Салауатты отбасы

Өзiн-өзi тану сабағының жоспары
Мектеп: Шымкент қаласындағы физика-математика бағытындағы Назарбаев Зияткерлік мектебі / Созақ мектеп-гимназиясы
Мерзiм: 13.12.2016 №15 сабақ
Тақырып: Салауатты отбасы
Құндылық: сүйіспеншілік Қасиеттер: мәдениеттілік, жауапкершілік, сыйластық.
Мұғалiм: Куандыкова А.К./Азибаева Б.Қ Класс: 2 Оқушылар саны: 20
Сабақтың түрі: командалық
Сабақтың мақсаты: оқушыларға салауатты отбасы туралы түсіндіре отырып, сүйіспеншілік құндылығының мәнін ашу.

Міндеттері:
- салауатты отбасы туралы түсініктерін жетілдіру;
- кешірімділік, қамқорлық, бауырмалдық қасиеттерін дамыту;
- жаныңда жүрген жақын адамдарды сыйлай, қадірлей білуге тәрбиелеу.
Ресурстар: (құралдар, мәлiметтер) И.Крутой <<Мелодия для души>> mp3
"Мама" әні мр4

Сабақтың барысы:
1. Ұйымдастыру кезеңi. Тыныштық сәтi (3 мин)
Тыныштық сәтi. Су асты патшалығына ойша саяхат (Қосымша 1).
Сабақ барысын талқылау:
2. Әңгімелесу (5 мин) Мұғалім 1

Мұғалім төмендегі сұрақтар бойынша пікір алмасу жүргізеді және өзі қорытындылайды:
1. Отбасы жылулығы мен саулығы кімге және неге байланысты деп ойлайсыңдар?
2. Салауатты отбасы дегенді қалай түсінесіңдер? Отбасы салауатты болу үшін тек олардың денсаулығы ғана мықты болуы керек па?
3. Өз отбасыларыңды салауатты отбасы деп санайсыңдар ма?
Әңгімелесу сұрақтары арқылы оқушылар бір-бірімен пікір алмасады және жаңа сабаққа бағыттауға мүмкіндік береді
3. Дәйексөз (2 мин)
Сабақтың дәйексөзі ретінде қазақ мақалы қолданылады.
Бір адам жаққан отқа,
жүз адам жылынады.
Мұғалім оқушыларға дәйексөздің мағынасын түсіндіреді, туындаған сұрақтарға жауап береді
4. Мұғалімнің сыйы (15 мин) Мұғалім 2

Оқушылардың танымдық белсенділігі мен іскерлік әрекеттерін дамытып, олардың өзіндік пікірін дамыту мақсатында мұғалім оқулықта берілген "Бақытты отбасының сыры" және "Жаның жеті жаманнан аман болсын" атты мәтіндерін интонациялық кідірістерді ескере отырып, мұғалім өзі оқып береді.

Тақырыптың мазмұнын ашатын сұрақтар қойып, оқушылардың жауаптарын толықтырып, мұғалім мәтіндегі негізгі құндылықтарды атап өтеді
5. Топтық жұмыс (10 мин)
Оқушылардың айнала қоршаған ортаға, адамдарға түсіністікпен қарауға, өздерін өзгелердің орнына қоя білуге үйрету, жақындарына құрмет, жанашырлық сезімдерін, сыни ойлау дағдыларын дамыту мақсатында оқулықтағы жағдаятты шешу шешу ұсынылады (Қосымша 2).
Топтық, ауызша жүргізілетін тапсырма
6. Топпен ән айту (3 мин)
Топпен "Мама" әнін бейнебаянның көмегімен орындау.

7. Дәптермен жұмыс (5 мин)
Оқушы дәптеріндегі 1 және 2 тапсырманы мұғалімнің нұсқауымен оқушылар жеке, өз беттерінше орындайды.
Оқушы дәптері
2 сынып
8. Үй тапсырмасы (1 мин)
Оқушы дәптеріндегі 3-4 тапсырма және оқулықтағы мәтінді оқу беріледі.
Оқушылар үй тапсырмасын күнделікке және дәптерлеріне белгілеп алады
9. Соңғы тыныштық сәтi (1 мин) Соңғы тыныштық сәтінде И.Крутойдың <<Музыка для души>> бейне баянының көмегімен жүргіземіз.

