 100
2006 9 41 50 100
1976 5 48 47 100
Германия
1990 4 43 53 100
2006 2 39 59 100
1976 28 32 40 100
Жапония
1990 17 30 53 100
2006 5 27 68 100
Ұлыбритания 1976 33 32 35 100
2006 17 38 45 100
Америка Құрама1976 26 45 29 100
Штаттары
1990 15 44 41 100
2006 11 36 53 100
Ескертпе - UNCTАD халықаралық статистикалық жинақ берілгендері бойынша

Диссертацияда атап көрсетілгендей, қызметтердің басқа түрлерімен
салыстырғанда әлемдік шаруашылықтағы қызмет көрсету саласының тез дамуына
ақпараттық технологиялар, тұрғын үй құрал – жабдықтары және жалпы құрал –
жабдықтар саласындағы қазіргі ғылыми – техникалық революция көпжоспарлы
әсер етті. Нәтижесінде жоғары дамыған шетел елдердегі материалдық
өндірістің ірі масштабты құрылымды – технологиялық қайта құрылуы оларда
қызмет көрсету саласы дамуының маңызды факторына айналды (2 – кесте).
Әлемдік экономикада соңғы онжылдықта қызмет көрсетудің халықаралық
саудасының мәні артуда. Қазіргі уақытта қызмет көрсетудің әлемдік экспорты
халықаралық айырбастың шамамен ¼ - ін құрайды. Бүгіннің өзінде қызмет
көрсетудің халықаралық саудасы өспелі түрде дамып, тауар айналымы өсімінің
қарқынынан артып жатқандықтан, бұл сала халықаралық ынтымақтастықтың басты
облысына айналады деп болжауға болады.
2-кесте - Дамыған шет елдердің макроэкономикалық көрсеткіштеріндегі
қызмет көрсету саласының үлесі (%)

Елдер Сауда, қонақ Көлік, байланыс, Несиелік – Әлеуметтік және Әлеуметтікті Барлығы
үйлер, қоғамдық қойма шаруашылығықаржылық, жеке қызметтер қосқандағы
тамақтану іскерлік, мемлекеттік
сақтандыру сетордың
қызметтері қызметтері

АҚШ
АҚШ

Қызмет көрсету саласының тез өсуінің басты себептерінің бірі, ең алдымен
әлемнің көптеген елдерінде экономика кемелденуінің жоғары дәрежесіне және
тұрғындар өмірінің жоғары деңгейіне қол жеткізілуінде. Индустриалды дамыған
елдердің тәжірибесі көрсеткендей, нарықтың тауарлармен толтырылу шамасына
қарай сұраныс ең алдымен қызмет көрсетулерге өседі. Компьютерлерді,
өнеркәсіптік роботтарды, өндірісті басқару мен жобалаудың толығымен
автоматтандырылған жүйелеріне жаппай енгізу нәтижесінде тірі еңбекке деген
өнеркәсіптік қажеттіліктері төмендейді. Босатылған жұмыс күші қызмет
көрсету саласына ауысады. Қызмет көрсету саласындағы жұмыс бастылар санының
өсімі байқалуда.
Американдық статистика берілгендері (Washington DC, 2005) негізінде
ұсынылған 1 – суреттен көрініп тұрғандай, қызмет көрсету саласы тез дамып
қана қоймай, сонымен қатар еңбек кадрларымен жұмыстарды ұйымдастыру
мәселелерін үнемі шешіп отыруы қажет. Кейбір тауарлар қызмет көрсету
саласының дамуынсыз тұтынушыға дейін жеткізіле алмайды, ал қызмет көрсету
саласы көбінесе тауарлардың өндірісісіз қызмет ете алмайды, яғни өндіріс
пен қызмет көрсету өзара байланысты. Сонымен қатар ауыл шаруашылығы
саласымен де осындай байланысты анықтауға болады.
Халық шаруашылығының әртүрлі салаларында Еуропа мен Оңтүстік-Шығыс Азия
мемлекеттеріндегі жұмыс орындары санының өсуі 1-суретте көрсетілген.

