Майлы бояумен көктем көрінісін салу

Жұмыс түрі: Материал
Тегін: Антиплагиат
Көлемі: 55 бет
Таңдаулыға:

МАЗМҰНЫ

КІРІСПЕ . . . 8-10

І. 8-9 СЫНЫП ОҚУШЫЛАРЫНА ФАКУЛЬТАТИВТІК САБАҚТА МАЙЛЫ БОЯУМЕН СУРЕТ САЛУДЫҢ ӘДІС-ТӘСІЛДЕРІН ҮЙРЕТУ

1. 1. Майлы бояумен сурет салудың әдіс-тәсілдері . . . 11-18

1. 2. Майлы бояумен көктем көрінісін салу . . . 19-20

ІІ. КӨНЕ ЕУРОПА БЕЙНЕЛЕУ ӨНЕРІ

2. 1. Италия . . . 21-26

2. 2. Испания . . . 17-24

2. 3. Франция . . . 27-34

ІІІ. РЕСЕЙ БЕЙНЕЛЕУ ӨНЕРІ

3. 1. Крамской . . . 35-46

3. 2. Е. Репин, И. И. Шишкин . . . 48-49

3. 3. А. К. Саврасов, В. А. Серов, И. И. Левитан . . . 50-53

ІV. ХХ ҒАСЫРДАҒЫ ҚЫЛҚАЛАМ ШЕБЕРЛЕРІ

4. 1. Кеңес дәуірі . . . 54-59

4. 2. Қ. Т. Телжанов, С. Ә. Мәмбеев, М. С. Кембаев, Таңсықбаев . . . 60-61

4. 3. С. А. Айтбаев, И. Н. Исабаев, М. М. Қисамединов, Б. Х. Тәбиев . . . 62-65

Қорытынды . . . 66

Пайдаланылған әдебиеттер . . . 67

Қосымшалар . . . 68

КІРІСПЕ

Көкейтестілігі: Кешегі өткен ата бабаларымыздың мол мұрасымен сусындатып, олардың рухани қазына-еңбектерімен бүгінгі жас ұрпақты таныстыру бүгінгі күндегі ұстаздардың алдындағы зор міндет десек, білім мен тәрбие бұлағы мектеп қабырғасынан басталатын бүгінгі мектеп оқушыларын бейнелеу сабағында талантты суретшілермен таныстырумен қатар, олардың бойында елжандылық, еңбексүйгішті қасиеттерін, сезімдерін қалыптастыру маңыздылығы туындайды.

«Өнер» - мәдениеттің айнасы деп бекерде бекер айтылмаған. Ол мәдениеттің жаны, оның өзіндік танымының түрі. Сұлулық заңы бойынша адамның дүниені игеру барысында әдеби мәтіндерге, мүсінге, сәулет туындыларына, суреттерге, әуенге, биге және тағы сол сияқты негізделген өнер түрлері қалыптасады.

Өнер деп адамның рухани болмысына, сезіміне, эмоциясына әсер етіп, оны толғандыратын суреткер қолынан шыққан шығармашылық үлгісін айтамыз. Өнер - адами ақиқат, адамдандырылған «екінші әлем». Өнер, көркем бейне және жасампаздық тікелей әлеуметтік адам тұлғасымен байланысты категориялар.

Өнерде үйлесімділік ретінде танылған кемелділік бейнесі жасалады. Өнер арқылы адамның әмбебаптылығы ашылады. Өнер адамның шексіз болмыстық сұрақтарына жауап табуға талпыныс барысында гуманистік принциптерді қалыптастырады. Нәтижесінде, өнер тек белгілі бір қоғамның даму нәтижелерін көрнекілеп қана қоймай, сонымен қатар, әлеуметтік-рухани өмірдің күйіне әсер ететіндігін білдіреді.

Өнердің жекелеген түрлерін және олардың бір-бірінен ерекшеліктерін білу, ажырату адамзатты көнеден бері толғандырып келеді.

Бейнелеу өнері - дүниені көзбен көріп түйсіну негізінде бейнелейтін пластикалық өнердің бір саласы.

