Сыныптан тыс оқу әдістемесі

Тақырып 2: Сыныптан тыс оқу әдістемесі
Жоспар:
1. Сыныптан тыс оқудың маңызы мен мақсаты.
2. Сыныптан тыс оқуды ұйымдастыру.
3. Сыныптан тыс оқу барысындағы әдістемелік ұсыныстар.
Мақсаты: Сыныптан тыс оқудың маңызын және оның мақсатын ұғындыру, оны ұйымдастырудыңәдістемесінмеңгерту.

1. Сыныптан тыс оқудың маңызы мен мақсаты.
Мектепте әдебиеттік оқу пәнін оқыту барысында сыныптан тыс жұмыстарға ерекше көңіл бөлінеді. Сыныптан тыс жұмыстар оқушылардың қабілеті, икемі, дарыны, жеке ынтасы негізінде ұйымдастырылады.
Бала тілін дамытудың өзекті бір саласы - сыныптан тыс оқу. Сыныптан тыс оқу арқылы бала өзін қоршаған ортада қандай болып өскендігін, не болуы мүмкін екендігін байқайды, сезінеді. Шығармалардағы кейіпкерлер іс-әрекетіне еліктейді, солардан үлгі-өнеге алады, дүниетанымы кеңейе түседі. Сыныптан тыс оқудың мақсаты: балаларды өз бетінше кітап оқуға үйретіп, соған деген құштарлығын арттыру, оқу-жазуға үйретуді жетілдіре түсу. Олай болса сыныптан тыс оқу жұмысын неғұрлым ерте бастаса, соғұрлым тиімді де жемісті болмақ. Басқаша айтқанда бала мектеп табалдырығын аттағаннан бастап сыныптан тыс жұмыстары жүргізілуі тиіс. Себебі, сауат ашудың алғашқы кезеңде балалардың тілін, ақыл-ойын дамыту жұмыстары түрлі-түсті суреттерді, суретті кітаптарды көрсету, мәнерлеп дауыстап оқып беру арқылы жүргізіледі. Сондай-ақ сыныптан тыс оқу шәкірттердің өз беттерінше оқу дағдыларын қалыптастырады және арттырады. <<Әліппе>> және <<Әдебиеттік оқу>> оқулықтарында берілген бағдарламалық көркем ерекшіліктерін түсінулеріне аса зор пайдасын тигізеді. Балаларды өздері оқыған шығармаларына, олардағы кеіпкерлер іс-әрекетіне өзінше баға беруге жетіледі.
Міне, сондықтан да кітаптың атқарар қызметі орасан зор. Басқаша сөзбен айтқанда кітап - екінші ұстаз. Кітап оқу арқылы бала бүкіл әлеммен, онда жасаушы адамдармен, мінез-құлқы, жан-сырымен танысады. Солардан тағылым алады. Олай болса, мұғалім барлық мүмкіншіліктерін, айла-тәсілдерін пайдалана отырып баланы кітап оқуға қызықтыруға міндетті.
Бағдарламалық материалға сай белгілі бір жазушының не ақынның шығармасын өткенде сол жазушы немесе ақын туралы балалардың білгілері келетіні даусыз. Сондықтан оқытушы олар туралы (Өмірбаяны, мекен-жайы, қайда еңбек етеді, қандай шығармалары бар, олардың қайсысын оқуға ұсыну керек) өзі алдын-ала дайындалып келуге міндетті. Осымен қатар бастауыш сынып мұғалімдерінің үнемі есте сақтайтын нәрсесі - сыныптан тыс жұмыстың тіл дамыту мен байланысты екендігі. Себебі, оқу барысында балаларға түсініксіз сөздер, сөз тіркестер кездесуі мүмкін. Оларды түсіну үшін бала:
- Ата-анасын не аға-әпкелерінен көмек сұрасын;
- Өзі түсінуге тырыссын. Ол үшін
а) Берілген үзіндіні қайта-қайта оқысын;
б) Мәтінді толық оқып шығып, ой қорытсын.
Сыныптан тыс оқуға берілетін мәтіндегі қиын сөздерді, сөз тіркестерінмұғалім алдын-ала түсіндіріп жіберсін.