1-сурет - Өндіріс салаларында жұмыс бастылардың өсу қарқындары, %

Көптеген елдердің ішкі және сыртқы нарықтарындағы шаруашылық қызмет
саласында өзара тәуелсіз дамып келе жатқан және өзара әрекеттесетін
қызметтер ғана емес, сонымен қатар қызмет көрсетудің көп саны бар
екендігін ескере отырып, қызмет көрсету саласының кез – келген елдің
экономикасының дамуы үшін үлкен рөл атқаратындығын түсінуге болады.
Өндіруші және өңдеуші салалар дамуында айқын түрде артта қалып отырған
Қазақстан үшін қызмет көрсетулер тек экономиканы қайта қалпына келтірудің
негізі ғана емес, сонымен қатар тікелей инвестицияларды тартудың саласы
болуы мүмкін. Төмен сапасы немесе қандай да бір басқа бұзушылықтар кезінде
ұйымдастыру, айыппұл салуда жеңілдік, салықтар және преференциялар түрінде
көрсетілетін қызмет көрсету саласына елдегі мұқият назар аудару Қазақстан
үшін жалпы экономикалық дамудың көзі болуы мүмкін, өйткені тұрғындардың
жұмысбастылығының көбеюіне, оның жағдайының артуына, нарықтық өндіріс пен
тұтыну рухында қызметкерлерді оқытуға және т.б. септігін тигізеді.
Диссертациялық жұмыста айтылғандай, қызмет көрсетулердің халықаралық
айырбасының дамуының маңызды алғышарттарының бірі болып халықаралық еңбек
бөлінісінің негізінде халықаралық сауда байланыстары қарқындарының
жеделдеуі табылады: сауда көлемінің өсуімен бірге көлік тасымалдары да
артады, кемелер мен халықаралық көлік құралдарының басқа да түрлерін жөндеу
мен қызмет көрсету үшін төлемдер мен түсімдер көбейеді, экономикалық,
ғылыми – техникалық және мәдени байланыстар негізінде жекелеген мемлекеттер
арасындағы қатынастар белсенді болады.
Көлік бір жағынан-нарық саралынымы яғни тауарлар айырбасын нақты іске
асырушы және тұрғын халыққа қызмет көрсетуші, ал екінші жағынан-ол нарық
субъектісі ретінде тауарлармен жүргіншілерді тасымалдай отырып өз қызметін
сатады. Мұндай қызметті көліктің әрбір түрі әрқалай іске асыруы мүмкін және
осының нәтижесінде олар көлік нарығын қалыптастырады.
Көлік кешені құрамына темір жол, автомобильдік, әуе, өткізгіш құбырлар,
теңіз және өзен жолдарының қатынастары енетін, экономика инфрақұрылымын
қалыптастыратын салалардың бірі болып табылады.
Бүгінгі күні Қазақстанның көлік жүйесі бірыңғай еуразиялық көлік
желілерінің ажырамас құрамдаушысының бірі болып табылады.
Қазақстанның көлік кешенінің мемлекет экономикасында ең үлкен
интеграциялық маңызы бар. Елдің ЖІӨ-дегі көліктің үлесі соңғы жылдары 9 -
12% деңгейінде сақталып келеді.
Қазіргі уақытта ұлттық экономикадағы көлік кешені рөлінің тұрақты өсуі
байқалады. 90 жж – дың басында республиканың ЖІӨ - дегі көліктің үлесі 7% -
дан көп емес болды.
Қызмет көрсетулер экспортынан түсетін табыстың көп бөлігі көлік
қызметтеріне тиесілі. Қазақстандық кәсіпорындардың табыстары жүк тасымалы
қызметі есебінен түсетін түсімдер негізінен құралады. Ол 2007 жылы 1311
млн долларды құрады.
Республиканың көлік саласының жалпы сипаттамалары көрсеткендей, қайта
құру жылдарында көліктің барлық түрлері бойынша тасымалдар көлемінің арту
тенденциясы байқалады (2-сурет).

2 - сурет - Көлік түрлері бойынша жүк айналымы ( млрд. тонна-км)

Сонымен қатар, диссертациялық зерттеуде көрсетілгендей, жолаушы тасымалы
көлемінің өсуі автокөлікте, ал тасымалдардың төмендеуі теміржол көлігінде
байқалады. 2001 жылдан 2006 жылға дейінгі аралықта жолаушы тасымалы
автокөлікте 35% - ға көбейді, ал теміржол көлігінде олар 23% - ға дейін
төмендеді.
Көліктің барлық түрлерінің жолаушылар айналымы динамикасы келесі 3-
суретте көрсетілген.