Өнердің қоғамдық тәрбиелік мәнін жан жақты түсіну үшін - оның әсемдік, әдемілік заңдарын жақсы түсіну шарт. Сондықтан біз халық өнерін айнала қоршаған әдемілікті, сұлулықты жете түсініп, сүйуіміз керек, өнердің тылсым ғажайып сырларын ашып, оны үйренуіміз қәжет.

Өнердің сан алуан түрі бар. Олардың барлығы халыққа қызмет етеді. Өнерді бағалаушы да, қолдаушы да, жасаушы да, жоюшы да - халықтың өзі.

Пейзаж - табиғатқа қарап отырып, айнытпай сурет салу емес, оның мағынасын ашу, шебердің ойын, сезімдерін, көңіл күйін беру. Табиғат еш уақытта өзгерген емес. Мыңдаған жылдар бойы сол бейнесінде қалып отырады. Тек суретші оны уақытына қарай бейнелеуі мүмкін. Әр ғасырда әр суретші оны өзінше түсініп, өмір сүрген уақытына қарай, сол уақыттың қоғамдық құрылысына байланысты бейнелеген.

Нағыз суретші ауыл табиғатын жазған сайын, оның Отанға, еліне деген сүйіспеншілігі арта түседі. Адамзат өмірінде «өнер» атауы саналылығымен, көркемдік ойлаумен ерекшеленеді. Адамзат өмірінде өнер деген жалпы ұғым болса, ал «көркем өнер» атауы өнерден рухани, эстетикалық көркемдік пен жоғары мәдениетті талап етеді.

Кескіндеме - бейнелеу өнерінің ең толысқан түрі. Онда көптеген құралдар қолданылады. Әр суретшінің өзіндік бейімі таңдаған жолы бар. Біреулері натюрморт жазуға, екіншісі портрет, үшіншісі пейзаж жазуға, төртіншісі әр түрлі тарихи тақырыпты, тұрмыстық көріністерді, т. б. жазуға құмар. Суретші өзі қалаған, сүйген тақырыптарды қалап алады. Бейнелеу өнерінде бұлай бөліну жанр деп аталады. Жанрлар: натюрморт, пейзаж, портрет, жанрлық кертиналар болып бөлінеді.

Бүгінгі қоғамдағы жаһандандыру үрдісінде жастарды жалпы адамзаттық құндылықтармен қаруландыратын Қазақстан Республикасының Президенті Н. Ә. Назарбаевтың Қазақстан халқына арнаған биылғы Жолдауында: «2020 жылға қарай біз оқытудың 12 жылдық моделіне толықтай көшетін боламыз. Ол үшін біз 2015 жылға қарай республикалық бюджет қаржысы есебінен кемінде екі жүз мектеп салып, осынша мектепті жергілікті бюджет есебінен тұрғызамыз. 2015 жылға қарай білім беру ұйымдарының 50 пайызы электронды оқытуды пайдаланып, 2020 жылға қарай оның саны 90 пайызға дейін артады. 2020 жылға қарай халықаралық стандарттар бойынша тәуелсіз ұлттық аккредітациялаудан өткен ЖОО-лар үлесі 30 пайызды құрайтын болады. Инновациялық қызметті жүзеге асыратын және ғылыми зерттеулердің нәтижелерін өндіріске енгізетін жоо-лардың үлесі 5 пайызға дейін артады. Кемінде 2 жоғары оқу орны үздік әлемдік университеттер рейтингінде аталатын болады. Сапалы білім беру Қазақстанның және инновациялық дамуының негізіне айналуы тиіс»- деген болатын.

Мақсаты: Мектеп оқушыларын танымал талантты суретшілердің туындыларымен, еңбектерімен таныстыру.

Міндеті: Қылқалам шеберлерінің әрқайсысының сурет салу техникасымен таныстыра отырып, олардың әдіс-тәсілдерін жаңаша көзқараста меңгерту.

