Сабақ жоспары :: Алғашқы әскери дайындық

Бүгінгі ұрпақ - ертеңгі ел қорғаны

Тақырыбы: «Бүгінгі ұрпақ - ертеңгі ел қорғаны» атты әскери-патриоттық байқауы

Мақсаты және міндеті:

Оқушыларды Қазақстандық патриотизмге баулу.
Оқушылардың әскерде қызмет етуге деген ынталарын арттыру.
Оқушылар арасында достықты нығайту.
Оқушыларды әскери оқу орындарына түсуге баулу.
Оқушылардың дене даярлығын спорттық шеберліктерін арттыру.

Өткізілетін орны мен мерзімі: Спорт зал

Көрнекіліктер:

1. Қазақстан Республикасының мемлекеттік рәміздері: Туы, Елтаңбасы, Гимн.

2. Әскери-патриоттық музыкалар

4. Сайысқа қажетті құралдар-жабдықтар

Жарыстың өтілу барысы:

(Әскери-патриоттық әуен)

Жүргізуші: Қош келдіңіздер, қадірлі де құрметті, ардақты да аяулы ұстаздар, келген қонақтар, оқушылар!!!

Сен - қазақсың!

Қазақ деген ел бөлек.

Қазақ салған соқпақ бөлек, жол бөлек.

Сен - қазақсың!

Алғызбайтын барыссың,

Ар-ожданның асқағысың, намыссың!

деп, 7 мамыр - Қазақстан Республикасының Отан қорғаушылар күніне орай өткізілгелі отырған «Бүгінгі ұрпақ - ертеңгі ел қорғаны» атты сайысымызды бастаймыз.

Жүргізуші: Алдымен сайыстың кезеңдерімен таныстырып өтейін:

1. Топтардың өздерін таныстыруы.

2. «Әуеде ән қалықтап». Бір орында адымдап, әскери-патриоттық әндер шырқау.

3. «Білімді мыңды жығар». Сұрақ-жауап сайысы.

4. «Ептілігіңді таныт». Автоматты толық емес бөлшектеу және жинау.

5. «Кім жылдам?» ОЗК-ны уақытқа кию.

6. «Батырлар - ер қорғаны». Дабыл кезіндегі сарбаздың шұғыл әрекеті.

7. «Өнерлі ұландар». Сарбаздың жаға тігу өнері.

8. «Күш - білекте емес, жүректе». Жорғалап жатып жүру сайысы.

9. «Батыр жауда сыналады». «Жаралыларды тасу» ойыны.

Сайыстың кезеңдерімен таныс болдық, енді әділ баға беретін әділ қазылар алқаларымен таныс болыңыздар:

Алдында көк тіреген алып бір шың,

От болып, алау болып жанып тұрсың.

Сайыстың ең алғашқы шартыменен

Бөлімшелер өздерін таныстырсын.

Алғашқы бөлім топтардың өздерін таныстыруына сөз берелік.

(1-кезең бойынша әділқазылардан сайыскерлердің бағасын көрсету сұралады)

Бойыңды үйрет, сарбаздар, жас шағыңнан,

Алға қарай қадам бас, дәл қазірден,

Рух берер әрдайым сарбаздарға

Асқақтата айтылған «Саптағы ән»

2-кезең - «Әуеде ән қалықтап». Бір орында адымдап, әскери-патриоттық әндер шырқау.

(2-кезең бойынша әділқазылардан сайыскерлердің бағасын көрсету сұралады)

Сарбаздар, сыналатын кезің келді.

Тайсалмай жауап берсін бүгін енді.

Жекпе-жек, сұрақ-жауап сайысында

Көрсетсін оқушылар білімдерін.

3-кезең - «Білімді мыңды жығар» атты сұрақ-жауап сайысын бастаймыз.

(3-кезең бойынша әділқазылардан сайыскерлердің бағасын көрсету сұралады)

Ереуіл атқа ер салмай

Егеулі найза қолға алмай

Еңку-еңку жер шалмай

Ерлердің ісі бітер ме?

