Әліппеден мәңгілік

М.Әуезов атындағы №20 жалпы орта білім беру мектебі

Тәрбие сағаты
Тақырыбы: «Әліппеге мың алғыс!»

Дайындаған: Едилова Жанылсын

Ақтау қаласы

«ӘЛІППЕГЕ МЫҢ АЛҒЫС !»

Мұғалім: Құрметті ата-аналар,ұстаздар,оқушылар,келген қонақтар!
Бүгін сіздер 1-сынып оқушыларының әліппемен коштасуға арналған
ертеңгілігіне жиналып отырсыздар.Шәкірттердің тұңғыш рет қолдарына
ұстап,бетін ашқан оқулығы- Әліппе.Бұл кітап ғылым дүниесінің алғашқы
соқпағы, білімге бастайтын алғашқы жолы.Осы әліппе оқулығы арқылы біздер 42
әріпті меңгеріп,енді одан әрі үлкен-үлкен биік шыңға көтерілмекпіз.Олай
болса,оқушылар сіздерге әліппені қалай оқып меңгергендерін,қалай
есептеп,қалай жаза алатынын,жұмбақ,жаңылтпаштарды қалай шешіп,айта
алатындарын көрсетпек.Ендеше,мерекемізді бастайық.

1«З» сынып оқушылары (аттары аталады)
Күй ойналып тұрады.Оқушылар жұп-жұбымен сыныпқа кіреді.

1-оқушы: Өтті оқу сан сабақ,
Бүгін міне салтанат
Оқулықпен достаспақ,
Әліппемен қоштаспақ.
Ой білімі жаңғырмақ
Әліппеден мәңгілік
Әріптерді таныған
Өңкей білгіш балдырған.
Құтты болсын тойларың!
2-оқушы: Біз ғана емес, қадір тұтқан бабалар
Аналардан туған небір даналар.
Ана деген тіршіліктің тірегі
Армысыздар,қасиетті аналар!
3-оқушы: Мен бүгін бұрынғыдан саналымын
Қоңырау боп күмбірлейді жаңа күнім
Дәптердің жазылмаған ақ парағы
Ақ көйлектей жеті жасар балалығым!
4-оқушы: Мектеп-кеме,білім-теңіз,
Барар жерге тез жетеміз.
Адаспаймыз ұлы жолда
Ұстаз берген білім қолда.
5-оқушы: Қадірлі мектеп,бұл мектеп,
Оқыған ата-анамыз.
Атыңды сенің құрметтеп,
Әрқашан еске аламыз.
Хор: «Мектебім»

Мұғалім: Жеміске құты тола ма,
Бір-бірлеп теріп алмасаң?
Әп-сәтте шыға қоя ма,
Еккен дәнің ойласаң?
Білім де сондай, қарағым
Біртіндеп сіңер ойыңа,
Ұғып ал білім боларын
Шам-шырағың жолыңда...
- деп ақын М.Әлімбаев ағамыз жырлағандай,бұл білімнің,ғылымның алғашқы
жолы ғана.
Оқушылар хормен: Біз «Әліппені» бітірдік.
Мұғалім: - Ия,бітірдіңдер,қазір біз Әліппені ортаға шақыртып,оған арналған
өлеңдерімізді айтып шығарып салайық.
Әліппе: - Балалар, сендер мені оқып,бітірдіңдер, әріптерді жақсы
меңгердіңдер. Енді сендер менімен қоштасасыңдар,әрі қарай білім беретін
мына «Ана тілі» болады, оны да жақсы оқыңдар.
Ана тілі: - Сәлематсыңдар ма,балалар?!
Оқушылар: - Сәлематсыз ба, «Ана тілі»?!
Әліппе: - Міне, сендерді де таныстырдым, сендерге сәт сапар тілеймін!
Сабақтарыңды жақсы оқып,мұғалімдеріңді, ата-аналарыңды қуанышқа бөлеп жүре
беріңдер! (Әліппе кетуге ыңғайланады).

6-оқушы: Әліппем,менің әліппем,
Сені қолға алып мен,
Есігін аштым мектептің
Ертеңгі сәуле жарықпен.
7-оқушы: Қош бол,құтты әліппем,
Көп нәрсені үйреттің.
Таныстырып әріппен,
Тақылдатып сөйлеттің.
8-оқушы: Ашыла берді алдымнан
Кең дүние есігі.
Соғылған сомдар алтыннан
Әліппе - білім бесігі!
9-оқушы: Әліппе деген алтын жол,
Апарар сені алысқа.
Жеңіл емес,ауыр жол.
Тырмысып бақ намысқа.
Хор: «Әліппе»
10-оқушы: Барлық әріп бағалы
Айттық әділ бағаны.
Әріпсіз сөз болмайды,
Буын онсыз толмайды.
11-оқушы:Ең алғаш алғанымда әліппені
Қызығып қарай бердім әріптерді
Мен үшін жұмбақ болып қалар ма еді?!
Ұстазым оның кілтін алып берді.
12-оқушы:Әліппемен қош айтысып қаламыз
Енді қолға басқа кітап аламыз
Ата-ана қуанышқа ортақ бол,
Сауатты боп шықты міне балаңыз.
Хор: «Әліппемен қоштасу»
Балалар хормен: Әліппеге мың алғыс! Хош,сау болыңыз,Әліппе!
Әліппе: Рахмет,сау болыңдар!
13-оқушы: Оқуды көп ойладық
Қызығына тоймадық.
Әріптерді үйреніп,
Сауат аштық, тойладық.
Мұғалім: -Балалар,жаңа сендерге «Әліппе» оқулықтарың енді «Ана тілін»
оқитындарыңды айтып,таныстырған болатын. «Ана тілімен» бірге «Математика»
оқулығы да келіпті. Енді оқитын оқулықтарымыз не айтпақ екен,соларды
тыңдайық.
Ана тілі: -Балалар,енді бұрынғыдан да көп оқитын боласыңдар.Мен сендерге
көп қызықты ертегілер,әңгімелер арнаймын,тек сендер ынта қойып,мені ұқыпты
оқысаңдар,көп нәрсе үйренесіңдер.
Туған елдің тілімін,
Ақылы мен танымын
Түсіндірер бәріне,
Ана тілі пәнімін.
14-оқушы: Ана тілім - болашақ келешегім,
Сен арқылы биікпен теңесемін.
Өлең жазып,ой толғап өз тілімде,
Шыңға қадам басамын мен өсемін.
15-оқушы: Ана тілің арың бұл,
Ұятың боп тұр бетте.
Өзге тілдің бәрін біл,
Өз тіліңді құрметте!