Жаңалығы: Мектеп оқушыларын тек сабақ жүйесінде ғана емес, сабақтан тыс факультатив сабақтарында олардың майлы бояумен сурет салу барысында танымал суретшілердің әдіс-тәсілдерін меңгере отырып, табиғат көрінісін салуда өздерінің шығармашылық қабілеттерін жетілдірумен қатар, іскерлік қасиеттерін шыңдау.

Іс-тәжірибелік тиімділігі: Қазақстанның танымал қылқалам шеберлерінің шығармаларымен, туындыларымен мектеп оқушыларына мағлұмат бере отырып, оқушылардың бойында эстетикалық талғамдарын қалыптастыруда, өнерге деген қызығушылығын арттыру мақсатында сабақ жүйесінде негізгі тақырып ретінде қолдануға болады.

І. 8-9 СЫНЫП ОҚУШЫЛАРЫНА ФАКУЛЬТАТИВТІК САБАҚТА МАЙЛЫ БОЯУМЕН СУРЕТ САЛУДЫҢ ӘДІС-ТӘСІЛДЕРІН ҮЙРЕТУ

Майлы боямен сурет салудың әдіс-тәсілдері

Қазақстанның ХХ ғасырдағы бейнелеушілік өнері 3-ші мыңжылдыққа парасаттылық және рухани толысқан түрде аяқ басты. Онда қазақтың көшпенділік мәдениетінің ежелгі тамырлары мәнін тапқан және түсіндірілген. Сол айтылған мәдениетке сай негізгі қаланған жалпы адамзаттық құндылықтардың заман суретшілері дүниежүзі өнеріндегі әдептер және жаңа бағыттар арқылы, ХХ ғасырдың философия мен мәдениетіндегі ірі ағымдары арқылы өз шығармаларында ашып көрсетеді. Соның қорытындысы ретінде, инновациялар негізінде бір ғасыр бұрын пайда болған бүгінгі қазақ өнері рухани ерекшеліктерін жоғалтпау мен қатар, соған сай қайталанбас пластикалық өнер тілін қалыптастырды. Мүмкін сол себепті болар, нақты көріністердің сан алуан қырға ие болуымен бірге, Қазақстан өнері танымал қасиеттерімен де ерекшеленеді. Олар: тұрмыстың экзистенциалдық мәселелерін қатысты мүдделер; үйлесімділіктің адам мен табиғаттың бірлесе өмір сүруінің негізі; творчестволық көзқарастардың кең ауқымды болуы; ұлттық мәдени әдет-ғұрыптар, мұраларының шектеулілігі; дүниежүзілік мәдени кеңістікке ерікті түрде енуі.

Суретші өзінің ойы мен сезімін толық таныту жолында, тек қана өзіне қажеттілерін екшеп алуда, яки толық қанды тұтас образдарды жасау жолында ұзақ дайындықтан өтті. Ол барлық бейнелеу әдіс - тәсілдерін жете меңгере отырып, кенепке немесе ақ қағазға салған әрбір бояудың түрін жігерлендіруші қуатты күшті айналдыра білді. Ол бір мезгілде өнердің міндете - көзге көрінген нәрсенің бәрін жазып ала бермей, ең алдымен - шындықты дұрыс және терең түсіну, зат пен құбылыстың құпия сырларын жете ұғыну, сыртқы жалған көрініске құр еліктемей, оның ішкі әлемі, сезімін, ойын көре білу және оны бейнелеу өнерінің әр уақытта қолынан түспейтін, әрқашанда құлапта сақтайтын құралдармен дәл жеткізу қажеттігін жүрегімен ұғынды. Себебі, суретші алғашқы бояу жаққаннан-ақ, одан кейінгілерінде де салған суреттерін үнемі шындыққа жанаса ма және оған өзінің көзқарасы үйлесе ме деген жалғыз дара форманы тауып алғанға дейін кедергілергекездесе береді ғой. Әрине, бояу жағылған сайын формада жетіле береді, мазмұны да жақсара түседі. Суретшінің ойы мен сезімі заттың мәнісіне терең үңілген сайын, оның жеткен шегіне, сырт көрінісіне қанағаттануға тура келеді. Ал, егер салған туындысына көңілі толмай одан әрі іздене түссе, ілгері қарай жетілдіре берсе, тіпті жақсы, себебі іздену үстінде жоғын табады, машықтанады. Ал, болмысты творчестволық тұрғыдан меңгере берудің тіпті де шегі жоқ қой. Басқалардың творчестосынан үнемі үйреніп және қадағалап отыру суретшінің өзін-өзі сезінуіне және өз еңбегіне сырт көзбен қарай білуіне көмектеседі. Сондай-ақ, суретші өз өнерін басқалардың творчествосымен салыстыра бақылап, оны суреткердің қоғамдық міндетімен, мән-мағына туралы жалпы ұғыммен байланыстыра қарай алуы қажет.