Қосымша 1
Тыныштық сәтi. Су асты патшалығына ойша саяхат. (Оқушылардан еркін отыруды, қолдарын тізесіне немесе үстел үстіне қоюды, аяқтарын айқастырмауды өтініңіз. Арқаларын тік ұстауын қадағалаңыз. Жайлы, баяу музыка қойыңыз).
Мұғалім: Көзіңізді жұмыңыз және бірнеше рет терең тыныстаңыз. Денеңізді босатыңыз. Бірнеше секундтан соң теңіз түбіне саяхат жасаймыз.
Теңіз жағасымен келе жатқаныңызды елестетіңіз. Толқындардың жеңіл шалпылына, шағалалардың шуылына құлақ түріңіз. Жалаң аяқтарыңызбен құмды сезініңіз. Шалғайдан қара нүкте көріп тұрсыз: ол жақындаған кезде дельфин екенін түсіндіңіз. Ол сізді теңіз түбіне алып кету үшін келді. Ол өте әдепті, сізді шыдамдылықпен күтіп тұр. Жайлап оның арқасына отырыңыз, мықтап ұстап, жолға шығыңыз. Дельфиннің арқасында жайланып отырып, өзіңді қауіпсіз сезіну, су астында жүзу қандай керемет. Жан-жағыңызға қараңыз: мұнда кемпірқосақ тәрізді арлы-берлі жарқырай қалқыған әсем балықтар қаншама. Теңіз түбіне бойлаған сайын айнала қалайша өзгереді, суда тербелген қаншама ғажайып балдырлар. Қараңызшы, қандай орасан зор балықтар, ал енді анау жаққа көз тастаңыз... бұл орасан зор сегізаяқ. Су асты неткен қызықты әрі ғажап әлем. Сіз бір нәрсені байқадыңыз ба? Мұнда неткен тұңғиық, толық тыныштық. Осы тыныштық күйде болыңыз.(Мұғалім бірнеше секунд үнсіз қалады).
Ал қазір жоғарыға, өз әлемімізге кері қайтуға дайындалыңыз. Айналаға жіті қараңыз. Ғажап түстерге тағы бір рет қараңыз және тыныштыққа құлақ түріңіз. Осындай тыныштық сізге самалдай әсер береді. Енді дельфин кері қарай жолға шықты. Сіз су бетіне шықтыңыз, жағаға жақындадыңыз. Дельфиннің арқасынан түсіңіз, оны сипалаңыз және осындай ғажап саяхатқа апарғаны үшін ризашылық білдіріңіз.
Сыныпқа оралыңыз және өз орныңызға келіңіз. Бірнеше секундтан соң көзіңізді ашыңыз, осы түйсінген тыныштықты өз бойыңызда сақтауға тырысыңыз.

Қосымша 2

1-топ. Жағдаят:
Саят өз ата-анасын басқа балалардың ата-аналарымен көп салыстырады. Кейде Саят өз ата-анасы басқалардікіндей емес сияқты болып, оларға ренішпен қарайтын болды.

- Саяттың іс-әрекеті дұрыс па?
- Саятқа қандай кеңес берер едіңдер?
- Жағдаятты шешу жолын беріңіздер?

2-топ.
Айнұрдың әке-шешесі күні бойы жұмыста. 2-сыныпта оқитын Айнұр әжесімен бірге қалатын. Әжесі Айнұрға ылғи да үйдің тазалығын сақтау оның міндеті екенін айтып отыратын. Әжесінің бұл ақылын Айнұр түсінбейтін...

- Айнұр неліктен әжесінің ақылын түсінбеді?
- Үйдің таза болуы неге байланысты деп ойлайсыңдар?
- Жағдаятты қалай аяқтар едіңіздер?

3-топ.
Қарт атай аулаға алма ағашын отырғызып жатыр. Екі немересі аулада асыр салып ойнап жүр. Атай ағашты отырғызып біткенше маңдайынан шүмектептер ағып, шаршап қалды. Атасы демалуға отырғаны сол еді, үлкен немересі жүгіріп келіп, атасының шаршаңқы жүзіне қарап:
- Ата несіне әуре болдыңыз, сізге оның қажеті қанша, - деді.
- Маған қажет болмағанымен, сендерге қажет, ертең-ақ жемісін жейсіңдер, - деді атасы.

- Жағдаятты аяқтаңыздар.
- Немерелері неге атайға көмек бермеді?
- Балалардың жасы қаншада?

4-топ.
Арманның анасы жұмыста болғандықтан, барлық үй жұмысын бауырлары атқаратын еді. Арман үйдің кенжесі, 2-сыныпта оқитын болғандықтан ештеңе жасамайтын. Ол бұл әрекетін дұрыс деп қабылдайтын және бауырларымен жиі сөзге кеп қалатын.

- Арманның әрекеті дұрыс па? Неге ол өз әрекетін дұрыс деп ойлайды?
- Арманға қандай кеңес бересіздер?
- Жағдаятты аяқтаңыздар.