Міне сонда ған дүниетанымы кеңейеді, тілі мен ойы, ойлау қабілеті дамиды. Ал бұл балалардың ынтамен жұмыс істеуі дағдысын қалыптастыруда аса зор қызмет етеді.

2. Сыныптан тыс оқуды ұйымдастыру.
Сыныптан тыс оқуды ұйымдастырудағы басты да өзекті үрдіс - сыныпта жүргізілетін оқумен тығыз байланысты, яғни соның жалғасы сияқты болуы керек. Бұл байланыстылықты өзара жұмдастыра жүргізу мұғалімнің әдістемелік шеберлігіне, қабілетіне қарай әр түрлі дәрежеде жүргізіледі. Осыдан барып әр мұғалім сыныбы арқылы дәрежелі білім деңгейін меңгеретіндігі шығады. Қашанда ізденгіш, балаларды жанымен жақсы көретін, өзінің ұстаздық парызына адал оқытушылардың шәкірттері ұқыпты да тәртіпті, білімді болады. Дәл осы арада сыныптан тыс жұмысты тек қана былай жүргізу, олай жүргізбе деп айтудың, нұсқау берудің қажеті жоқ. Себебі, жоғарында айтқандай әр мұғалімнің ұяты мен шеберлігі біледі. Дегенмен сыныптан тыс оқылатын кітаптың жоспарлы оқу материалдарына сәйкестенуін, соны кеңейте түсуін ескерген жөн. Мысалы, табиғатқа ондаған жан-жануарларға байланысты сабақ өтілгенде сыныптан тыс оқу үшін А.Сейдімбектегінің <<Тауға біткен жалбыз>> кітабынан бірнеше үзінділер ұсынуға болады. Атап айтқанда <<Айқас>> әңгімесіндегі жыландар мен құрбақалардың жан беріп, жан алысқан айқасын оқуға ұсынса бала дүниетанымының кеңі түсінетіні даусыз. Осы арада айта кететін бір нәрсе <<ойбай ол ересектерге арналған шығарма ғой, бала түсінігіне ауыр болады>> деген жаттанды қағидадан аулақ болу керек. Себебі, психолог-лингвист ғалымдар дәлелдегендей мектеп жасына келген бала тілдің бүкіл фаналогиялық жүйесін түсінеді.
Cыныптан тыс оқуды белсенді ұйымдастырушы және оны басқарушы да мұғалім болуға тиіс. Сондықтан мұғалім өз оқушыларының кітапқа деген ынтасын үнемі арттырумен бірге, олардың қандай кітап оқуға тиіс екендіктеріне де бағыт беріп отырады. Балалар бастауыш сыныпты бітіргенде, ақын-жазушыларының белгілі шығармаларымен таныс болулары қажет екенін де үнемі ескертіп отырады.
Сыныптан тыс оқу жұмысын балалар мектепке келген кезден бастаған жөн. Өйткені сауат ашу кезінде оқушылардың ақыл-ойын, тілін дамыту жұмыстары балаларға түрлі-түсті суретті кітапшаларды көрсету арқылы дауыстап, мәнерлеп оқи отырып жүргізіледі.
2-сыныптан бастап мұғалім балаларға мектеп кітапханасынан алған кітаптарды бере бастайды. Оларға кітапты дұрыс ұстап, күте білудің ережелерін үйретеді: кітапты тыстап қою, оқыған кезде кітап беттерін бүктемеу, кітап беттерін су немесе кір қолмен ұстап парақтамау, т.б. Мұғалім бұл ережелерді анық етіп жазып, сыныпқа іліп қояды.
Сыныптан тыс оқу оқушылардың кітапты өздіктерінен оқи алу дағдыларын арттырумен бірге, <<Әдебиеттік оқу>> оқулықтарындағы шығармалардың мазмұны мен көркемдік ерекшеліктерін түсінуге көмектеседі. Балалар оқыған шығармаларындағы негізгі ойды аңғара білуге, сол оқиғаға өзінің қалай қарайтынын айтып, кейіпкерлердің әрекетіне баға бере білуге талаптануы қажет.
