Менің педагогикалық ұстанымым жайлы ақпарат

Кербұлақ ауданы
Қарашоқы орта мектебі
Чильменбетова Айгуль


Менің педагогикалық ұстанымым
(эссе)

Ұстаз болу - даналық пен адамдық
Содан ғана табылады адалдық.
Білім, сүйкім, тәлім - үлгі соларда.
Ешкім оған ойламайды жамандық,-
деп, ақын жырлағандай ұстаз - даналықтың бастауы. Ұстаз - ар мен ождан иесі. Ұстаз - шәкірт жанының бағбаны.
Осынау қиыны мен қызығы мол ұстаздық еңбек жолымның басталғанына да біраз жыл болыпты. Кеше ғана қолыма диплом алып, өзімнің жүрек қалауыммен мұғалімдік мамандықты таңдаған жас маман едім. Алдымда көздері жәудіреген кішкентай бүлдіршіндер отырды. Ал қазір сол өзім тәлім- тәрбие берген шәкірттерімнің балаларын оқытып жатырмын. Бұл да уақыттың үздіксіз тіршілігі екендігінің белгісі. Менің өмірдегі бақытым- ұстаз болуым. Ұстаз болу- жай ғана мамандық емес. Соның ішінде бастауыш сынып мұғалімі болу- арқалар жүгі ауыр, жауапкершілігі мол іс деп білемін. Өйткені, білім негізі бастауыш сыныпта қаланады.
Жаңалықты жатсынбай қабылдайтын, шәкіртін Отанын сүюге, адамгершілікке баулитын, оның көкірегіне нұр құятын ұстазды ғана бүгінгі күннің нағыз тұлғасы деуге болады. <<Ұстаздың абыройы мен білімі болмаса- шәкірттері оның сақалымен ойнайды>> деген екен Сайф Сараи. Алдыңдағы шәкіртің құрмет тұту үшін мұғалім қазіргі заман талабына сай, шығармашылықпен жұмыс істеп, білімі мен білігін үнемі жетілдіріп отыруы қажет. Менің ұғымымда нағыз ұстаз боламын десең, алдымен баланы жан тәніңмен сүйе біл. Оның бойынан тек жақсы қасиеттерді ғана көр. Жан дүниесіне терең үңіліп, баламен сырласу, оның сөзін құлақ қоя тыңдау, қойған сұрақтарына толық жауап беру арқылы мұғалім өз мәртебесін көтере алады. Маған бұл тұрғыда әдеби кітаптарды көп оқығанның көмегі тиді. Әсіресе, еліміздегі оқу- ағарту ісінің озаты О.Қарабалинаның <<Ұстаз бақыты>> деген кітабы арқылы мен тәрбие жұмысының ерекшеліктері, мектеп өмірінің қилы- қилы қырлары мен оқушы бойындағы адами қасиеттерді танып- білуді үйрендім.
<<Ұстаз- үйрену барысында ғана ұстаз, ал үйрену тоқтаған күні ұстаздық та тоқтайды>>- деген екен К.Ушинский. Болашақта шәкірттерімнің Мәңгілік елдің тізгінін ұстайтын нағыз азамат болуына өз үлесімді қоссам, нағыз ұстаз бақытына жеттім деп ойлар едім. Алдыңа келген жүрегі таза, өмірдің білім атты баспалдағына аяқ аттаған бүлдіршіннің болашағы өзіңнен басталатындығын есіңнен шығармағайсың, бастауыш сынып мұғалімі!