Вв дыбысы және әрпі. 1 сынып

Тақырыбы: Вв дыбысы мен әрпі
Мақсаты: 1. В дыбысы және оның әріп таңбасымен таныстыра келіп,
Балаларды в дыбысы бар сөз, сөйлем ойлап табуына көңіл бөлу,
байланыстырып сөйлеуге үйрету.
2. Дидактикалық материалдарды пайдаланып балалардың ойлау
Қабілетін, қиялын, зейінін дамыту.
3. Шыдамдылыққа, ептілікке, ұғымталдыққа тәрбиелеу.
Түрі: біріккен сабақ
Әдісі: түсіндіру, сұрақ-жауап, ойын, ертегі ретінде
Көрнекілігі: В дыбысының баспа және жазба түрі, әріп кассасы, әріптер,
суреттер, ертегіге қатысты суреттер
Барысы:
Ұйымдастыру кезеңі:
Аспан түрді түндігін,
Жерге сәуле жайылды.
Неткен ашық күн бүгін,
Қайырлы күн, қайырлы!

* Балалар қазір жылдың қай мезгілі?
* Көктем мезгілінің айларын ата.
* Бір аптада неше күн бар, бугін қай күн?
* Дыбыс нешеге бөлінеді?
* Дауысты және дауыссыз дыбыстар қалай айтылады?
* Дыбысты - естиміз, әріпті - жазамыз, көреміз, оқимыз.

Сабақты ертегі ретінде өткізу.
* Балалар мына тақтада көріп тұрған қандай ертегі?
* Шалқан ертегісін кім айтып береді?
* Ендеше біз мына шалқанды бақшадан алуға көмектесеміз бе? Ол үшін сендер олардың тапсырмаларын орындауларың керек.

Атаның тапсырмасы. Өткенді қайталау.
* Өткен сабақта қандай дыбыспен таныстыңдар?
* Һ
* Һ дыбысы қандай дыбыс?
* Дауыссыз дыбыс.
* Һ дыбысы кездесетін сөз айтамыз
* Жиһаз, айдаһар, қаһарман (буынға бөлу)
* Һ дыбысы сөздің қай жерлерінде кездеседі?

Мына буындардан сөз құрап оқыңдар.
А - на, та, ға, ю, сық.
Ба - ла, ға, тыр, уыр, лық.

* Сендер атаның тапсырмасын дұрыс орындадыңдар, ендеше атаны шалқанға апарамыз. Ата шалқанды бақшадан суырып ала ма?
* Ендеше көмекке кімді шақырамыз?

Әженің тапсырмасы. Жұмбақтар шешу:
* Темір тайым,
Тебінсем тоқтамайды.
Мінсем дайын,
Тамақты еш жоқтамайды. (велосипед)
* Үй ішінде бөлме,
Бөлме іші көлде.
Түрлі ұсақ балық,
Жүзді сайран салып. (аквариум)
Велосипед, аквариум сөздерін буынға бөлу.
* Балалар мынау ненің суреті?
* Ваза, вагон буынға бөлу
* Осы сөздерде бізге таныс емес қандай дыбыс естіліп тұр?
* В дыбысы - дауыссыз дыбыс, көк түсті текшемен белгілейміз. (тақтаға В дыбысының көрнекілігін ілу)
* Баспа түрі қай жерде кездеседі?Ал жазба ше?
* В дыбысы 3 элементтен тұрады. В дыбысы сөздің басында және ортасында кездеседі.

Немересінің тапсырмасы.
* Ваза, вагон, вокзал сөздеріне дыбыстық талдау жаса.

Сергіту сәті.
Мынау - менің жүрегім,
Бәрі осыдан басталған.
Мынау - басым ақылды,
Бәрін осы басқарған.
Мынау - менің оң қолым,
Мынау - менің сол қолым,
Барлық істі атқарған.



Иттің тапсырмасы. Оқулықпен жұмыс.
Балаларға оқулықтағы сөздерді оқыту.

Дәптермен жұмыс.
Дәптерімізді ашамыз,
Қолға қалам аламыз.
Көлбеу қойып дәптерді,
Әдемі етіп жазамыз.
* Кәне балалар В әрпін бірінші ауада жазып көрейік.
* Ал енді дәптерімізге жазамыз. (дәптермен жұмыс ережерін айту)

Мысықтың тапсырмасы.
Мына суреттерге сөйлем құрау. (ваза, аквариум, велосипед)

Тышқанның тапсырмасы. Ойын: Балапандарды ұясына апару.
* В дыбысы қандай дыбыс?
* Вокзал сөзін буынға бөл.
* Вагон сөзіне сөйлем құра.
* В әрпін тақтаға жаз.

Қорытынды.
* Балалар бүгін қандай дыбыспен таныстыңдар?
* В дыбысы (кассадағы әріптерді оқытқызу)
* Балалар сендер ата және оның отбасына шалқанды бақшадан алуға көмектестіңдер, олар сендерге рахмет айтып, риза болып, мынадай жұлдызшалар таратуды тапсырды.