Қазіргі таңдағы қоғамдағы басты мақсаттарының бірі адамды жан-жақты тарбиелеу және гармониялы дамыту. Мұнда этика-эстетика тәрбиесі басты міндет атқарады. Эстетикалық тәрбие жеке адам дамуында үлкен міндет атқарады және қазіргі кезде өте күрделі үдеріс деп саналады. Біздің қазіргі тандауда атқарып отырган жұмыстарымызда осы.

Сурет өнері оқушылардың сана-сезіміне көркем құндылықты қалыптастыру, бейнелеу өнеріне деген қызығушылықты, әдемілікті таныта білуді өз алдына мақсат етіп қояды. Ал пейзаж тақырыбына мектеп бағдарламасында үлкен орын бөлінген. Ол оқушыларға эстетикалық тәрбие береді, өйткені пейзаж адамның туған жеріне, табиғатқа, қоршаған ортаға деген сүйіспеншілігін арттырады. Пейзаж елінді сүюге, табиғатты қорғауға, әдемілікті түсінуге үйретеді.

Міндетті түрде адам мен табиғаттың бойындағы сұлулықты сезініп түсінуге мүмкіндік туғызатын бірден-бір тәрбиелі ата-ана, мұғалімдер болатын болса, әсіресе ұлттық нақыштарға суретшілерімен жоғары деңгейде өтетін практикалық білім берумен бірге қызықты да тартымды етіп өткізсе, оқушының сабаққа деген ынтасы, сұлулыққа деген сұранымы жоғары болады. Ол үшін бүгінгі қүннің қиыншылығын уақытша екенін түсінген бүгінгі техникалар мен материалдардың барлық мүмкіндіктерін алған, жан-жақты пайымдай алатын мұғалім керек. Болашақ ұрпақты көркемөнерге бейімдеу, еңбекке баулуга, жан азығын молайтуға, қабілеттерімен іскерлігін жетілдіретін ұстазды нағыз ағартушы мұғалім деп атай аламыз.

Адам баласы өмір бойы ізденіс үстінде жүріп, осыдан бес ғасыр бұрын алғаш рет майлы бояуды ойлап тапты. Қанша уақыт өтсе де сол кездерде салынған суреттердің біздің уақытымызға дейін өзінің түр-түсін өзгерпей, әдемілігімен сол қалпында сақталып келе жатқандығы таңғажайып жағдай.

Кескіндеменің ішінде ең күрделісі майлы бояумен жұмыс істеу екені белгілі. Сол себептен де ең алдымен майлы бояудың технологиясы мен техникасын білмей жатып сурет салу мүмкін емес.