Мұғалім: -Енді математика пәніміз бізге не айтпақ екен,соны тыңдайық.
Математика: Есептеуге жүйрік болғын жасыңнан,
Математикаға орын берсең басыңнан
Досың солар табылатын қасыңнан
-Балалар,мен сендерге санауды,есеп шығаруды,математикалық жұмбақ шешуді
үйреттім.Мені қалай меңгергендіктеріңді сынап көрейін деп сендерге біраз
математикалық жұмбақтар әкеп отырмын.Тыңдап,шешуін табыңдар.
Оқушылар жұмбақтардың шешуін табады.
Математика: Жарайсыңдар,сендерге рахмет.Сабақты жақсы оқитын оқушы
болыңдар.
Мұғалім: Ия,сабақты жақсы оқумен қатар тәртіпті,әдепті болуымыз қажет.
Әдептілік жөнінде не білеміз?
-Мақсат құрмай алдыңа,қыдырып құр қаңғыма.
-Асықпай іш тамақты,жалама ыдыс,табақты.
-Қарсы ал ерте күн көзін,төсегіңді жина өзің.
-Құр бекерге қылтима,болмашыға бұртима.
-Салма аузыңа инені,үзбе жұлып түймені.
-Сыйлап үлкен кісіні,қамқорлыққа ал кішіні.
-Әдет қыл бұл ісіңді, тазалап жүр тісіңді.
-Сақта көше тәртібін,бағдаршамның ал тілін.

Би: Жалқаубек әніне билеу.

Мұғалім: -Әдепті бала қандай болу керек?
-Сыйлап үлкен ағаны,сәлем берген баланы кім дейміз?
Хормен:Әдепті екен бұл дейміз.
-Кітап,дәптер,қаламы
Кір шалмаған баланы кім дейміз?
Хормен:Ұқыпты екен бұл дейміз.

-Таудай биік талабы,жақсы оқитын баланы кім дейміз?
Хормен:Үлгілі екен бұл дейміз.

Мұғалім: -Біз әр сабақта жақсы сөздермен танысамыз.Әдептілікке
үйренеміз.Егер сендер осы күннен әдепті болып өссеңдер,есейгенде ата-
аналарыңның,өз Отаныңның мақтанышына айналасыңдар.
16-оқушы:Отан -менің ата-анам,
Отан-досым,бауырым,
Отан-өлкем,астанам,
Отан-туған ауылым.
17-оқушы:Әсемпаз болма әрнеге,
Өнерпаз болсаң арқалан.
Сен де бір кірпіш дүниеге,
Кетігін тап та бар,қалан.
18-оқушы:Шай ішетін қоюлап,жақсы көрем атамды,
Сырмақ сырған оюлап,жақсы көрем апамды.

Ойын: «Аққала» құрастыру. (Бөліктердің артында жазылған тапсырманы орындау,
мақал-мәтел,жұмбақ,жаңылтпаш айту)

19-оқушы: Күндерге күн ұласты,
Жылжып-жылжып жыл асты.
Ойдағыдай оқимын
Мен бірінші класты.
20-оқушы: Айгөлек-ау,айгөлек,
Айдың жүзі дөңгелек.
Айдай толған кезімде
Би билеймін дөңгелеп.
Би: «Айгөлек»

Хор: «Мұғалім - ол біздің»

Мұғалім: -Балалар,сендердің әліппені жақсы меңгеріп,сауатты оқуларыңа ата-
аналарыңның,әжелеріңнің қосқан үлесі мол.Кәне,бәріміз рахмет айтайық.
Оқушылар хормен: Бақытты балалық шағымыз үшін рахмет, сіздерге,ата-аналар!

Ән: «Әрқашан күн сөнбесін!»
Ән: «Бала тілегі»

Мұғалім: -Қымбатты,балалар!Мектептегі алғашқы жеткен жемістеріңмен
құттықтаймын! Әліппе сендерді тек әріптермен таныстырып қойған жоқ,сендерді
бір-біріңмен дос болуға,мектеп ережелерін орындайтын тәртіпті оқушы болуға
да үйретті.Білім баспалдағына өрлеген сапарларың сәтті болсын!