Сыныптағы оқу сабақтарында оқушылар көркем тілмен жазылған шығармалардан басқа тарих, табиғаттану т.б. пәндерінен мағлұмат беретін материалдармен танысады. Осындай, сыныпта алған ұғым сыныптан тыс оқу кезінде нығая, жетіле түседі.
Сыныптан тыс оқу сабақтарында мұғалім балалардың қандай кітаптарды оқығандарын біліп отырумен қатар, алдағы уақытта не туралы оқығылары келетінін де есепке алуы қажет.
Бастауыш мектептердегі сыныптан тыс оқудың мазмұны мен ұйымдастыру жолы жөнінде жаңа бағдарламаның жобасында былай делінген: <<Сыныптан тыс оқудың мақсаты: баланың сыныптан тыс оқуы арқылы барлық пәннен алған білімін тереңдете түсу, кітаптан өзіне қажетті материалды, кітапханадан керекті кітапты іздеп тауып алуға көмектесу; өз бетімен жұмыс істеу дағдысын нығайта түсу; оқуға, білуге ынтасын, құштарлығын арттыра түсу; баланың эстетикалық және дүниетану құмарлығын арттыру.Сыныптан тыс жүргізілетін оқуды ұйымдастырудың ең негізгі принципі -- оның сыныпта жүргізілетін оқумен тығыз байланыста болуы. Оқушының сыныптан тыс оқитын кітаптары сыныпта өтілетін сабақтардың жалғасы түрінде ұсынылады. Оны мұғалім күнделікті оқу, дүниетану, сурет, ән, еңбек т.б. сабақтарында және оқу бойынша жүргізілетін қорытынды сабақтарда сұрап, сыныпта оқығандарына байланыстырып отырады ... >>.
Сөйтіп, сыныпта оқу сабағы жақсы ұйымдастырылса, онда көп мәселелер жөнінде әңгімеленсе, балаларды мұғалім осы мәселелер жайында тағы да біле түсуге қызықтыра алса, сыныптан тыс оқу сабағы да нәтижелі өтеді. Оқушыларға қандай кітаптарды оқу керектігі, олардың тізімі беріледі. Мысалы, сыныпта М.Әлімбаевтың <<Ұқыпты бала>> және <<Ұқыпсыз бала>> өлеңдері оқылды делік, оның жалғасы ретінде <<Ұқыпты оқушы>> өлеңін оқытуға болады. Т.Бигелдиновтың <<Қаһарлы күндерде>> әңгімесін оқығаннан кейін, сөз жоқ, оқушылар Совет Одағының Батыры атағын екі рет алған, ұшқыш Т.Бигелдиновтың балалық шағы жөнінде білгілері келеді. Ол үшін мұғалім С.Бақбергеновтың <<Талғат>> атты кітабынан үзінді беруіне болады.
Сыныпта оқушылар жазушының бір шығармасынан үзінді оқыса, сол шығарманы толықтыра оқу сыныптан тыс оқуда іске асырылады. Кейде белгілі ақын-жазушылармен балаларды толығырақ таныстыра түсу мақсатында оның сыныпта оқылғаннан басқа шығармаларымен сыныптан тыс таныстыруға болады. Мысалы, Ы.Алтынсаринның <<Әдептілік>> әңгімесін оқығаннан кейін, оның <<Баланың айласы>>, <<Аурудан аяған күштірек>>, <<Өтіріктің залалы>> т.б. әңгімелері сыныптан тыс оқуға беріледі. Қейбір жекелеген шығармаларды сыныптан тыс оқу сабағында да талдауға болады. Онда талданатын шығармалардың тәрбиелік жағы күшті болуы қажет.
Оқушылардың кітап оқуға қаншалықты ынталы және бейім екендіктерін білу үшін мұғалім олардың әрқайсысымен оқыған кітаптары жөнінде жеке әңгімелеседі; салған суреттерін, жазып алғандарын қарап, бүкіл деректермен жеке танысады. Кейде кітапханадағы карточкасын қарап көруге де болады. Осындай ыждағатты тексерудің нәтижесінде, балалардың қайсысы қандай тақырыпты жақсы көретіндері байқалады. Кейбір бала ертегілерді, кейбіреулері ерлік жайлы шығармаларды, ал бірсыпырасы қиял-ғажайып ертегілерін т.б. ұнатады. Осыдан кейін мұғалім балаларды бір жақтылықтан сақтандыру мақсатымен, оларды басқа тақырыптарға қызықтыру жолдарын іздестіреді.
