Қазақ тілі - бай тілім. тәрбие сағаты

Тақырыбы: Қазақ тілі - бай тілім
Мақсаты: Оқушыларды тіл мәдениетін сақтай білуге, тіл тазалығы үшін күресуге, сөз өнеріне баулу.Балаларды туған тілін сүюге, оны қорғауға тәрбиелеу.
Көрнекілігі: тіл туралы нақыл сөздер, слайд, ойындар, қима әріптер.
Барысы: Ұйымдастыру кезеңі.
Шаттық шеңбері
Қуанамын мен де,
Қуанасың сен де,
Қуанайық, достарым,
Арайлап атқан күнге!
Мұғалім: <<Жан көріністерінің ең қымбаты-ой, ой тілі-сөз. Тіл - адам жанының тілмашы. Тілі кем болса, адамның қор болғаны.>>- деген Мағжан атамыз. Ендеше тіл туралы ойларымен бөлісу үшін ортаға балаларды шақырамыз.
1-оқушы: Тіл-халықтың тарихы, тіл- ұлттық қазына, тіл- біздің намысымыз, арымыз, байлығымыз, барымыз.
2-оқушы: Қазақ тілі- өз тілім, ана тілім
Абай, Мұхтар сөйлеген дана тілім.
Қастерлейді ұл-қызың мәңгі сені.
Болашағым, бақытым, дара тілім.
3-оқушы: <<Ана тілін білмейтін адам-бір қолы жоқ шолақ адам секілді.>> Ғабиден Мұстафин.
4-оқушы: Дәулет деген ұғыңдар!
Кеше бар да бүгін жоқ.
Тілің болса, үнің бар
Тіл болмаса, түгің жоқ.
5-оқушы: <<Ана тілін ұмытқан адам өз халқының өткенінен де болашағынан да қол үзеді.>> Ғабит Мүсірепов
<<Ана тілін сүйемін>> әнін орындау.
Слайдпен жұмыс. Тіл туралы нақыл сөздерді оқып беру,мағыналарын ашу.
Мақал - мәтелдерді айту.
* У ішсең ұлтыңмен,
Жұтасаң жұртыңмен.
* Өзін-өзі басқарған ел бақытты.
Өзін-өзі билеген ел бақытты.

* Берекені көктен тілеме,
Бірлігі мол көптен тіле.
<<Кім шапшаң?>> ойыны
Балаларды үш топқа бөлу. Қима әріптер тарату. Әр топ өзіне берілген қима әріптерден сөздер құрайды. (Отан, қазақ дос)
6-оқушы: Тіліңді үйрен күнде сен.
Ол іс деме жай ғана.
Өз тіліңмен жиренсең,
Өлім, қылмыс, надандық.
Барлығы хормен:
Ақ сүтіндей ананың,
Ана тілің- жан арың!
Мұғалім:
-Тіл- ата - баба аманаты. Ғасырдан-ғасырға, ұрпақтан-ұрпаққа ұласқан, бабадан-балаға жалғасқан ұлы мұралардың ұлысы.
-Тәлім-тәрбие тілден басталады. Олай болса, тіл-бөбектің үні, тіл-ананың әлдиі, тіл-бесік жыры.
<<Бесік жыры>> орындалады.
8-оқушы:
Туған тілім-тірлігімнің айғағы,
Тілім барда айтылар сөз ойдағы.
Өссе тілім, мен де бірге өсемін,
Өшсе тілім,мен де бірге өшемін.
9-оқушы:
Қазақ тілім-саялаған нұр бағым,
Қазақ тілім-ана тілім, ардағым.
Сен арқылы жетіп жатыр өмірге
Жан сырларым, тілегім, бар арманым.
Бәрі қосылып:
Тілден биік асқар жоқ
Тілден асқан байлық жоқ
Тілден терең теңіз жоқ!
Қорытынды:
Мұғалім: Ардақта тіліңді,
Ал одан білімді.
Өз тілің үйретер
Өнерді ,ғылымды
Тіліңсіз білім жоқ
Білімсіз күнің жоқ.
-Ананың ақ сүтімен берілген ана тілімізді ардақтап, сүйе білейік.
-Осымен тәрбие сағатымыз аяқталады.