Кенепке қалай сурет салуға болатынын кез келген жас суретші білуге міндетті. Ең алдымен кенепті жақтауға тартқан кезде оны сулауға болмайды. Судың әсерінен кенепағы желім қосылған төсеніш ыдырап, өзінің сапасын жоғалтады. Су майлы бояудың бір-біріне жақындайтын құрамдарын әлсіретіп, оның кенепқа сіңіп кетуіне әсер етеді. Сол үшін кенепті кергенде арнаулы тістеуік пен степлер пайдаланған жөн. [11; 15-16б]

Майлы бояумен жұмыс істегенде картон, сызу қағаздары, кенеп пайдаланады. Кептіргіштің ағаштары мықты, сүргіленген, кепкен болуы керек. Кенеп тартатын жағының бір шеті сүргіленіп алынғаны дұрыс. Кенепті кергенде іш жағынан 4см. кейін басы бар шегемен қаққан жөн. Кергенде арнаулы құралдар немесе кемпірауыз қолдану керек. Жұмыс жасайтын материал картон, кенеп күні бұрын дайындалып, грунт(төсем) жасауды қажет етеді. Төсемді әр түрлі жолмен жасайды. Желім, май толтырғыш. Яғни, төсемді желім немесе эмульсия деп екіге бөледі. Желім грунтына желім, желатин, мүсәтір спирті, ақ бор, эмульсия, желім бор қосады.

Төсенішке байланысты кенептің сапалы жағы кәрінеді. Оған пайдаланылатын желімнің түрлеріне де көп байланысты. Суретші сол себептен қандай желімнің құрамында не болуы керек екенін білуге міндетті. Ең жақсы желім «балық желімі» (осетра, белуен) . Балық желімінің үстіне су құйып, 12 сағат ұстайды. Кейін суды төгіп тастап, ісінген желімнің үстіне 15 бөлік су құяды. Су мен желімді араластырып, оттың үстіне қойып қыздырады. Бірақ қайнауға дейін жеткізбеу керек. Ең дұрысы су құйылған ыдысқа желім араластырған ыдысты қойып қыздырған дұрыс. Желім дайын болған соң дәке арқылы желімді сүзіп, дайындайды.

Ақ желатин (ас желатині, фото-желатин) ең жақсы желім есебінде төсенішке пайдаланылады. Су құйып, ісінгеннен кейін сол сумен отқа қойып, қайнату керек (1 бөлік, 15 бөлік су құяды) . Ағаш желімін басқа желім жоқтықтан амал жоқтан пайдаланылады (1 бөлік, 20 бөлік су) .

Казеин желімін пайдаланып, төсеніш жасауға болады. Оны дайындауға белогы бар зат қосылады. Бұл желім майлы бояумен жұмыс істеуге өте тиімді. Желімді мұздай не ыстық суда еріте алмайсың. Ол үшін құрамын нашатыр спиртін қосу керек (1 бөлік, 15 бөлік су 0, 4 нашатыр-спирті) . Содан кейін жақсылап араластырып, су құйылған ыдысқа салып ысытады. Бірақ қайнатпау керек. Дәке арқылы жақсылап сүзіп, жұмысқа пайдалануға болады.

Дайындалған желім флейц арқылы кенептің үстіне жағылады. Бірінші қабат жағылған желім кепкеннен кейін екінші рет желім мастихинмен жағылады. Бірінші жағылған желім жіптерді жабады. Кенеп кеуіп болған соң оның кейбір жерлерінен жіп және басқа заттардың шығуы мүмкін. Оны тазалау үшін ысқыш қағаз, зімпара қағазы қолданылады. Бірақ кенепті құртып алмас үшін өте сақ болуды талап етеді. Кейін щаңсорғышпен немесе киім тазалайтын щеткамен қалған жерлерді тазалап, екінші рет желім жағу керек. Көбіне, екі рет қайтара боялған желім жеткілікті. Кенептің тесіктері кәрінбей, жақсы жағылуы тиіс. Артық желім жағып, қою желім жасамаған дұрыс. Жақсы, дұрыс жасалған төсеніш кенептің фактурасын бұзбайды. Кептіру үшін бөлменің ішінде кептірген дұрыс. Пешке қойып тез кептіруге тырыспаған жөн. Себебі желімнің жұқа қабығы жарылып, жұмыс зая кетеді. Желім жағылған кенеп кепкеннен кейін арнаулы дайындалған төсеніш жағылады. Үйде дайындалатын төсеніштердің неше түрлері болады. Ең жеңілі желім төсеніш. Төсеніш желімді дайындағандай глицерин және пентахлорфенолят натрий қосады. Төрт немесе алты бөліктен мырыштық ақ бояуды біртіндеп желімнің қосындысына қосады. Арнаулы араластыратын ағашпен қосындыны жақсылап араластырып, қою қорытындыны (төсеніш) дайындайды. Ал бояудың ұнтағы болмауы керек. Төсеніш фленцпен болмаса щеткамен жағылып, тегістеледі. Бірінші төсеніш кепкеннен кейін екінші қайтара жағылады.