Балаларға сыныптан тыс оқуға арналған тартымды кітаптарды іріктеп немесе жаңадан шығып жатқан шығармалардың ішінен іріктеп ұсынады, әдемі суреттермен безендірілген кітап жаймаларын, түрлі әдеби ойындар ұйымдастырады т.б.
Сыныптан тыс оқылуға тиісті кітаптардың тізімі бір тоқсанға арналып әр тоқсан сайын ұсынылып отырады. Балалардың оқуға ынтасын арттыру мақсатымен мұғалім ұсынып отырған кітаптарының ішінен кейбір оқиғаларды бастап айтып, <<одан әрі не болатынын осы кітапты оқып білесіңдер>> деп аяқтайды. Кейде кітаптың сыртындағы немесе ішіндегі кейбір әдемі суреттердікөрсету арқылы да қызықтыруға болады. Ал енді бір жағдайларда шығарманың, кітаптың атын, авторын ғана айтып, оның осылайша неге аталғанын білуді тапсыруға болады.
Бастауыш сынып оқушыларын оқуға қызықтыру үшін 5-6 сынып оқушыларының да көмегі зор. Өздерінің кішкене бауырларына бұрын оқыған кітаптары, әңгіме, ертегілері жөнінде, өздеріне ұнайтын жазушылар жөнінде әңгімелеп айтып берсе, олар сол кітапты өздері де тауып оқиды.
Оқу жылы аяғында балаларға жазғы демалыс кезінде оқитын кітаптарының тізімі беріледі де, оқу жылының басында сол көрсетілген кітаптардың қайсысын оқыған-оқымағандарын тексереді. Олардың оқыған кітаптары туралы жазғандарын, әсерлерін, пікірлерін, кейбір үзінділерді, кейіпкерлердің аттарын, суреттерін т.б. қарайды, оқытады.
Міне, осындай жұмыстардан кейін қосымша оқуға тиісті қітаптардың тізімі беріледі. Мектептерде әдебиеттік оқу сабақтарының өтілу жайы мен сыныптан тыс оқудың мазмұнына сай, бастауыш сынып оқушыларымен мынадай жұмыстар орындауға болады:
1) Көркем шығармаларды (бір шығарманы немесе тақырыбына қарай топталған бірнеше шығарманы), ертегілерді, мақалаларды талдау.
2) Күнделікті баспасөздегі (<<Балдырған>>, <<Ақ желкен>>, <<Зерде>> журналдары мен <<Ұлан>> газеті, т.б.) мақалаларды оқу.
3) Кітаппен жұмыс істеу дағдысын қалыптастыру. Көркем шығармаларды талдау үшін сюжетті әңгімелер қолайлы.
Оқушылардың өз беттерімен оқитын шығармаларына сұрау берудің қажеті жоқ, олар өз беттерінше қорытынды шығарғандары жөн, яғни әркімнің өз оқығандары жөнінде өз кезқарастары болғаны дұрыс. Кейде оқығандары жөнінде жолдастарынан сұрау, пікір алысу т.с.с. тыйым салынбайды.
Сыныптан тыс оқу сабақтарында кернекі құралдар қолданудың да пайдасы мол. Мұнда да шығармада кездесетін қиын сөздер түсіндіріліп отырғаны жен.
Сыныптан тыс оқуда бір жазушының шығармасын талдауда сол жазушының емірі мен қызметінен толығырақ мағлұмат беруге болады. Мұндай сабақ шамамен былай ұйымдастырылады:
а) мұғалім немесе балалардың бірі жазушы жөнінде қысқаша әңгімелеп береді;
ә) жазушының балаларға таныс кітабы я шығармасынан үзінді оқылады, кейде бір шығармасынан әдеби монтаж, ойын ұйымдастыруға да болады.