- деп Махамбет батыр жырлағандай 4-кезеңімізді бастайық! «Ептілігіңді таныт» сайысы. Автоматты толық емес бөлшектеп жинау. Уақыты - 1мин.

(4-кезең бойынша әділқазылардан сайыскерлердің бағасын көрсету сұралады. )

Сен жігіт болсаң кең тұлғалы

Алдыңда белгілі көп жол тұрмағы

Сан сынға шыдай біл,

Тек төзе көрме

Жала сөз айтса біреу ел туралы!

-Ендеше, жігіттеріміздің нағыз сыналар шағы да келді. «Кім жылдам?» ОЗК-ны уақытқа кию сайысы. Уақыты: 3мин.

(5-кезең бойынша әділқазылардан сайыскерлердің бағасын көрсету сұралады. )

Отаныңа қызмет ет, қызмет ет Отанға!

Балам, саған осы менің бұйрығым да, батам да.

Қатардағы солдат болу - жүру емес қатарда,

Қатарды құр көбейткеннің қатарынан атанба!

деп, дабыл кезіндегі сарбаздың шұғыл әрекетін тамашалайық. Уақыты - 45секунд.

(6-кезең бойынша әділқазылардан сайыскерлердің бағасын көрсету сұралады. )

Өмірге биік сенеміз,

Думанға қызық келеміз.

Әділқазы ел сенген,

Өнерге баға беріңіз.

«Өнерлі ұландар» атты бөлімді бастаймыз. Бұнда сарбаздың жаға тігу өнеріне тәнті боласыздар. Уақыты: 2 минут.

(7-кезең бойынша әділқазылардан сайыскерлердің бағасын көрсету сұралады. )

Күшің барда, жігіттер, көкпарға түс,

Ел алдынды мақтаншы, көрсетіп күш.

Құр бекерге көкірек неге керек?

Ал бастайық, сайысты, бір, екі, үш!

Бұл кезеңнің атауы - «Күш - білекте емес, жүректе». Сайыскерлер жорғалап жатып жүру арқылы күш сынасады.

(8-кезең бойынша әділқазылардан сайыскерлердің бағасын көрсету сұралады. )

Сарбаздарға осы сәт - бақ сынар күн

Белдесу, күресуді жатсынар кім?

«Жігітке жеті өнер де аз екен» деп,

Көтерген көкке жайсаң, жақсыларын.

Сайысымыздың соңғы кезеңі - «Батыр жауда сыналады» деп аталады. Бұл кезеңде ойыншылар «Жаралыларды тасу» ойыны бойынша шапшаңдықтарын көрсетеді.

(9-кезең бойынша әділқазылардан сайыскерлердің бағасын көрсету және қорытынды ұпай сандарын есептеп сайыстың жеңімпазын жариялау сұралады )

Ән: «Атамекен»

Отан - ордаң, ыстық тауы, орманы,

Күні кеше - егемен ел болғаны.

Отан қорғау қасиетті борышың,

Бүгінгі ұрпақ, ертең ел қорғаны боларсың!

Ұқсас жұмыстар

Ұрпақ тәрбиесінің тірегі – отбасы

Көп бағдарлы

Болашаққа үміт, жастарға сенім

Ата-ана мен ұстаз, білім мекемесі арасында байланысты нығайту және ұстаз беделін арттыру

Отан үшін аянбай соғысты олар

Балалар 1986 жылы желтоқсан оқиғасында қазақ жастарымыз көшеге

М.мақатаев. "райымбек! райымбек!" поэмасы.9-сынып

Баланың тәртібін

Құтты болсын қадамың, Құтты болсын талабың

Оқушыны жеке тұлға ретінде қалыптастыру

Пәндер

Қазақ тілінде жазылған рефераттар, курстық жұмыстар, дипломдық жұмыстар бойынша біздің қор #1 болып табылады.

Ақпарат

Қосымша

Email: info@stud.kz