Желімді төсеніш қарапайым, кемшілігі майлы бояумен жұмыс істегенде, құрамындағы майды сорып алып, жұмыс күңгірт тартуы мүмкін. Кейінгі кездерде эмульциялық төсеніш көп пайдаланылып жүр. Ол өте тиімді. Эмульциялық төсеніш жасау, өте күрделі, дайындығы қиын жұмыстырдың бірі. Бұл төсенішті дайындау үшін желім қорытындысын қыздырып, жылы қалыпқа келтіру керек. Содан кейін қосындыны жақсы араластырып, бір жұмыртқаның сары уызын қосады. Қосындыны жақсылап араластырып, қою түрге айналдырып барып, оған әбден ұнтақталған бор, ақ бояу немесе гуаш, темпера қосады. Осылай дайындалған төсенішті жылытып, кенептің бетіне жағады. Бірінші жағылған төсеніш кепкеннен кейін, екінші, үшінші қайтара жағып, кенептің бетін тегістейді. Төсенішті екі не төрт апта жақсы желдетілген, сыз емес бөлмеде ұстайды. Жаңа бастап жүрген жас талапкер төсеніш жасаудың жеңіл түрін үйренгені дұрыс. Ағаш желіміне үгітілген борды қосып, араластырып, оған қорғасынды-мырыш ақ бояуын қосады. Дөңгелек қылқаламды алып, араластыру арқылы біріккен қосындыны алады. Егер ақ бояуды көп алып қойса, скипидар қосып араластыру ұсынылады. Осы төсенішпен екі қайтара желім жағылған кенептің бетін тегістейді. Төсеніш толық кепкеннен кейін екі ай ұстау керек. Төсеніш кескіндеменің ең керек құрамы. Ол сапалы болып шықпай, еш уақытта жұмыс жақсы жағынан кәрінбейді. Кенеп өте сапалы болып, төсем өзінің рецептімен жасалса, кенеп көп жылға шыдайды.

Майлы бояумен жұмыс істегенде, бояуды үйлестіргіш заттар: зығыр, жаңғақ, көкнәр майы. Бұл бояудың көптеген құнды жақтары бар. Біріншіден оңай ериді, әрі қалың, қою етіп жағуға қолайлы. Жұқа жаққанда астыңғы бояуы кәрініп тұрады. Кепкен кезде түс-реңін өзгертпейді. Майлы бояумен салынған картиналарға кепкеннен кейін, бояудың ашықтығын арттыру үшін лак жағады. Лак шыныға ұқсайтын жұқа, мөлдір қабыршық құрайды. Пайдаланатын лактар: мастика, даммара, акрил-пісте. Лакты қылқаламмен не бүріккішпен жағады. Жұмыстың бетіне жағылатын фисталикті, акрил-фисталикті, ретушты лактар қалың жағылған бояу сіңіріп, түрін жоғалтпас үшін пайдаланылады.