Бірінші сабақта сол жазушының өмірбаяны туралы айтылып, оның балалар оқыған шығармасы жайлы қысқаша әңгімеленеді де, басқа бір шығармасы тағы оқуға тапсырылады.
Екінші сабақта оқуға берілген шығарма талқыланады, ал үшінші сабақта қорытындыланады.
Жоғарыда бастауыш сыныптарда балалар ертегі оқуға өте құмар келеді дедік. 2-3 сыныптарда көбіне жануарлар туралы ертегілерді жақсы көреді. Мұндай сабақтарға көрнекі құралдарды балалардың өздеріне жасатуға болады. Бірқатар ертегілер жөнінде шыққан суреттер де бар (<<Түлкі мен бөдене>> т.б.), ал көптеген ертегілер бойынша диафильмдер жасалды.
2-3 сыныптарда оқу үшін ұсынылатын материалдарды мұғалім өзі іріктейді, ал 4-сыныпта балалар өздері іріктеп алады.
Оқушыларды газетпен таныстыру сабағын мына сияқты жүйемен жүргізуге болады:
а) балаларды өздерінің <<Ұлан>> газетіне қызығатындай етіп, газеттегі басылған мақалалардан үзінді келтіре отырып (балалардың мектептегі, үйдегі іс-әрекеттері мен еңбектері, балалардың өз мектебіне, қаласына, ата-анасына қандай көмек көрсеткендері т.б.), әңгіме ұйымдастыру (балалар газетті оқи ма, ондағы мақалаларды түсіне ме, қандай мақалалар ұнайды т.б.).
ә) газетті кімдер шығаратынын, қай жерде, қай күндері шығатынын, қай кезден бастап шыға бастағанын айту.
б) <<Ұлан>> атты газетінің кезекті номерінің құрылысымен (макетімен) және мазмұнымен таныстыру. Мұндай сабақтарда қажет жерлері болса, географиялық карта, кітап жаймасы т.б. болғаны жөн.
<<Балдырған>> журналымен таныстыру сабағында журналдың кітаптан айырмашылығы (ай сайын шығып тұратыны, тақырыптарының алуан түрлілігі) айтылады.
Балаларды ез беттерімен кітап оқуға үйреткен кезде мұғалім оларға кітаптың маңызы, оқу мәдениеті, оқу ережелері т.б. жөнінде үнемі ескертіп отыруы қажет. Сыныптан тыс оқуды есепке алып, тексеріп отыру жөнінде жоғарыда да айтқанбыз. Оған қосымша, оқыған кітаптары жөнінде оқушыларға күнделік жаздырып үйретудің де орасан зор тәрбиелік мәні бар екенін еске сала кетудің артықтығы болмаса керек. Бұл - балаларды ойларын жинақы, өз сөздерімен жаза білуге дағдыландырады, жазу қабілетін жетілдіреді. Күнделікке кітаптың аты, авторы, шыққан жылы, оқығаны қандай мақала екені және ол жөніндегі өзінің пікірі жазылуға тиіс.
2-3 сыныптарда балалар оқыған кітаптарының авторы мен атын, шыққан жылын жазып, өздеріне ұнаған кейбір оқиғаларға сурет салып қояды, ал 4-сыныпта осыларға қосымша, өз пікірін жазып отыруы керек.

3. Сыныптан тыс оқу барысындағы әдістемелік ұсыныстар.
Бірінші қыркүйекте алты жасар кішкентай бүлдіршін алғаш рет мектеп табалдырығын аттап, тек жеткіншек уақытында ғана мектеппен қоштасады. Алда ұзақ та қиын оқу жылдарында балаға қуаныш сыйлау өте маңызды. Сол, қуанышты тек кітап қана сыйлай алады деуге болады.
Әр адамның өмірінде, қоғамда кітаптың маңызы өте зор.
Бала кітаппен мектепке келген күннен бастап танысады.
Кітап болашақты өткен өмірмен байланыстырады. Кітап - өмірді ашу кілті, жақсылық пен жамандықты ажырату кілті.
Сыныптан тыс оқу бірінші оқу аптасынан бастап сауат ашу мен әдебиеттік оқу сабағымен қатар жүреді, балаларды үлкен әдебиет өмірімен таныстырады, баланың өз еркімен оқуын қалыптастырады.