3-сурет - Көліктің барлық түрлерінің жолаушылар айналымының динамикасы

Жолаушы тасымалы бойынша көліктік қызмет көрсетулер 2007 жылы 2000
жылмен салыстырғанда 48,4% пайызға артты, әуе көлігі бойынша 62%- ға және
темір жол көлігі бойынша жолаушы тасымалы 30,5% - ға өсті.
Диссертациялық жұмыста негізделгендей, республика аумағы арқылы темір
жол және құбыр көлігімен шетелдік жүк тасымалынан түсім 16,3% - ға артты,
Қазақстан жағының табысы көліктің басқа түрлерімен экспорттық тауарлар
тасымалы есебінен 25,5% - ға артты. Ресей газын Қазақстан аумағы арқылы
транзиттік тасымалдаудан табысы 2007 ж 604 млн долларды құрады, жүк
тасымалы бойынша қызметтер экспортында олардың үлесі- 46%.
Көліктің әртүрімен жүк тасымалдаудан Қазақстанның табысын құрастыру
келесі 3-кестеде көрсетілген.

3-кесте - Көлік түрлерімен жүк тасымалдары бойынша қызмет көрсетулер
экспорты мен импорты, млн АҚШ долл.

Көлік түрі Жылдар
2003 2004 2005 2006 2007
Экспорт 546,64 616,11 757,24 1113,78 1311,37
Автомобиль 46,8 66,8 79,8 134,8 170,4
Әуе 15,8 22,6 25,4 50,4 63,0
Теміржол 168,5 218,9 276,0 331,5 466,8
Құбыр 314,5 307,8 375,9 596,0 610,7
Теңіз (су) 0,04 0,01 0,09 1,17 0,43

Импорт 433,30 672,60 898,53 1207,68 1670,64
Автомобиль 154,6 237,7 322,2 438,8 607,2
Әуе 80,9 125,8 168,5 226,2 313,3
Теміржол 174,3 272,6 363,4 484,5 671,4
Құбыр 1,1 1,8 1,8 2,2 2,2
Теңіз (су) 22,4 34,7 42,6 55,9 76,6
Ескертпе - ҚР-ның Статистика жөніндегі агенттігінің берілгендері 2003-2007
жылдар бойынша