Қазір өндірісте шығарылатын майлы бояулар зығыр майына ерітіледі. Біртіндеп сары түрге ауысады. Бұндай әсіресе ашық бояуларда көрінеді. Сондықтан кейінгі кездерде пентамасляндық бояулар шығарыла бастады. Олар ақ мырышты, қорғасынды, марганец-кадмийлік боялар. Жасыл алтын, жасыл марганец, көк кобальт, жасыл ашық кобальт, жасыл қою (суық) хром - жасыл көк кобальт, жасыл-көк хром-кобальт. Эскиз бояулар эскиз жасауға, дайындық жұмыстарға пайдаланылады. Құтыдағы жұлдыздар нені білдіреді? Бұл жұлдыздар бояудың құрамындағы түрлі-түстің мықтылығын көрсетеді. Мысалы үш жұлдызды - жоғары сапалы бояу. Екі жұлдызды - орташа сапалы бояу. Бір жұлдызды - төмен сапалы бояу болып есептелінеді. Сонымен қатар сыртында бояудың қай уақытта шығарылғаны жазылады. Негізінде майлы бояудың өзінің уақыты үш жыл. Сол себептен бояуды сатып алар кезде осы қасиеттерін есте ұстағнымыз жөн.

Еріткіш қоспалар өзінің атқаратын міндеттеріне байланысты бірнеше түрлерге бөлінеді. Атап айтар болсақ бірінші қоспа эскиздік майлы бояумен жұмыс істегенде, театр декорациясын жасағанда, сәндік жұмыстарда қолданылады. Екінші қоспаның құрамында уайт-спирит болғандықтан эскиздік майлы бояуды ерітуге, кисті мен палитраны жууға пайдаланылады. Тағы бір қоспаны майлы бояу мен лактарды ерітуге пайдалануға болады. Себебі ол бояуға қосқанда сарғыштанады. Бірақ бір кемшілігі бояуды жылтыр өңінен айырады. Бояуларды аузын жауып ұстау керек.

Кескіндемемен жұмыс істегенде әр түрлі қылқаламдар пайдаланылады. Қылқаламның жалпақ болғаны дұрыс. Ұсақ бөліктерін жасағанда жіңішке, жұмсақ қылқаламды қолданады. Сонымен қатар жұмыс істегенде бірнеше қылқаламды әр бояуға жеке-жеке пайдаланған дұрыс. Жұмыс аяқталғаннан кейін қылқаламды сабынмен, кір жуғыш ұнтақпен, бояуы кеткенше жуып, тазалап, керосин құйылған ыдыста ұстау қажет. Қылы ыдыстың түбіне тимеуі керек. Жұмыс істейтің құралдың әр уақытта таза болғаны дұрыс.

Суретшінің жұмыс істер кезде пайдаланатын құралының бірі - палитра. Палитра жұқа тақтайдан жасалатын, арасына бес бармақ сиятындай етіп жасалатын жұмыс құралы. Палитра бояудың майын сорып алмас үшін олифті жақсылап сіңіріп, кептіреді. Жұмыс істеуге ыңғайлы болуы үшін палитра тәр бұрышты немесе доңғалақ болып келеді. Әр суретшінің өз палитрасы болады. Палитрадағы бояуларды пайдалану арқылы олар өнер туындыларын жасайды. Жұмыс аяқталғаннан соң бояудың қалдығын мастикамен тазалайды. Жұмыс құралдарының қатарына мастика мен масленка жатады. Мастиканы майлы бояуды қалың жағу үшін пайдаланады.

Суретші палитрасы жұмыс істейтін тақта емес, болашақ туындысына пайдаланар бояулары. Суретші палитрасы әр түрлі болады. Әркім әр түрлі бояуларды пайдаланады. Біреуі 10-15 бояу, кейбіреуі одан да көп түрін пайдалануы мүмкін.

Жас суретші жұмыс бастардың алдында бояуларды қалай пайдалану керектігін жақсы игере білу керек. Әр бояудың өзіндік ерекшеліктерімен жетік танысқаны дұрыс. Алғашқы кездерде ақ бояулардан, ашық охрадан және күйдірілген сүйектен тұратын палитрадан бастаған жөн. Біраз жаттыққаннанкейін, бояудың екі түрін қоса отырып, жұмысты жалғастыруға болады. Осындай ерінбей жұмыс істеудің нәтижесінде көп нәрсеге қол жеткізуге болады. Сонымен қатар әр бояудың ерекшеліктерін жақсы түсінеміз.

... жалғасы

Сіз бұл жұмысты біздің қосымшамыз арқылы толығымен тегін көре аласыз.