1-сыныпта сабақтан тыс оқу мынадай екі кезеңде іске асырылады: бірі алғашқы оқу жылының бірінші жартысында дайындық жүргізіледі. Яғни, бірінші қыркүйектен 10-15 қаңтарға дейінгі кезең. Екіншісі, 10-15 қаңтардан 25 мамырға дейінгі кезең. 1-сынып бағдарламасында бұл кезеңдерде оқушыға білім беру жолдары анық көрсетілген. Сыныптан тыс оқу дайындық кезеңінде 20-25 минутқа созылуы мүмкін.
Сыныптан тыс оқуды мұғалім ұйымдастырады. Соның бірі <<Сыныптан тыс оқу>> сабағы.
Үй-іші, ата-анасының көмегімен сыныптан тыс оқуға дайындық жасалады. Алғашқы жартыжылдықта балалар өз бетінше оқи алмайды, тек мұғалімнің оқығанын естіп, тыңдайды. Мысалы: ертегі, қызық әңгіме, өлең үзінділері, тақпақ, т. б.
Оқу жылының бірінші жартысында әліппе кезеңінде сыныптан тыс оқуды былайша жоспарлаймыз. Оқу жөнінде қысқаша түсінік беріп, әңгіме өткізіледі. Бір мәтінді алып мұғалім дауыстап оқып береді. Одан кейін қысқаша түсінік беріледі. Бір жұмадан кейін оқушылардың шамасы келетіндей кітаптарды белгілеп, әңгіме өткізіп, тапсырма беріледі.
Кітаптың көлемі 8 беттен 30 бетке дейін болуы мүмкін, міндетті түрде үлкен форматты болуы керек.
Оқу жылының бірінші жартысында оқылған әңгіме, ертегі, өлеңнің аты мен авторы сол шығарманы оқып болғаннан кейін таныстырған жөн. Алдымен оқушыларға мынадай сұрақтар қойылады:
- Балалар, сендердің қызығып тыңдаған әңгімелеріңді кім жазған?
- Ол жазушыны естеріңде сақтадыңдар ма?
Автордың кітаптарын тағы да оқығыларың келсе, жазушының, ақынның аты-жөнін ұмытпай біліп алыңдар деп ескертеміз. Балалар кітапты кім жазғанын айтады.
Сыныптан тыс оқудың әдіс-тәсілдеріне тоқталайық:
Оқылатын ертегі, әңгіме, өлеңді алдымен мұғалім оқиды. Әр сөзге дұрыс екпін түсіріп, тыныс белгілеріне тоқтап, дұрыс оқуға бағыт береміз. Мәтін оқылып болған соң, ондағы әр сөздің оқушыға түсінікті, түсініксіздігін тексеріп байқаймыз. Мәтіндегі сөз, сөз тіркестерін дұрыс ұғатын болса, онда оқушы мәтін мазмұнын тұтас түсінеді деуге болады. Егерде мәтін ішіндегі бірнеше сөздің не екенін, мағынасын түсінбейтін болса, күні бұрын дайындалған сабақ көрнекілігін, суреттерді пайдаланып мағынасын ашуға көмек беру ескеріледі. Сондай-ақ, сол сөздерді кіріктіріп сөйлем құрату тиімді.
Балаларға әліппе оқулығында берілген <<Бәрінен де жақсы>> деген мәтінді оқытып көрейік.
Мысалы:
<<Бір кішкентай қыз топты адамның ортасында шешесінен адасып қалыпты. Ол шешесін іздеп таба алмаған соң бақырып жылапты. Оны көрген адамдар жұбатып: - Сен жылама, біз сені қазір шешеңе апарамыз. Сенің шешең қандай адам еді? - деп сұрапты. Сонда қыз жылап тұрып: - Сіз білмейтін бе едіңіз, менің шешем ең жақсы адам!? Ол бәрінен де жақсы, - деп жауап беріпті>>.