Диссертациялық жұмыста қарастырылғандай, ЕурАзЕҚ пен БЭК–тің (Бірыңғай
экономикалық кеңістік) интеграциялық бірліктері басымдылықтарының бірі
болып көлік қызметтерінің жалпы нарығының және бірегей көлік жүйесінің
қалыптасуы табылады. Көлік қызметтері саласындағы интеграциялық үрдістер
Қазақстанға сыртқы сауда айналымының 34,5% - ға артуын қамтамасыз етті,
соның ішінде ТМД елдерімен 14,4%. Минералды өнімдер (мұнай, газ, қазбалар)
экспортының үлес салмағы экспорттың жалпы көлемінен 73,8% - ға дейін өсті.
Тауарлар импорты Еуропалық монетарлық одақ елдерінен 18,4% - ға, Ресей
Федерациясынан 27% - ға өсті.
Ресейден импортталатын тауарлар құрылымы келесідей: аралық өнеркәсіптік
қолданыс тауарлары - 60%, инвестициялық тауарлар - 25%, тұтыну сферасының
тауарлары – 14,3%.
Тауарлар айналымының географиялық құрылымы келесілерден құралады: ТМД
елдеріне тауарлық айналымның 27%, Еуропа елдеріне 48%, азиялық елдерге -
17% келеді.
Көлік қызметтері халықаралық болып саналады, егерде олар тасымалдау
бағытының участоктарында сыртқы сатып алушы – елге және сатушы – елге
қатысты сыртқы саудалық жүктердің орын ауыстыруымен байланысты болса.
Жолаушылар мен жүктердің теңіз тасымалдары Халықаралық теңіз ұйымымен
(ИМО) реттеледі, ол жүк тасымалдары, технология, қоршаған орта, су
кемелері, теңізде іздеу мен құтқару, радиобайланыс, кадрларды дайындаудың
әртүрлі мәселелері бойынша ұсыныстар береді.
Халықаралық әуе азаматтық көліктің үлесіне әлемдегі барлық тұрақты әуе
тасымалдарының жалпы көлемінің 62% келеді. Әуе – жүк тасымалында және
жолаушы айналымында АҚШ, Германия, Ұлыбритания, Қытай, Жапония, Франция
және Ресей жетекші орынды алып отыр. Жолаушыларды, жүк пен багажды
тасымалдау екіжақты және көпжақты келісімдермен, сонымен қатар халықаралық
әуе тасымалдарына қатысты кейбір ережелердің унификациясы туралы Варшава
конвенциясымен реттеледі.
Халықаралық теміржол тасымалдары екі жақты және көп жақты келісімдер
негізінде жүзеге асырылады, оларға келісімнің қатысушы – мемлекеттерінің
сәйкес министрліктерімен қол қойылады.
Темір жол хаттамалары туралы әмбебап көпжақты келісімдер жүк тасымалдары
туралы Берн конвенциялары болып табылады.
Халықаралық ынтымақтастықтың кеңеюі мен интеграциялық үрдістердің
тереңдеуі жағдайында көлік мәселелерін шешудегі жетекші рөл халықаралық
көлік дәліздерінің жүйесіне тиесілі. Батыс пен Шығыс арасындағы көлік
байланыстарының басымды бағыттары он көлік дәліздерін құруда өз сипатына ие
болды, оның үшеуі (№1,2,9) Ресей Федерациясының территориясы арқылы өтеді.
Ғылыми зерттеу жұмысқа негізделгендей, көлік дәліздері бойынша жүктерді
мультимодальды тасымалдау әлемнің дамыған экономикалық аймақтарында кеңінен
қолданылатын көліктік қызмет көрсетудің салыстырмалы жаңа прогрессивті
нысаны болып табылады. Мультимодальды тасымалдар ұйымдастырушылық белгісі
бойынша унимодальдыға (бір немесе бірнеше тасымалдаушымен орындалатын
көліктің бір түрімен жүкті тасымалдау) және интермодальдыға (көліктің
бірнеше түрлерімен жүкті тасымалдау) бөлінеді. Мультимодальды тасымалдардың
жеке жағдайы, жинақталған (комбинированнные) тасымалдар болып табылады,
онда көліктің екі түрін ғана пайдаланады: стерженьді (темір жол, теңіз)
және автомобильді. Егер жинақталған тасымалдау бір бірегей құжатпен және
бірегей (сквозной) анықтамамен төленетін болса және бір оператордың
жауапкершілігімен орындалатын болса, мұндай жинақталған тасымалдау
мультимодальды тасымалдау деп аталады.
Республика шетел инвестицияларының есебінен мұнайды өңдеуді қырқынды
түрде өсіруде. Қазақстан Республикасы Үкіметі 2010 жылға қарай басымдылықты
тапсырма ретінде мұнайды және конденсатты күніне 2,0 млн. баррельге дейін
(жылына 100 млн. тонна), газды күніне 95,8 млн. м3 –ке дейін (жылына 35,0
млрд. м3) өңдеу деңгейін ұлғайтуды көздеп отыр (4–сурет).
Диссертациялық зерттеуде көрсетілгендей, бүгінгі күні Қазақстаннан
мұнайды экспорттайтын бағыттар Атырау – Самара мұнай құбыры, КТК, Қытай –
Қазақстан мұнай құбыры, Ақтау порты арқылы су көлігімен тасымалдау,
теміржол мұнай құю пункттері арқылы темір жол тасымалдары болып табылады.
Еліміздің газ тасымалдау желісі 10 мың шақырымнан асып, жалпы өткізу
қабілеті 190 млрд. текше метр болды. Мұнай құбырларының ұзындығы 7,4 мың
шақырымнан асып, өтетін мұнай көлемі 40 млн тоннаға жуықтады. ҚазТрансОйл
және ҚазТрансГаз компаниялары мұнай-газ ресурстарын әлемдік аса ірі
тасымалдаушылар қатарына кіреді.
Мұнай газ өңдеудің жедел артуы мұнай газ тасымалдайтын жаңа көлік
бағыттарын іске асыруды талап етеді. Осындай жобаланып жатқан және
қарастырылып отырған көліктік бағыттарға: Каспий теңізі арқылы Бакуға,
Супса порты арқылы Грузияға, Джейхан порты арқылы Түркияға, Батыс
Қазақстаннан Тарим бассейні арқылы Батыс Қытайға, Парсы шығанағы арқылы
Иранның ашық теңіз терминалына шығатын Транскаспийлік маршрут; Ауғанстан
мен Пәкістан арқылы Аравия теңізіне шығатын Орта – Азия мұнай құбырының
Жобасы, Түркіменстаннан Еуропаға Каспий теңізі жағалауын бойлай газқұбыры
т.б. жатқызуға болады.

4-сурет ... жалғасы

Сіз бұл жұмысты біздің қосымшамыз арқылы толығымен тегін көре аласыз.