Ең әуелі мәнерлеп оқып шығамыз. Сонан кейін 2-3 оқушы оқиды. Оқушылардың қате оқыған сөздеріне түзету жасап, бірнеше рет оқимыз. Мысалы, мәтіндегі <<кішкентай, бақырып, жұбатып>> деген сөздерді дұрыстап айта алмайтындары байқалады.
Мәтін мазмұнына байланысты сұрақтар мен тапсырмалар беріледі:
1. Кішкентай қыз кімнен адасып қалды?
2. Қайда адасып қалды?
3. Қыз қандай еді?
4. Қыз не істеді?
5. Қызды кімдер жұбатты?
6. Олар қыздан нені сұрады?
7. Қыз не деп жауап берді?
Балалардан толық жауап алу ескеріледі.
1. Кішкентай қыз шешесінен адасып қалды.
2. Қыз көшеде адасып қалды.
3. Қыз кішкентай еді.
4. Қыз бақырып жылады.
5. Қызды көрген адамдар жұбатты.
6. Олар қыздан - анаң қандай адам?- деп сұрады.
7. Қыз менің шешем ең жақсы адам,- деп жауап берді.
Мәтін мазмұнын түсінуде сұрақтарға дұрыс жауап берудің үлкен тиімділігі бар, сондай-ақ сұрақ та дұрыс қойылуы қажет.
Оқу жылының екінші жартысында оқушылардың алдына бірте-бірте күрделі кітаптар қойылады.
10-15 қаңтардан бастап сабақ кестесіне сыныптан тыс оқу сабағы кіргізіледі.
Екінші жартыжылдықта оқылатын кітаптар таңдап алынады. Оқылатын кітаптардың, шығарманың мазмұнын салыстыру немесе жақсы, жаман жақтарын байқатқан да дұрыс.
Оқушының бұл кезеңде де оқу шапшаңдығын жетілдіру және түсініп оқу басты мақсатымыз болады. Мұғалімнің дұрыс, мәнерлеп оқуына бала еліктеп қызығады. Солай оқуға көп жаттықтыру қажет.
Оқушы алғашқы кезде дұрыс оқуға қиналады. Бірақ мұғалімнің шебер оқуына олар зер салып тыңдайды. Баланы қызықтырып, дұрыс оқыту мұғалімге байланысты. Оқу тек мұғалімнің бақылауымен іске асады.
Оқушының өз бетімен үйде оқуын талап етуге болмайды, өз еркімен отырып оқуына қызығушылық тудыру керек. 1-сынып оқушысын еріксіз, жекіріп кітап оқытсақ баланың кітапқа деген көзқарасын өзгертіп алуымыз мүмкін. Өз еркімен кітап оқу - өте күрделі процесс. Бірінші жылы мұндай процесс тек сыныпта, мұғалімнің бақылауымен ғана жетістіктерге жетуі мүмкін.
Оқу жылының екінші жартысында әр сабақта жаңа кітаптармен таныстырылады. Алдымен оқушы кітаптағы өзіне ұнайтын мәтіндерді, тақырыптарды тауып, тыңдап алады. Осы тақырыптағы оқуда кездескен қиыншылықтарды мұғалім байқап, жол көрсетіп отырады. Кейде оқушы қиналып, кітапты оқығысы келмей кітапты тастап кететін жағдайлар да болады. Сондықтан әр оқушының жеке мүмкіншілігі де ескеріледі. Нашар оқитын оқушыларға жеңіл мәтіндер, жақсы оқитындарға қосымша мәтіндер беріледі.
Оқу техникасын жаңа үйреніп жүрген оқушыға кітаптың атын, авторын, ондағы суреттерді қарап мазмұны не туралы екенін айтқызу да пайдалы. Жақсы дайындықтағы оқушыға мәтіннің 1-2 абзацын оқуға, қалған бөлімдерін өте жақсы оқитын оқушыға оқыту да тиімді. Содан кейін мәтін мазмұны сұрақтар қою арқылы меңгертіледі. Сабақта 10-12 минут оқушы өздігінен кітапты оқып, белгілі бір түсінік алуға ынталануы керек.Қорыта келгенде, мұғалім сыныптан тыс оқуды басқарушы ғана емес, балаларды дұрыс оқуға бағыт беріп, қатесін түзетуші де.